Cəbrayıl, 4 oktyabr, Aydın Yavərzadə, AZƏRTAC

Keçən ilin bu günü 1993-cü il avqustun 23-dən başlanan və 27 ildən artıq davam edən yurd həsrətimizin bitdiyi tarix kimi yaddaşlarımıza həkk olundu. Prezidentimiz, Ali Baş Komandanımız İlham Əliyevin Cəbrayıl şəhərinin və bir neçə kəndimizin işğaldan azad olunması müjdəsini hər bir azərbaycanlı kimi, bütün cəbrayıllılar da böyük sevinclə qarşıladılar.

Cəbrayıl rayon sakini, Azərbaycan Yazıçılar Birliyinin üzvü, “Xudafərin” qəzetinin baş redaktor müavini, qabaqcıl təhsil işçisi Hidayət Səfərli bir il öncə yaşadığı və indi də davam edən sevinc hisslərini AZƏRTAC-ın bölgə müxbiri ilə bölüşüb:

Uşaqlığımın və gəncliyimin qaldığı, yuxularımı illərdir ərşə çəkən yurd yerlərimə qovuşmaq müjdəsiydi bu xəbər. Bu xəbər sevinc qarışıq göz yaşları ilə yoğrulan, təsəvvürə gətirilməsi mümkünsüz olan doğma, əziz bir hiss idi. Bu yalnız biz cəbrayıllıların deyil, bu gün bir yumruq, bir qəlb olan xalqımızın şadlıq, şadyanalıq hayqırtısıydı. Şad olan günüydü bizlərə əziz olan ruhların.

Bu sevincli anlarımızda Azərbaycan Respublikasının Prezidenti, Ali Baş Komandan İlham Əliyevin xalqımıza, o cümlədən biz cəbrayıllılara müraciətindən qürur hissi keçirdik. Cənab Prezident illər öncə dəfələrlə qeyd etmişdi ki, Qarabağa Böyük Qayıdış Cocuq Mərcanlıdan başlanır. Bu gün böyük bir fəxarətlə qeyd etmək istəyirəm ki, Qarabağda aparılan Vətən müharibəsinin ilk böyük Zəfər müjdəsini də Cəbrayıl torpağından aldıq. Əldə olunan bu böyük Zəfərə addım-addım, həm də əzmlə, qətiyyətlə irəliləyən Ali Baş Komandanımıza, müzəffər Ordumuza təşəkkür edir, şəhidlərimizə Allahdan rəhmət, yaralılarımıza şəfa diləyir, ölkə rəhbərinin ətrafında daha sıx birləşəcəyimizi və veriləcək bütün əmr və tapşırıqları can-başla yerinə yetirəcəyimizi bildirirəm. Qələbəmiz ölkə rəhbərliyi, ordu və xalqın birliyindən keçir. Bu birlik isə daimi və sarsılmazdır.

Prezidentimizin xalqa müraciətində dediyi bu sözlər illərdir qəlbimizdə yara bağlamış bir ağrıya, bir nisgilə məlhəm oldu, yurd vüsalı ilə yanıb qovrulan ürəyimizə su çilədi, bizləri məcburi köçkün adının yükündən qurtardı: “Cəbrayıl rayonunun böyük hissəsi işğaldan azad olunub. Uzun müddətdən sonra Cəbrayıl şəhəri işğaldan azad olundu. Cəbrayıl bizimdir...” İşğaldan azad olunmuş kəndlərimiz sırasına Böyük Mərcanlı və Nüzgar kəndlərindən sonra Karxulu, Şükürbəyli, Çərəkən, Daşkəsən, Horovlu, Mahmudlu, Cəfərabad, Yuxarı Maralyan və Dəjəl... kəndlərinin də adları əlavə olundu. Bu siyahıya oktyabrın 20-də mənim də doğulduğum, boya-başa çatdığım, uzun illər həsrətində olduğum Daş Veysəlli kəndinin də adı yazıldı.

