İQTİSADİYYAT
Yeni qaz mənbələri və yataqlardakı nəhəng ehtiyatlar Azərbaycanın Avropada etibarlı tərəfdaş kimi mövqeyini daha da gücləndirir
Bakı, 10 fevral, AZƏRTAC
İqtisadi və geosiyasi baxımdan əhəmiyyəti getdikcə daha da artan Cənub Qaz Dəhlizi layihəsinin müvəffəqiyyətlə başa çatması iştirakçı dövlətlərin uğurudur. Onun son seqmenti olan TAP layihəsi 2020-ci il dekabrın 31-də - Dünya Azərbaycanlılarının Həmrəyliyi Günündə istifadəyə verilib. Bu layihənin icra edildiyi ilk gündən Avropa Komissiyası və bütün ölkələr, şirkətlər və beynəlxalq maliyyə institutlar tərəfindən Azərbaycana dəstək verilib.
Bu fikirləri AZƏRTAC-a açıqlamasında Milli Məclisin deputatı Məlahət İbrahimqızı bildirib.
Dəyəri 33 milyard ABŞ dolları qiymətləndirilən Cənub Qaz Dəhlizinin XXI əsrin ən böyük layihəsi olduğunu qeyd edən deputat deyib ki, layihənin reallaşmasına dünyanın aparıcı maliyyə təsisatları - Dünya Bankı, Avropa Yenidənqurma və İnkişaf Bankı, Asiya İnkişaf Bankı, Avropa İnvestisiya Bankı, Asiya İnfrastruktur və İnvestisiya Bankı lazımi dəstək veriblər.
“Ümumiyyətlə, əsası ulu öndər Heydər Əliyev tərəfindən qoyulmuş Azərbaycanın enerji siyasəti Prezident İlham Əliyev tərəfindən yüksək səviyyədə həyata keçirilir. Məhz dövlətimizin başçısının böyük uzaqgörənliyi və müdrikliyi, güclü diplomatiyasının nəticəsidir ki, onun rəhbərliyi və xeyir-duası ilə 2003-ci ildən bu günədək həyata keçirilən neft-qaz layihələri geosiyasi və iqtisadi baxımdan beynəlxalq əhəmiyyətli layihələrdir. Dünyanın geosiyasi mənzərəsi günbəgün dəyişir. Azərbaycanın yerləşdiyi coğrafiya tarix boyu dünyanın siyasi xəritəsində ən önəmli bölgələrdən biri kimi xarakterizə edilir. Son üç yüz ildə isə yaşadığımız coğrafiya maraq dairələri fərqli olan bir sıra superdövlətlərin diqqət mərkəzinin yönəldiyi bölgəyə çevrilib. Bu mənada Avrasiyanın ən önəmli hissəsi olan Azərbaycanda dünyanın güc mərkəzləri ilə balanslı siyasət aparmaq, möhkəm və davamlı əməkdaşlıq qurmaq o qədər də asan olmayıb. Avropanın etibarlı və strateji tərəfdaşına çevrilən Azərbaycanın imkanları genişlənir”, - deyə M.İbrahimqızı qeyd edib.
Son dövrlərdə Avrasiyada, xüsusilə Avropanın enerji təchizatında çox ciddi böhran yaşandığını diqqətə çatdıran deputat bildirib ki, son 10-15 ildə dünyada yaranmış müxtəlif böhranlar zamanı iqtisadi, siyasi, eləcə də enerji təchizatı baxımından bölgənin, xüsusən də Avropanın düşdüyü böhranın həllində ölkəmiz əvəzsiz töhfələr verib. Məhz son vaxtlar baş verən məlum problemlərin həllində dövlətimizin başçısının həyata keçirdiyi uzaqgörən siyasətin nə qədər mühüm və həlledici olduğu bir daha sübuta yetirildi. O deyib: “Cənub Qaz Dəhlizi Məşvərət Şurası çərçivəsində keçirilən nazirlərin VIII toplantısında səsləndirilən fikirlər dəhlizin istismara verilməsindən ötən bir il ərzində qət edilən məsafə və əldə olunan nəticələrin bu layihəyə marağın daha da artmasına səbəb olduğunu bir daha gündəmə gətirdi. Avropada təbii qaza tələbatın sürətlə artması, eləcə də “mavi yanacağ”ın qiymətinin bahalaşması qlobal siyasi gündəmin əsas çağırışlarından birinə çevrilib. Cənub Qaz Dəhlizini cəzbedici edən çoxsaylı səbəblərdən biri isə nadir alternativ enerji kəməri kimi təhlükəsiz və sabit olması, hər cür siyasi spekulyasiyalardan uzaq tutulmasıdır. Bu isə mənbə və ixracatçı ölkə olan Azərbaycanın həyata keçirdiyi strateji enerji siyasəti ilə bağlıdır”.
Diqqətə çatdırılıb ki, Azərbaycanda yeni qaz mənbələrinin kəşf edilməsi və təsdiq olunmuş qaz yataqlarının nəhəng ehtiyatları hazırda Avropada ölkəmizin etibarlı tərəfdaş kimi mövqeyini daha da gücləndirir. Avropa Azərbaycanı özünün enerji təhlükəsizliyini təmin edən ən etibarlı və əsas strateji tərəfdaşlardan biri kimi görür. “Ümumiyyətlə, həm 44 günlük Vətən müharibəsində, həm də postmüharibə dövründə bölgəmizdə yaranmış yeni reallıqlar fonunda Azərbaycan bir daha sabit və etibarlı tərəfdaş kimi bütün beynəlxalq öhdəliklərə sadiqliyini bir daha sübut etdi. Bütün bunlar ölkəmizin, xalqımızın əvəzedilməz Liderinin ən çətin geostrateji durumda belə enerji kommunikasiyalarını, təhlükəsizliyini yüksək səviyyədə təminetmə bacarığını dünyaya nümayiş etdirdi”, - deyən deputat vurğulayıb ki, ölkəmizin əhəmiyyətli və etibarlı tərəfdaş olması Avropa İttifaqının rəhbərliyi tərəfindən də etiraf edilir. Xüsusi qeyd etmək lazımdır ki, toplantıda iştirak edən Prezident İlham Əliyev Avropa İttifaqı ilə qarşılıqlı etimada söykənən münasibətlərə toxunaraq enerji siyasətimizin arxasında heç bir siyasi gündəmin olmadığını qeyd edib və ölkəmizdə həyata keçirilən enerji siyasətinin daim çox açıq, şəffaf, biznes və nəticələrə hesablandığını vurğulayıb.
M.İbrahimqızı bildirib ki, baş verən proseslər Azərbaycanın bundan sonra da Avropanın etibarlı enerji təminatçısı və strateji tərəfdaşı olacağını deməyə əsas verir.