Bakı, 13 oktyabr, AZƏRTAC

2023-cü il ölkəmizin və xalqımızın həyatında mühüm hadisələrlə zəngindir. Prezident İlham Əliyevin Sərəncamı ilə 2023-cü il “Heydər Əliyev İli” elan edildi. “Heydər Əliyev İli” çərçivəsində Ulu Öndərin siyasi kursunun layiqli davamçısı, Özü qədər inandığı və gələcəyinə böyük inam bəslədiyi İlham Əliyevin Prezident seçilməsinin 20-ci ildönümünün qeyd edilməsi xalqımız üçün olduqca qürurvericidir. Xalqımız bu xoşbəxtliyini hər zaman fəxr hissi ilə bəyan edir ki, Heydər Əliyev kimi Ümummilli Lideri, İlham Əliyev kimi Prezidenti var.

Bu fikirlər Yeni Azərbaycan Partiyası (YAP) Xətai rayon təşkilatının sədri, siyasi elmlər doktoru Vüqar Rəhimzadənin “Zəfər və qətiyyət zirvəsi” sərlövhəli məqaləsində yer alıb.

AZƏRTAC məqaləni təqdim edir.

1993-cü ildə xalqın təkidli tələbi ilə hakimiyyətə qayıdan Ümummilli Lider Heydər Əliyev zəngin idarəçilik təcrübəsinə əsaslanaraq Azərbaycanın müstəqilliyini daimi etdi, bugünümüz və gələcəyimiz üçün möhkəm təməl yaratdı. Bu fakt inkaredilməzdir ki, liderlik fenomeni dövlətin formalaşmasında və inkişafında həlledici rola malikdir. Siyasi liderliyin ilkin şərti dövlətin gələcəyini öncədən görmək və bu məqsədlə işləyib hazırladığı inkişaf strategiyasını həyata keçirməkdir. Bu baxımdan milli liderin dünyagörüşü, həyat təcrübəsi və siyasi iradəsi inkişaf strategiyasının xüsusiyyətlərini şərtləndirir, ən çətin məqamlarda düzgün seçim etməyə imkan verir.

Azərbaycanın müstəqilliyini tarixi nailiyyətimiz kimi dəyərləndirən Ulu Öndər Heydər Əliyev ölkəmizə həmişə yeni-yeni zəfərlər qazandıracaq inkişafın nəzəri konsepsiyasını, mütərəqqi inkişafın Azərbaycan modelini təqdim etdi. Yaradılan möhkəm təməl növbəti mərhələdə xalqın inam ünvanının düzgün seçilməsini bir zərurətə çevirdi. Dahi şəxsiyyət Heydər Əliyev 1 oktyabr 2003-cü ildə xalqa tarixi müraciətində Azərbaycanın yaradılan təməl üzərində uğurlarının davamlılığını təmin etmək üçün həmin ünvanı belə təqdim etdi: “Üzümü Sizə - həmvətənlərimə tutaraq, qarşıdan gələn Prezident seçkilərində Prezidentliyə namizəd, mənim siyasi varisim, Yeni Azərbaycan Partiyası sədrinin I müavini İlham Əliyevi dəstəkləməyə çağırıram”.

2003-cü il 15 oktyabr tarixli prezident seçkilərində xalqın 76,84 faiz səsini qazanaraq Prezident seçilən İlham Əliyev oktyabrın 31-də keçirilən andiçmə mərasimində Ümummilli Lider Heydər Əliyevin qarşısında bu vədi vermişdi: “Mən bu gün bu yüksək kürsüdən əziz Prezidentimiz cənab Heydər Əliyevə müraciət edərək deyirəm: Əziz Prezident, əsəriniz olan müasir Azərbaycanı gücləndirəcəyik, zənginləşdirəcəyik, hərtərəfli inkişaf etdirəcəyik, Sizin yolunuzla yeni qələbələrə doğru gedəcəyik”.

