Bakı, 1 noyabr, AZƏRTAC 

Azərbaycan karateçiləri Avstriyanın Lints şəhərində keçirilmiş dünya çempionatından uğurlu nəticə ilə Vətənə qayıdıblar.

AZƏRTAC xəbər verir ki, bununla əlaqədar noyabrın 1-də Gənclər və İdman Nazirliyində mətbuat konfransı təşkil olunub. Tədbirdə gənclər və idman nazirinin müavini İsmayıl İsmayılov, Azərbaycan Karate Federasiyasının (AKF) prezidenti Yaşar Bəşirov, Federasiyanın birinci vitse-prezidenti Rəhman Hətəmov və dünya çempionatının mükafatçıları - Rafael Ağayev, Ayxan Mamayev, Firdovsi Fərzəliyev iştirak ediblər.

İ.İsmayılov karate üzrə milli komandamızın dünya çempionatında bir qızıl, bir gümüş və bir bürünc medal qazanmasını yüksək nailiyyət kimi qiymətləndirib. Ölkəmizdə idmana göstərilən dövlət qayğısından danışan nazir müavini karatenin Olimpiya Oyunlarının proqramına daxil edilməsinin əhəmiyyətini vurğulayıb. O, bu qərarın Azərbaycan təmsilçilərinin “Tokio-2020”də daha yüksək nəticə göstərmələrinə şərait yaradacağına əminliyini ifadə edib.

AKF-nin prezidenti Y.Bəşirov bildirib ki, idmançılarımız 118 ölkədən 1025 iştirakçının qatıldığı 24-cü dünya çempionatını beşinci, Avropa ölkələri arasında isə ikinci yerdə başa vurublar. Rafael Ağayevin (75 kq) beşqat dünya çempionluğu, Ayxan Mamayevin (84 kq) gümüş, Firdovsi Fərzəliyevin (60 kq) isə bürünc medal qazanmaları mükafatçılar sırasına düşən 26 ölkə arasında komandamıza yüksək nəticə qazandırıb.

Karateçilərimizin ildən-ilə daha yaxşı nəticələr əldə etdiklərini bildirən Federasiya prezidenti IV İslam Həmrəyliyi Oyunlarında da uğurla mübarizə aparmağa çalışacaqlarını vurğulayıb: “Karateçimizin beşqat dünya çempionluğu bizim üçün böyük fəxrdir. İndiyədək heç kim bu uğura dörd dəfədən çox nail olmayıb. Rafael Ağayev bu göstərici ilə rekorda imza atdı”.

Federasiya prezidenti qarşıdakı turnirlərə də yüksək səviyyədə hazırlaşdıqlarını qeyd edərək deyib: “Hazırda Dünya Karate Federasiyasının 192 üzvü var. 2020-ci il Tokio Yay Olimpiya Oyunlarına qədər üzv ölkələrin sayı 200-ə çatacaq. Bu səbəbdən Tokio Olimpiadasında böyük rəqabət olacaq. Çalışacağıq ki, dünyada reytinqimizi daha da artıraq”.

2018-ci il karate üzrə dünya çempionatının Bakıda keçirilə biləcəyinə toxunan Y.Bəşirov diqqətə çatdırıb ki, turnir Peruda keçirilməli olsa da, bu ölkə təşkilatçılıqdan imtina edir. Bu səbəbdən Azərbaycan yarışa ev sahibliyi etmək istəyir. Bu, həm də Olimpiadadan əvvəl yaxşı hazırlıq olar.

Federasiyanın birinci vitse-prezidenti Rəhman Hətəmov isə beynəlxalq turnirlərdə hakim ədalətsizliyindən söz açıb. O bildirib ki, komanda yarışlarının bürünc mükafatı uğrunda Fransa idmançıları ilə mübarizə aparan Azərbaycan millisi sırf hakim ədalətsizliyi üzündən mükafatdan kənarda qalıb.

Beşqat dünya çempionu Rafael Ağayev Azərbaycana qələbə sevinci yaşatdığına görə məmnunluğunu ifadə edərək deyib: “Bu, təkcə bizim yox, Azərbaycan xalqının qələbəsidir. Bayrağımızı ucaltdıq və himnimizi fəxri kürsüdə səsləndirdik. Dünya çempionatında zəif rəqib olmur. Sonuncu dəfə 2010-cu ildə dünya çempionu olmuşam. Sonradan hakim qərarı ilə uduzmuşam və daha sonra zədə üzündən çempionatdan kənarda qaldım. Tokio Olimpiya Oyunlarında 35 yaşım olacaq. Lakin hesab etmirəm ki, bu, mənim mötəbər turnirdə yüksək nailiyyət qazanmağıma mane olacaq”.

Sonra jurnalistlərin sualları cavablandırılıb.