Tbilisi, 8 noyabr, AZƏRTAC

Azərbaycanın 8 Noyabr-Zəfər Günü bayramı Gürcüstanın Batumi şəhərində də təntənə ilə qeyd olunub. Azərbaycanın baş konsulluğunun təşkilatçılığı və dəstəyi ilə Zəfər Günü və “Şuşa İli”nə həsr olunmuş tədbir keçirilib.

AZƏRTAC xəbər verir ki, tədbirdə Acarıstan Muxtar Respublikası səhiyyə nazirinin müavini Zurab Tenieaşvili, Türkiyə və İranın baş konsulları, Ukraynanın və Tacikistanın fəxri konsulları, Kulevi QDT-nin rəhbəri və əməkdaşları iştirak ediblər. Həmçinin tədbirə SOCAR-ın Acarıstan nümayəndəliyinin rəhbəri, “Əli və Nino” adına Gürcüstan-Azərbaycan Sosial Mədəni İnkişaf Mərkəzinin üzvləri, ölkəmizin və gürcü ictimaiyyətinin nümayəndələri, Batumidə yaşayan soydaşlarımız və KİV nümayəndələri təşrif buyurublar.

Tədbir iştirakçıları əvvəlcə 44 günlük Vətən müharibəsində şəhid olan hərbçilərimizin xatirəsini ehtiramla yad ediblər.

Batumi Dövlət Vokal Ansamblı Azərbaycanın və Gürcüstanın dövlət himnlərini canlı ifa edib.

Baş konsul Pərviz İsmayılzadə çıxış edərək, Zəfər Günü və “Şuşa İli” münasibətilə tədbir iştirakçılarını təbrik edib, hər iki əlamətdar bayramın tarixi əhəmiyyətindən danışıb. Bildirib ki, bu gün Azərbaycan xalqı bu bayramları Şuşada və Cıdır düzündə qeyd edir.

Diplomat deyib ki, Azərbaycan Respublikası Silahlı Qüvvələrinin Müzəffər Ali Baş Komandanı, Prezident İlham Əliyevin rəhbərliyi ilə şanlı Ordumuz Ermənistanın ardıcıl təxribatlarının və yeni işğal planlarının qarşısını almaq, eləcə də torpaqlarını azad etmək məqsədilə 2020-ci il sentyabrın 27-də Zəfər yürüşünə başladı. Rəşadətli Ordumuz 44 gün ərzində hərbi əməliyyatlar nəticəsində Azərbaycanın işğal altında olan Cəbrayılı, Füzulini, Zəngilanı, Qubadlını, Zəngilanı, Xocavənd rayonunun Hadrut qəsəbəsini və bir çox kəndlərini, Tərtər rayonunun Suqovuşan qəsəbəsini, Xocalı və Laçın rayonlarının bir neçə kəndlərini işğaldan azad edib. Ümumilikdə 300-dən çox yaşayış məntəqəsini, o cümlədən Ağdərə, Murovdağ və Zəngilan istiqamətlərində mühüm strateji yüksəklikləri düşmənlərdən təmizləyib.

Noyabrın 8-də 28 illik həsrətdən sonra Azərbaycan xalqı üçün böyük əhəmiyyət kəsb edən, Qarabağın tacı Şuşa şəhəri işğaldan azad olunub. Şuşa şəhərinin azad edilməsi dünya hərb tarixinə qızıl hərflərlə yazılıb.

Prezident İlham Əliyevin 2022-ci il 5 yanvar tarixli Sərəncamı ilə 2022-ci ili “Şuşa İli” elan edilib. Qarabağın tacı olan Şuşa şəhəri xalqımız üçün əziz məkandır. Şuşa hər bir azərbaycanlının mənəvi varlığının ayrılmaz parçasıdır.

Diqqətə çatdırılıb ki, təməli 1752-ci ildə Qarabağ xanı Pənahəli xan tərəfindən qoyulan və bu il 270 illiyi qeyd olunan Şuşa şəhəri zəngin inkişaf yolu keçib. Şəhərinin ötən əsrin 70-ci illərində sürətli inkişafı ümummilli Iiderimiz Heydər Əliyevin adı ilə sıx bağlıdır.