Prezident İlham Əliyev, eyni zamanda, belə bir əminliyi ifadə etmişdi ki, Azərbaycanın xoşbəxt gələcəyinə inanır.

Dövlətimizin başçısı İlham Əliyevin Prezident seçilməsindən 20 il keçir. İyirmi il zaman baxımından elə də böyük olmasa da, uğurlarımızın miqyasının genişliyi bu dövrü zənginləşdirərək sanki əsrə bərabər yol keçildiyi təəssüratını yaradır. Dövlətimizin başçısı tarixi Zəfərimizin reallıqları fonunda keçirilən Yeni Azərbaycan Partiyasının VII qurultayında həmin dövrü belə xarakterizə etmişdir ki, 2003-cü ildə xalq Heydər Əliyev siyasətinə səs verdi, mənə etimad göstərdi. Çünki demişdim ki, əgər xalq etimad göstərərsə, Ulu Öndərin siyasətinə sadiq qalacağam. O əsas amillərdən biri idi. Həyat onu göstərdi ki, ötən illər ərzində doğrudan da tarixi uğurlara imza atdıq.

Hər dövrün öz çağırışı, tələbi var. Bu çağırışlar təkmil islahatları, yeniliyə açıq olmağı bir zərurət kimi qarşıya qoyur. Məhz bu kontekstdən yanaşaraq dövlət başçısı İlham Əliyev jurnalistlərə ilk müsahibəsində “Sizcə, Sizi asan işlər gözləyir, yoxsa çətin” sualına cavabında bildirmişdi ki, həm asan, həm də çətin. Asan o mənada ki, artıq Azərbaycanda ölkəmizi hərtərəfli inkişaf etdirmək üçün gözəl zəmin yaranıb. On il ərzində Heydər Əliyevin siyasəti Azərbaycanda çox güclü bir təməl formalaşdırıb. Bu təməlin üzərində gözəl binanın inşa edilməsi asan görünə bilər. Amma, eyni zamanda, həyat yerində durmur. Yeni tələblər, vəzifələr qarşımızda dayanır. Azərbaycan xalqının dəstəyi ilə qarşıda duran bütün vəzifələri ləyaqətlə yerinə yetirəcəyəm. Azərbaycan xalqı görəcək ki, mən Azərbaycan üçün, xalqımız üçün yaxşı Prezident olacağam.

Dayanıqlı inkişafın təmin olunması dövlət siyasətinin əsas prioritetidir

Prezident kimi fəaliyyətə başladığı ilk gündən iqtisadi artımın qeyri-neft sektorunun hesabına olmasını qarşıya əsas hədəf kimi qoyan İlham Əliyevin sərəncamları əsasında Regional İnkişaf proqramları təsdiqləndi. Üç Dövlət Proqramı uğurla icra edilib, dördüncü sənədin icrası bu il sona çatır. Beynəlxalq maliyyə qurumlarının hesabatlarında da Azərbaycanın həyata keçirdiyi iqtisadiyyatın şaxələndirilməsi siyasəti təqdir edilir, respublikamız ən islahatçı ölkə kimi nüfuz qazanır. Qeyri-neft sektorunun inkişafına geniş imkanlar açan təbii ki, enerji diplomatiyamızın uğurlarıdır.

Siyasi sistemin təkmilləşdirilməsi bütün sahələrdə uğurlarımızın açarıdır

Dövlətin siyasətində insan amilinə verilən yüksək dəyər Konstitusiyamıza əlavə və dəyişikliklərin edilməsi məqsədilə son 20 ildə iki dəfə ümumxalq səsverməsinin keçirilməsində özünün aydın ifadəsini tapır. Bundan əlavə, ölkənin hərtərəfli inkişafında əhəmiyyətli rol oynayan qanunlara əlavə və dəyişikliklərin edilməsi, yaxud yeni qanunlarla əvəzlənməsi və digər addımlar da Azərbaycanda demokratikləşmə prosesinin sadəcə bir şüar, niyyət olmadığını, ölkəmizin hərtərəfli inkişafına xidmət etdiyini təsdiqləyir. “Media haqqında”, “Siyasi partiyalar haqqında” yeni qanunların qəbulu da bunun təsdiqidir.

