Bakı, 28 dekabr, AZƏRTAC

Azərbaycan Futzal Federasiyasının prezidenti, AFFA-nın İcraiyyə Komitəsinin üzvü Zaur Axundov qurumun cari ildəki fəaliyyəti və gələcək perspektivlərlə bağlı AZƏRTAC-ın müxbirinin suallarını cavablandırıb. Müsahibəni təqdim edirik.

-Cari ili ölkə futzalı üçün uğurlu hesab etmək olarmı?

Fürsətdən istifadə edib xalqımızı 31 Dekabr - Dünya Azərbaycanlılarının Həmrəylik Günü və Yeni il bayramı münasibətilə təbrik edir, cansağlığı arzulayıram. Bir ilə yaxın sərt karantin rejimində yaşadıq. Futzal yarışları ilə yanaşı, bütün idman tədbirləri dayanmışdı. Yumşalmalara getdikdən sonra məşqləri bərpa etdik. Əlbəttə, bir müddət məşq etmədikdən sonra idmançı formasını itirir. Buna baxmayaraq, biz çempionatımıza start verdik. Yüksək, Birinci və İkinci liqalarda yarışlar yüksək səviyyədə təşkil olunub. "Araz-Naxçıvan" klubu UEFA Çempionlar Liqasında mübarizə apardı. Düzdü komandamız əsas mərhələni keçə bilmədi. Klub yenidən təşkil olunur və heyətə yeni futzalçılar cəlb olunur. Ümid edirəm ki, növbəti illərdə Naxçıvan təmsilçisi əvvəllər qazandığı uğurlarla bizləri yenidən sevindirəcək. Millimiz ardıcıl altıncı dəfə Avropa çempionatının final mərhələsinə vəsiqə qazanıb. Yığmamız Niderlandda təşkil olunacaq qitə birinciliyində mübarizə aparacaq. Belə deyək də, pandemiyadan sonra ölkə futzalı yeni-yeni özünə gəlir. Baş verənləri nəzərə alsaq, cari ili futzalımız üçün uğurlu saymaq olar. Ümid edirəm ki, gələn il dünyamız koronavirusdan qurtulacaq və biz də normal fəaliyyətimizi davam etdirəcəyik.

-Millimiz gələn il keçiriləcək Avropa çempionatının final mərhələsində Gürcüstan, İspaniya və Bosniya və Herseqovina yığmaları ilə qarşılaşacaq. Rəqibləri necə dəyərləndirirsiz?

- Millimiz çətin qrupda yer alıb. Avropa çempionatında zəif rəqib olmur və autsayder anlayışı yoxdur. Son illərin statistikası göstərir ki, bəzi yığmalar uğurla çıxış edirlər. İspaniya millisi dünya reytinqində ilk üçlükdə yer alır. Gürcüstan, Bosniya və Herseqovina yığmaları ilk dəfə Avropa çempionatının final mərhələsinə vəsiqə qazanıblar və çalışacaqlar ki, bacardıqca irəli getsinlər. Gürcüstan millisinin heyətində çoxlu sayda braziliyalı milliləşdirilmiş futzalçılar var. Bu, təbii ki, onların öz seçimidir. Komandamız bu mötəbər yarışa ciddi hazırlaşır.

-Millimiz Avropa çempionatına hazırlıq məqsədilə Bakıda Ukrayna yığması ilə yoldaşlıq oyunu keçirdi. Bu oyunlar komandamıza nə verdi və hansı çatışmazlıqları müəyyənləşdirdiniz?

- Həmin oyunları məşqçilər korpusu ciddi analiz edəcək. Millimiz üçün uğursuz iki oyun oldu. Tanıdığım komandanı heç bir oyunda görə bilmədim. Futzalçılarımız sanki bu matçlara qeyri-peşəkar yanaşdılar. Baş məşqçinin sözlərinə görə, futzalçılar kollektiv deyil, individual oyuna üstünlük verdilər. Hər iki oyunda komandamızın fiziki durumu aşağı səviyyədə idi. Ümid edirəm ki, məşqçilər korpusu bu oyunlardan ciddi nəticələr çıxaracaq. Yanvarın 8-də komanda bir araya gələcək. Məşqlərimizi yanvarın 16-dək Bakıda davam etdirəcəyik. Yanvarın 17-də isə Belçika ilə səfərdə yoldaşlıq oyunu keçirəcəyik. Bu, final mərhələsindən öncəki son hazırlıq matçımız olacaq. Daha sonra komanda Niderlanda yollanacaq. Ümid edirəm ki, məşqçilər korpusu ilk oyunun keçiriləcəyi gün - ayın 22-dək komandanı normal vəziyyətə gətirəcəklər.