İşğaldan azad olunan Şuşada quruculuq işləri geniş vüsət alıb. Dahi Azərbaycan şairi Molla Pənah Vaqifin muzey-məqbərə kompleksi və böyük müğənni Bülbülün ev-muzeyi bərpa edilib. Prezident İlham Əliyev və birinci xanım Mehriban Əliyeva Şuşada Natəvanın, Bülbülün, Üzeyir Hacıbəylinin heykəlinin, “Qarabağ” hotelinin və bir sıra tarixi məkanların və abidələrin açılışını ediblər.

Azərbaycanın hərbi sahədə qazandığı qələbələr, xüsusilə Şuşanın düşmən işğalından azad olunması müharibənin taleyində həlledici rol oynayıb. Ermənistanın öz məğlubiyyətini etiraf etməsi və kapitulyasiyası ilə nəticələnib.

Azərbaycan və Rusiya prezidentlərinin, eləcə də Ermənistanın baş nazirinin 2020-ci il noyabrın 10-da imzaladıqları üçtərəfli Bəyanata əsasən, Azərbaycan heç bir itki vermədən Ağdam, Kəlbəcər və Laçın rayonlarını geri alıb. Bu ölkəmizin həm diplomatiya, həm də hərb sahəsində böyük uğurudur.

Xalqımızın Vətən müharibəsində göstərdiyi misilsiz qəhrəmanlığın və qazandığı möhtəşəm tarixi Zəfərin nümayiş etdirilməsi, şəhidlərimizin əziz xatirəsinin əbədiləşdirilməsi məqsədilə Bakı şəhərində Vətən müharibəsi memorial kompleksi və Zəfər muzeyi yaradılıb.

P.İsmayılzadə bildirib ki, cari il sentyabrın 12-də gecə saatlarında Ermənistan silahlı qüvvələrinin bölmələri Azərbaycan-Ermənistan dövlət sərhədinin Daşkəsən, Kəlbəcər və Laçın istiqamətlərində genişmiqyaslı təxribat törədib. Belə ki, Azərbaycan Ordusunun bölmələrinin mövqeləri arasındakı ərazilərin və təminat yollarının minalanmasını həyata keçirməyə cəhd edib. Ermənistan silahlı qüvvələrinin təxribatının və ölkəmizin ərazisinə və suverenliyinə qarşı hərbi təhlükələrin qarşısının alınması, hərbi qulluqçularımızın, o cümlədən Kəlbəcər və Laçın rayonları ərazisində infrastruktur işlərinə cəlb olunmuş mülki işçilərin təhlükəsizliyinin təmin edilməsi məqsədilə rəşadətli Azərbaycan Ordusunun bölmələri tərəfindən qəti cavab tədbirləri görülüb və görüləcək.

Torpaqlarımızın azad olunması hər bir azərbaycanlının başını uca edib, qürurunu qaytarıb. Bizlərə bu anları yaşadan, bu gün zaldakı stendlərdə hər birinin rəsmi həkk olunmuş şəhidlərimizin xatirəsi heç vaxt unudulmayacaq. Qələbəmiz uğrunda canlarından keçmiş şəhid və qazilərimiz hər zaman ehtiramla anılacaq.

Tədbir baş konsulluğun nəzdində fəaliyyət göstərən “Bazar günü” məktəbinin şagirdlərinin çıxışları ilə davam etdirilib. Şagirdlər Zəfər Gününə həsr edilmiş şeirlər söyləyib, şəhid Xudayar Yusifzadənin ifasında məşhurlaşan “Xudayar təsnifi” (Vətən yaxşıdır) mahnısını ifa ediblər.

Rəsmi çıxışlardan sonra Zəfər Gününə həsr olunmuş “Zəfər meydanı” sənədli filmi nümayiş olunub.

Tədbirdə iştirakçılara bukletlər və digər materiallar təqdim olunub, qonaqlar Gürcüstan və Azərbaycan mətbəxinin ləziz yeməklərindən dadıblar.

Xətayi Əzizov

AZƏRTAC-ın xüsusi müxbiri

Tbilisi