Yeddi gözəl, bir hekayə: Duyğuların rəqsi
“Yeddi Gözəl" baletinin nümayişi ilə “Balet günləri” layihəsinin bağlanışı olub
Bakı, 11 noyabr, Gülay Nəzərova, AZƏRTAC
“Yeddi Gözəl” baleti hər biri ayrı bir mədəniyyətin, ayrı bir talenin daşıyıcısı olan yeddi fərqli obrazın hekayəsidir. Bu gözəllər təkcə fərdi surətlər deyil, həm də insanın öz iç dünyasındakı müxtəlif duyğuların və xəyalların rəmzidir. Onların hər biri Bəhramın yolunu işıqlandırır, amma, eyni zamanda, onun qarşısına sınaqlar qoyur. Qaranlıq vəziri, saf sevgini təmsil edən Ayşə və illüziyalarla həqiqət arasında qalan şah - bütün bu obrazlar bir-biri ilə qarşılıqlı təsir yaradaraq hekayənin əsas ideyasını formalaşdırır.
Məhz bu dərin mənalı əsərin səhnə təcəssümü ilə noyabrın 11-də Heydər Əliyev Sarayında Azərbaycan Dövlət Akademik Opera və Balet Teatrının təqdimatında görkəmli bəstəkar Qara Qarayevin üçpərdəli “Yeddi Gözəl” baletinin nümayişi keçirilib və bununla da genişmiqyaslı “Balet günləri” layihəsinin bağlanışı olub.
AZƏRTAC xəbər verir ki, orkestri Azərbaycan Dövlət Akademik Opera və Balet Teatrının baş dirijoru, Əməkdar artist Əyyub Quliyev idarə edib.
Libretto Nizami Gəncəvinin eyniadlı poemasının motivləri əsasında Y.Slonimski, Rəfiqə Axundova və Maqsud Məmmədov tərəfindən yazılıb.
Gecənin əsas rollarını səhnədə Timur Oduşev (Bəhram) və Yuliya Ferştandt (Ayşə) ifa ediblər. Onların duetlərində sevginin saflığı, itkinin acısı və insanın öz mənini dərk etmə ağrısı musiqi və hərəkətin dili ilə tamaşaçılara ötürülüb.
Makar Ferştandt (Vəzir) isə qəhrəmanın qaranlıq tərəfini təcəssüm etdirərək, tamaşada gərginlik və daxili qarşıdurma atmosferi yaradıb. Onun səhnə davranışında və plastikasında hakimiyyət arzusu ilə məhəbbətə qarşı duran soyuq hesablama aydın hiss olunurdu.
“Yeddi Gözəl”in hər biri - Ayan Eyvazova (Gözəllər gözəli), Məryam Şabakayeva (Hind gözəli), Səbinə Məmmədova (Bizans gözəli), Nigar Əliyeva (Xarəzm gözəli), Liana Praqa (Slavyan gözəli), Əməkdar artist Elmira Süleymanova (Məğrib gözəli) və Zəhra Tanrıverdiyeva (Çin gözəli) öz obrazlarının milli və bədii ruhunu incə plastika və zərif hərəkətlər ilə canlandırıblar.
Quruluşçu baletmeysterlər - Xalq artistləri Rəfiqə Axundova və Maqsud Məmmədov səhnəyə həm milli kolorit, həm də bəşəri duyğular qataraq əsərin ideya dərinliyini müasir nəfəsdə təqdim ediblər. Repetitorlar isə Xalq artistləri Mədinə Əliyeva, Gülağası Mirzəyev, Əməkdar artistlər Fərid İbrahimov və Yuriy Lobaçevdir.
Baletin səhnə tərtibatı da xüsusi diqqət çəkib.
Quruluşçu rəssamlar — SSRİ Xalq artisti, SSRİ Dövlət mükafatı laureatı Toğrul Nərimanbəyov və Əməkdar mədəniyyət işçisi Tehran Babayevin yaratdığı rəngarəng səhnə dünyası “Yeddi Gözəl”in simvolikasını — arzuları, illüziyaları və insanın özünü tapmaq axtarışını — göz oxşayan bir tabloya çevirib.
Qeyd edək ki, oktyabrın 15-dən noyabrın 11-dək Azərbaycan Dövlət Akademik Opera və Balet Teatrının təşkilatçılığı ilə “Balet Günləri” layihəsi keçirilib. Layihə çərçivəsində klassik və müasir balet sənətinin ən gözəl nümunələri tamaşaçılara təqdim olunub. Bu müddət ərzində səhnədə həm yerli, həm də xarici xoreoqrafların quruluşunda əsərlər nümayiş etdirilib, gənc ifaçılarla yanaşı, balet səhnəsinin tanınmış ustaları da çıxış ediblər.
Bölmənin digər xəbərləri