-Avropa çempionatında mübarizə aparacaq yığmamızın qarşısını hansı məqsədlər qoyulub?

- İlk məqsəd qrupdan çıxmaqdır. Bu bizim minimum məqsədimizdir. Millimiz 2010-cu ildən dünya və Avropa çempionatlarının iştirakçısıdır. Komandamızın böyük potensialı var. Hələ komandamızın üzvləri ilə görüşüm olmayıb. Avropa çempionatı öncəsi onlarla görüşəcəyəm. Bütün məsələlər müzakirə olunacaq, hədəfimizi bilirlər və bir daha məndən eşidəcəklər.

-Postpandemiyadan sonra qapalı məkanda ölkə çempionatına ilk start verən Azərbaycan Futzal Federasiyası oldu. Komandaları çempionata cəlb etmək çətin olmadı?

- Nəinki çətinlik, iştirakçıların sayı 2 dəfə artıq oldu. Futzal ölkəmizdə çox populyar idman növüdür. Texniki məsələlərə görə, bir neçə komandanı yarışa cəlb edə bilmədik. Komandaların çempionata cəlb olunmasında heç bir problemimiz olmadı. Onlar iştirak ərizələrini vaxtından əvvəl federasiyaya təqdim etmişdilər.

-Ölkə çempionatında mövsüm yarılanıb. Ümumi mənzərə necədir?

- Çempionatda birinci dövrəyə yekun vurulub. Sürpriz oyunlara şahidlik etdik. "CBC Sport" kanalı da daxili çempionatımızın oyunlarını işıqlandırır. Çempionatda çoxlu sayda gənc futzalçımız mübarizə aparır. U-19 millimiz bizim təklifimiz ilə çempionata cəlb olunub ki, təcrübələri çoxalsın. Məğlubiyyətləri də olur amma qələbələri də var. Fikirləşirəm ki, ölkə çempionatımız maraqlı keçir.

-"Araz-Naxçıvan"ın Çempionlar Liqasında uğursuz çıxışını nə ilə əlaqələndirirsiz?

- Ən böyük çətinlik fiziki durum idi. Bəzi futzalçıların zədə və kart səbəbindən oyunlarda iştirak etməməsi özünü göstərdi. Əsas da Ukrayna çempionu "Uraqan" ilə oyunda. Pandemiyadan sonra komandamız biz istəyən təlim-məşq toplanışını keçə bilməmişdi. Belə deyək ki, bir az çətin durumda idilər. Əgər futzalçı 1-2 ay məşqdən uzaq qalırsa, stabil formaya düşmək üçün ən azı 5-6 ay tələb olunur.

-Gələn il U-19 yığmamız Avropa çempionatının əsas mərhələsində mübarizə aparacaq. Seçməmiz Xorvatiya, Belarus və Latviya komandaları ilə üz-üzə gələcək. Yarışa hazırlıq prosesi barədə məlumat verərdiniz…

-Ən əsas məsələ U-19-un ölkə çempionatında oynamasıdır. Çempionat yeni ildən bərpa olunacaq. Məqsəd komandanın oyun təcrübəsi toplamasıdır. Komandamız Avropa çempionatının əsas mərhələsindən əvvəl təlim-məşq toplanışı keçəcək. Çalışacağıq ki, millimiz iki yoxlama oyununda gücünü sınasın. Rəqiblərdən birinin "Araz-Naxçıvan", digərinin isə əsas yığmamız olmasını düşünürük. U-19 bizim gələcəyə ümid ilə baxdığımız komandadır. Bunun işartılarını artıq görürük. Əsas millinin son təlim-məşq toplanışına U-19-da forma geyinən bir futzalçı - Xəzər Ağalızadə dəvət olundu. Nurlan Mehdizadə isə bir müddət əvvələdək U-19-da çıxış edirdi. Onu həm “Araz-Naxçıvan”a cəlb etmişik, həm də millinin toplanışına qatıldı. Baş məşqçi Joze Alesio Da Silva gələcəkdə daha bir neçə gənc və perspektivli oyunçunu əsas komandaya cəlb edəcək.

-Növbəti il üçün plan və hədəfləriniz nədir?

-İstərdik daha çox gənc futzal ilə məşğul olsun. İdmanın bu növü ölkəmizdə çox sevilir. 14-16 yaşlı uşaqların futzala cəlb olunması prioritet işimizdir. Bu istiqamətdə işlərimizi həmişə davam etdiririk.