Zəfərdən başlayan yol Böyük Qayıdışla davam edir
İsmayıllı, 20 may, AZƏRTAC
“Bölgələrdən AZƏRTAC üçün yazırlar”: İsmayıllı ziyalısı Günay Rzayevanın “Zəfərdən başlayan yol Böyük Qayıdışla davam edir” məqaləsini təqdim edirik.
Prezident, Müzəffər Ali Baş Komandan İlham Əliyevin işğaldan azad olunmuş ərazilərə – Qarabağa və Şərqi Zəngəzura hər səfəri müasir tariximizin parlaq səhifələrindən birinə çevrilir. Bu səfərlər təkcə bərpa və yenidənqurma işlərinə nəzarət xarakteri daşımır, eyni zamanda, dövlət suverenliyimizin, ərazi bütövlüyümüzün və qəti siyasi iradəmizin təntənəsi kimi dəyərləndirilir.
44 günlük Vətən müharibəsində qazanılmış Qələbə ilə başlayan Böyük Qayıdış strategiyası artıq real nəticələrlə müşayiət olunur. Prezidentin rəhbərliyi ilə azad edilmiş ərazilərdə qısa müddətdə onlarla infrastruktur layihəsi icra olunub və olunur, şəhər və kəndlər yenidən qurulur, müasir həyat şəraiti yaradılır. Qarabağ və Şərqi Zəngəzurda həyata keçirilən bu layihələr xalqın illərlə arzuladığı Qayıdışın təməl daşlarıdır.
Ən mühüm hadisələrdən biri 2023-cü ildə Xankəndidə Qarabağ Universitetinin yaradılması oldu. Bu ali təhsil müəssisəsi yalnız təhsil ocağı deyil, eyni zamanda, Azərbaycanın elm və təhsil potensialının simvolu, Qarabağın intellektual dirçəlişinin əsas dayağıdır.
Mədəni dirçəlişin bir nümunəsi də Ağdam Muğam Mərkəzidir. Prezident İlham Əliyev və birinci xanım Mehriban Əliyevanın iştirakı ilə təməli qoyulan bu mədəniyyət ocağında bu gün artıq milli musiqimizin sədaları səslənir. Bu səslər əslində azad torpaqlarda milli ruhun yenidən var olmağının ifadəsidir.
Bu torpaqlarda dini-mənəvi irsin dirçəldilməsi istiqamətində də əhəmiyyətli addımlar atılıb. Şuşada Aşağı Gövhər Ağa məscidi, Ağdam Cümə məscidi, Zəngilan və Suqovuşan məscidləri yenidən qurularaq istifadəyə verilib. Habelə, Xocalı Soyqırımı Memorialının təməlinin qoyulması da tarixi yaddaşın qorunmasına xidmət edən rəmzi hadisə kimi yadda qalıb.
Qarabağ və Şərqi Zəngəzurda sürətli şəkildə yollar çəkilir, elektrik və su xətləri bərpa olunur, məktəblər, xəstəxanalar, mədəniyyət evləri inşa edilir, yaşayış kompleksləri tikilərək ailələrə təhvil verilir. Bu proses bir tərəfdən fiziki infrastrukturun qurulması, digər tərəfdən isə milli ruhun yenidən bərqərar olması deməkdir.
İndi azad olunmuş torpaqlarda - Zəngilanda, Laçında, Şuşada, Cəbrayılda, Ağdərədə, Xocalıda, Füzulidə, Xankəndidə toy-bayram sədası gəlir, insanlar öz xoşbəxt həyatlarını yaşayırlar. Dövlət başçısının səfərləri zamanı bu insanlarla görüşü, onların qayğıları ilə maraqlanması ölkə rəhbərliyinin vətəndaşına olan doğma münasibətinin parlaq göstəricisidir.
Azərbaycanın bu istiqamətdə atdığı hər addım, eyni zamanda, beynəlxalq ictimaiyyətə verilən güclü mesajdır: Qarabağ əbədi Azərbaycan torpağıdır, burada yalnız sülh, inkişaf və rifah olacaq! Prezident İlham Əliyevin bu bölgələrə etdiyi hər səfər tarixdə bir iz buraxır – çünki həmin səfərlər təkcə coğrafi nöqtələrə deyil, həm də tarixin özünə yazılır.
Beləliklə, Zəfərdən başlayan yol bu gün Böyük Qayıdışla davam edir. Hər yeni layihə, hər yeni tikili, hər açılan məktəb və məscid bu torpaqlarda həyatın yenidən qaynadığını, Azərbaycanın güclü və əzmlə irəlilədiyini göstərir. Bu isə yalnız qələbənin deyil, həm də milli birliyin, əzm və iradənin təntənəsidir.
Bölmənin digər xəbərləri