Ölkəmizdə sağlam siyasi dialoq mühitinin formalaşdırılması, partiyalar arasında sıx əməkdaşlıq əlaqələrinin qurulması da demokratik inkişafın əyani təzahürlərindəndir. “Siyasi partiyalar haqqında” yeni Qanunun qəbulu siyasi partiyaların fəaliyyətində yeni uğurlu mərhələnin başlanğıcıdır.

Müstəqillik tariximizin ən parlaq səhifəsi

Prezident İlham Əliyev Ulu Öndər Heydər Əliyevin şah əsəri olan müasir müstəqil Azərbaycana ən yüksək zirvələri fəth etdirərək tariximizin Zəfər səhifəsini yazdı. İmzaların arasında imzasını görməkdən qürur duyduğumuz Azərbaycanın bu gün üçrəngli Bayrağının işğaldan azad olunmuş torpaqlarımızda dalğalanması ərazi bütövlüyümüzün bərpa olunmasının, BMT Təhlükəsizlik Şurasının qətnamələrinin icrasının təqdimatıdır.

Azərbaycan yeni reallıqlar yaratdı. Bu reallıqlar erməni yalanlarını, mifini dağıtdı. Dünyaya göstərildi ki, yenilməz ordu Azərbaycan Ordusu, məğlubedilməz xalq Azərbaycan xalqıdır. Azərbaycan ədaləti bərpa edərək dünyaya, sözün əsl mənasında, tarix, hüquq dərsi keçdi. Azərbaycan öz ərazi bütövlüyünü və tarixi ədaləti bərpa etdi. 2020-ci il noyabrın 10-da imzalanan üçtərəfli Bəyanatla Azərbaycan torpaqlarının uzun müddət davam edən işğalına son qoyuldu.

Əgər üç il bundan əvvəl İkinci Qarabağ müharibəsi nəticəsində işğala son qoymuşduqsa, bu il aprelin 23-də Laçın istiqamətində Azərbaycan-Ermənistan sərhədində sərhəd-buraxılış məntəqəsini qurmaqla ərazi bütövlüyümüzü, sentyabrın 19-da isə birgünlük lokal antiterror tədbirləri nəticəsində bütün ərazilərimizdə suverenliyimizi tam bərpa etdik. Azərbaycanın Qarabağ bölgəsində yerləşən Ermənistan silahlı qüvvələrinin birləşmələrinin, qeyri-qanuni erməni silahlı dəstələrinin silahı yerə qoyması, döyüş mövqelərindən və hərbi postlardan çıxması və tam şəkildə tərk-silah olunması Azərbaycanın növbəti qələbəsinin təntənəsidir.

Azərbaycan dünya hərb tarixində ilkə imza atdı. Tarixi Zəfərindən dərhal sonra işğaldan azad edilmiş ərazilərimizdə genişmiqyaslı bərpa-quruculuq işlərinə başladı.

Təbii ki, 20 ilin uğurlarını bir yazıda əhatə etmək qeyri-mümkündür. Qısa təhlil əsasında təqdim etdiyimiz uğurların xronologiyası gələcəyə daha böyük inamla addımlamağa əsas verir. Prezident İlham Əliyevin və Azərbaycanın Birinci vitse-prezidenti Mehriban xanım Əliyevanın birgə səyləri nəticəsində əldə olunan uğurların fonunda müəyyənləşdirilən hədəflərin qısa zamanda reallığa çevriləcəyi şübhəsizdir. Əsas hədəf tarixi sahibinə qayıdan torpaqlarımızda bərpa-quruculuq işlərinin sona çatdırılmasıdır. İndi xalqımız Müzəffər Ali Baş Komandan İlham Əliyevdən bu müjdəni gözləyir- Biz Qərbi Azərbaycana da qayıtdıq!