CƏMİYYƏT
Zəfər Günü Budapeştdə qeyd edilib
Budapeşt, 11 noyabr, AZƏRTAC
Macarıstanın Budapeşt şəhərində Zəfər Günü və Dövlət Bayrağı Gününə həsr olunmuş “Vətəni hiss et!” adlı tədbir keçirilib.
AZƏRTAC xəbər verir ki, Budapeşt Azərbaycan Evində bir araya gələn azərbaycanlı tələbə və məzunlar Ordumuzun Vətən müharibəsində göstərdiyi şücaət və Zəfər Gününün önəmindən danışıblar.
Tədbiri giriş sözü ilə açan Budapeştdəki Azərbaycan Evinin rəhbəri İbrahim Səfərli dörd il əvvəl dövlət və xalq birliyi sayəsində qəhrəmanlıq nümayiş etdirərək torpaqların işğaldan azad edilməsinin əhəmiyyəti haqqında qonaqlara məlumat verib. Daha sonra Azərbaycanın Macarıstandakı səfirliyinin birinci katibi Seymur Abdullayev çıxış edərək səfir Tahir Tağızadənin tədbir iştirakçılarına ünvanlanmış müraciətini oxuyub.
Sonda çıxış edən Azərbaycan-Macarıstan Məzunlar Birliyinin sədri Günay Bayramova hər kəsin bu qələbədəki payından danışıb.
Qeyd edək ki, tədbir Gənclər Fondunun dəstəyi, Azərbaycanlı Tələbələr və Məzunlar Platforması (ASAP), Azərbaycanın Macarıstandakı səfirliyi, Macarıstan Azərbaycan evi və Azərbaycan-Macarıstan Məzunları İctimai Birliyinin birgə təşkilatçılığı ilə keçirilib.
Budapeşt