Azərbaycan xalqı, o cümlədən cəbrayıllılar inanırdılar ki, işğal davam edə bilməz, Azərbaycan Respublikasının Prezidenti, Ali Baş Komandan İlham Əliyevin rəhbərliyi altında bütün məcburi köçkünlər öz dədə-baba yurdlarına qayıdacaqlar. Bizləri yaşadan da bu inam hissi idi. Tarix bu inamımızda yanılmadığımızı göstərdi. Sentyabrın 27-də başlanan və 44 gün davam edən Vətən müharibəsi oğullarımızın qanı, canı bahasına hər şeyi yerbəyer etdi, torpaqlarımız işğaldan azad olundu. Bu, uzun illər görülmüş məqsədyönlü işlərin məntiqi nəticəsi idi. Ali Baş Komandanımızın qətiyyəti, ordumuzun peşəkarlığı, xalqımızın əzmi sayəsində tariximizin Zəfər salnaməsini yazdıq. Prezident İlham Əliyev Cəbrayıl şəhərinin və Cəbrayıl rayonunun doqquz kəndinin işğaldan azad olunması münasibətilə 2020-ci il 4 oktyabr tarixli Azərbaycan xalqına müraciətində bu fikirləri bir daha diqqətə çatdırdı: “Dörd il bundan əvvəl Cəbrayıl rayonunun Cocuq Mərcanlı kəndi yenidən qurulmağa başlamışdır. Uğurlu əməliyyat nəticəsində əldə edilmiş yüksəkliklər imkan verdi ki, Cəbrayıl rayonunun Cocuq Mərcanlı kəndinə sakinlər qayıtsınlar. Gözəl qəsəbə saldıq. Qəsəbənin açılışında demişdim ki, Cocuq Mərcanlı bizim yenilməz iradəmizin rəmzidir. Cocuq Mərcanlı onu göstərir ki, heç vaxt Azərbaycan xalqı işğalla barışmayacaq və bizim işğal edilmiş digər torpaqlara qayıdışımız məhz Cocuq Mərcanlıdan başlamışdır. Hesab edirəm ki, bu gün Cəbrayıl rayonunun böyük hissəsinin və Cəbrayıl şəhərinin azad edilməsi xüsusi əhəmiyyət daşıyır”.

Bu gün hər bir cəbrayıllının ürəyi o torpaqlara dönəcəyi anın həyəcanı ilə döyünür. Amma mənfur düşmən ərazilərimizi minalayıb və o yerlərdə çoxlu sayda partlamamış hərbi sursat var. İndi o yerlərdə minatəmizləmə əməliyyatları aparılır. Çox yaxın zamanda bu arzumuz da gerçəkləşəcək, yurd yerlərimizə dönəcəyik.

Şükürlər olsun ki, Cəbrayılımızın işğalından 28 il ötmədi, bir xalq olaraq işğal günlərini qeyd etməkdən qurtulduq. Alnımız açıq, başımız ucadır. Bu başucalığını bizlərə bəxş etmiş şəhidlərimizə Allahdan rəhmət, qazilərimizə cansağlığı arzulayıram. Qarşıdan tariximizin Zəfər günləri gəlir. Səninlə qol-boyun olmağa, uzun illərin həsrətini ovundurmağa biz də gəlirik, Cəbrayılım!

Nəğmə dedim hey şəninə,

Həsrət qaldım gülşəninə.

Viran qoyub gör səni nə;

Soruşub sordum, gəlirəm,

Gəlirəm, yurdum, gəlirəm.

Baş əymədin hər ötənə,

Səndən varmı heç ötə nə.

Qovuşdu yollar Vətənə;

Yolları yordum, gəlirəm,

Gəlirəm, yurdum, gəlirəm.

Adladım dağı, aranı,

Tanıdım ağı, qaranı.

Sardı oğullar yaranı;

Kül altda qordum, gəlirəm,

Gəlirəm, yurdum, gəlirəm.

Diridə yetdim aşığa,

Qanımı qoydum qaşığa.

Həsrət idim mən işığa;

Görəsi kordum, gəlirəm,

Gəlirəm, yurdum, gəlirəm.

Yağı qurdu bizə tuzaq,

Düşdü ruhlar yurddan uzaq.

Qoy eşitsin Vərənd, Dizaq;

Boş qalan gordum, gəlirəm,

Gəlirəm, yurdum, gəlirəm.