YURİ LUJKOV “ÜÇÜNCÜ MÜDDƏT” İDEYASINI BƏYƏNİR
Moskvanın meri Yuri Lujkov ölkə prezidentinin səlahiyyət müddətinin 5-7 ilədək uzadılması və bir şəxsin dövlət başçısı vəzifəsini dalbadal üç dəfə tutması barədə Rusiya Federasiya Şurasının sədri Sergey Mironovun təşəbbüsünü dəstəkləmişdir. AZƏRTAC “RİA Novosti”yə istinadla xəbər verir ki, bunu o, “TV-Sentr” telekanalına müsahibəsində bildirmişdir.
Lujkov demişdir: “Rusiya idarəetmə formasını müəyyənləşdirərkən xarici nümunələrə baxmamalıdır. Məgər Avropada, İngiltərədə, digər ölkələrdə dövlət rəhbərləri üçün iki müddət var? Əlbəttə ki, yoxdur. Nə üçün biz şübhə doğuran və cəmi 250 illik tarixi olan Amerika demokratiyasını təqlid etməliyik?”.
Bununla yanaşı, mer vurğulamışdır ki, vəzifəsinin öhdəsindən uğurla gələn rəhbər işçini dəyişdirməyin mənası yoxdur.
Xatırladaq ki, Sergey Mironov prezidentin səlahiyyət müddətinin uzadılması təklifini martın 30-da, Federasiya Şurasının başçısı vəzifəsinə üçüncü dəfə seçildikdən dərhal sonra irəli sürmüşdür. Mironovun sözlərinə görə, prezident üçün dörd il strateji planların, uzunmüddətli proqramların həyata keçirilməsi üçün fiziki cəhətdən az müddətdir.
Bölmənin digər xəbərləri
