Yevlax, 18 oktyabr, AZƏRTAC

Bu ilin doqquz ayında Yevlax rayonunda ümumi məhsul istehsalının həcmi 482,2 milyon manat olub. Bu, ötən ilin eyni dövrünə nisbətən 85 milyon manat və yaxud 21,4 faiz çoxdur. Ümumi məhsul buraxılışının 7,4 milyon manatını sənaye, 60 milyon manatını kənd təsərrüfatı, 54,2 milyon manatını tikinti təşkil edib. Adambaşına 3794,7 manat ÜDM istehsal edilib ki, bu da 2016-cı ilin doqquz ayına nisbətən 649,7 manat və yaxud 20,7 faiz çoxdur. İlin doqquz ayında 1146-sı daimi olmaqla, 1721 iş yeri açılıb.

AZƏRTAC xəbər verir ki, bu faktlar Yevlax rayonunda 2017-ci ilin doqquz ayının yekunlarına həsr olunan hesabat yığıncağında səsləndirilib.

Yığıncaqda bildirilib ki, hesabat dövründə tikinti, quruculuq və abadlıq işləri davam etdirilib, infrastrukturun yaxşılaşdırılmasına, əhalini narahat edən problemlərin aradan qaldırılmasına xüsusi fikir verilib. Cari ildə İqtisadiyyat Nazirliyinin Aran Regional İnkişaf Mərkəzinin binası, Salahlı-Balçılı-Ağqırax-Varvara-Cırdaxan-Yevlax şəhərinə giriş kəndlərarası avtomobil yolu, Mingəçevir-Bəhrəmtəpə avtomobil yolunun Mingəçevir-Aran qəsəbəsi hissəsi istifadəyə verilib. Varvara balıqartırma və yetişdirmə zavodu, Varvara su elektrik stansiyası yenidən qurulub. Aşağı Qarxun və Nemətabad kənd körpələr evi-uşaq bağçaları əsaslı təmir edilib. Hazırda Kür çayı sahilində 5 ulduzlu hotelin, 12 saylı Ərazi Vergilər Departamentinin binasının, dəmir yol körpüsünün, Aran qəsəbəsində ailə sağlamlıq mərkəzinin və pambıq qəbulu məntəqəsinin tikintisi aparılır.

Diqqətə çatdırılıb ki, ilin doqquz ayında ötən ilin eyni dövrü ilə müqayisədə 1,9 faiz çox kənd təsərrüfatı məhsulları istehsal edilib. 2168 hektarda pambıq əkilib, 5585 kiloqram barama təhvil verilib. 2016-cı ilin doqquz ayı ilə müqayisədə 8,1 ton ət, 209 ton süd, 0,2 ton çox yun istehsal olunub.

Əkin sahələrinin suvarılmasının yaxşılaşdırılması və məhsuldarlığın yüksəldilməsi məqsədilə rayon ərazisində 313 kilometr suvarma kanalı lildən təmizlənib, 14 nasos stansiyası, 3000 metr beton kanallar, nasos stansiyalarına xidmət edən təzyiqli boru kəmərləri təmir edilib. Bundan başqa, rayonun 12 kəndində 28 min hektar sahədə meliorasiya işlərinə başlanılıb.

Məruzə və çıxışlarda əhalinin həyat şəraitinin yaxşılaşdırılması, elektrik enerjisi, təbii qaz və su ilə təminat, təhsil, mədəniyyət sahələrində görülən işlər təhlil edilib, uğurlarla yanaşı, problemlər də sadalanıb, onların həlli üçün təkliflər irəli sürülüb.