Zəfər Günü Batumidə geniş qeyd olunub
Tbilisi, 8 noyabr, AZƏRTAC
Azərbaycan Respublikasının Baş Konsulluğunun təşkilatçılığı və dəstəyi ilə Batumidə Zəfər Gününə həsr olunmuş tədbir keçirilib.
AZƏRTAC-a xəbər verir ki, tədbirdə Türkiyənin və İranın baş konsulları, SOCAR-ın Acarıstan nümayəndəliyinin, Kulevi QDT-ın rəhbərliyi və əməkdaşları, Azərbaycan və gürcü ictimaiyyətinin nümayəndələri, din xadimləri, soydaşlarımız iştirak ediblər.
Əvvəlcə şəhidlərimizin xatirəsi bir dəqiqəlik sükutla anılıb, Azərbaycanın və Gürcüstanın Dövlət himnləri səsləndirilib.
Baş konsul Pərviz İsmayılzadə çıxış edərək Zəfər Gününün tarixi əhəmiyyətindən danışıb. Bildirib ki, Azərbaycan xalqı Zəfər Gününü Şuşada, Cıdır düzündə artıq qeyd edir.
Diqqətə çatdırıb ki, üç il əvvəl Müzəffər Ali Baş Komandan, Prezident İlham Əliyevin rəhbərliyi ilə rəşadətli Azərbaycan Ordusu 44 günlük hərbi əməliyyatlar nəticəsində işğal altında qalan, 300-dən çox yaşayış məntəqəsini, o cümlədən Ağdərə, Murovdağ və Zəngilan istiqamətlərində mühüm strateji yüksəklikləri işğaldan azad edib.
Noyabrın 8-də 28 illik həsrətdən sonra Azərbaycan xalqı üçün böyük əhəmiyyət kəsb edən, Qarabağın tacı Şuşa şəhəri işğaldan azad olunub. Şuşanın azad edilməsi dünya hərb tarixinə qızıl həriflərlə həkk olunub.
Azərbaycanın hərbi sahədə qazandığı qələbələr, xüsusilə Şuşanın düşmən işğalından azad olunması müharibənin taleyində həlledici rol oynayıb. Ermənistanın öz məğlubiyyətini etiraf etməsi və kapitulyasiyası ilə nəticələnib.
Prezident İlham Əliyevin 2020-ci il 3 dekabr tarixli Sərəncamı ilə hər il 8 Noyabr-Zəfər Günü qeyd olunur.
Azərbaycan xalqının Vətən müharibəsində göstərdiyi misilsiz qəhrəmanlığın və qazandığı möhtəşəm tarixi zəfərin nümayiş etdirilməsi, şəhidlərimizin əziz xatirəsinin əbədiləşdirilməsi məqsədilə Bakıda Vətən müharibəsi memorial kompleksi və Zəfər muzeyi yaradılıb.
Türkiyənin Batumi şəhərindəki baş konsulu çıxış edərək Zəfər Günü münasibətilə Azərbaycan xalqını və tədbir iştirakçılarını təbrik edib. Bildirib ki, bu Qələbənin qazanılmasında Prezident İlham Əliyevin əvəzedilməz rolu xüsusi qeyd edilməlidir. Canları bahasına Azərbaycan torpaqlarını azad edən şəhidlərimiz hər zaman gələcək nəsillər tərəfindən fəxrlə anılacaq.
Tədbir Baş Konsulluğun nəzdində fəaliyyət göstərən “Bazar Günü” məktəbinin şagirdlərinin çıxışları ilə davam edib. Şagirdlər Zəfər Gününə həsr edilmiş şeirlər söyləyib, “Şən Azərbaycan” mahnısını ifa ediblər.
Sonda Zəfər Gününə həsir olunmuş “Heydər Əliyev və 44 günlük Zəfər yolu” sənədli film nümayiş etdirilib.
Tbilisi
Bölmənin digər xəbərləri
