Zəfərə aparan yolun başlanğıcı - ŞƏRH
27 Sentyabr Azərbaycan xalqının yaddaşında yalnız hücumların başladığı gün kimi deyil, milli iradənin, dövlətçilik əzminin və tarixi ədalətin bərpasına aparan yolun dönüş nöqtəsi kimi yaşayır. Bu tarix Vətən müharibəsində canından keçən qəhrəmanlarımızın xatirəsinə ehtiramın, onların müqəddəs amallarına sədaqətin ifadəsidir.
Böyük Zəfərin memarı olan xilaskar Prezident, Müzəffər Ali Baş Komandan İlham Əliyevin dəfələrlə vurğuladığı kimi, Birinci və İkinci Qarabağ müharibələrinin şəhidlərinin qanı yerdə qalmadı. Azərbaycan xalqının illərlə gözlədiyi tarixi Qələbə məhz şəhidlərimizin fədakarlığı, Azərbaycan Ordusunun qəhrəmanlığı və xalqımızın sarsılmaz birliyi sayəsində mümkün oldu.
AZƏRTAC xəbər verir ki, bu fikirləri Milli Məclisin deputatı Jalə Əliyeva bildirib.
O vurğulayıb ki, Anım Gününün mənası ilk növbədə şəhidlərimizi xatırlamaq, onların həyatını və mübarizəsini gələcək nəsillərə çatdırmaqdır. Deputat daha sonra deyib:
“2020-ci il sentyabrın 27-də başlanan Vətən müharibəsi qəfil meydana çıxmış hadisə deyildi. Azərbaycan torpaqlarının uzun illər işğal altında saxlanılması, yüz minlərlə insanın doğma yurdlarından didərgin salınması, yaşayış məntəqələrinin dağıdılması və beynəlxalq hüququn tələblərinin yerinə yetirilməməsi münaqişənin mahiyyətini təşkil edirdi.
Azərbaycan uzun illər ərzində problemin sülh yolu ilə həllinə çalışdı. BMT Təhlükəsizlik Şurasının 1993-cü ildə qəbul etdiyi 822, 853, 874 və 884 saylı qətnamələri Ermənistan silahlı qüvvələrinin işğal olunmuş Azərbaycan ərazilərindən çıxarılmasını tələb edirdi. Lakin bu qətnamələrin icra olunmaması, danışıqlar prosesinin nəticəsiz qalması və işğalın davam etməsi vəziyyəti dəyişmirdi.
Belə şəraitdə Azərbaycan Ordusunun gücləndirilməsi və ölkənin müdafiə qabiliyyətinin artırılması strateji dövlət siyasətinin mühüm istiqamətinə çevrildi. 2016-cı ilin Aprel döyüşləri və 2020-ci ilin Tovuz hadisələri Azərbaycan xalqının işğalla barışmadığını və ərazi bütövlüyünün bərpasının milli məqsəd olaraq qaldığını göstərdi.
Nəhayət, 27 sentyabr 2020-ci ildə Ermənistan silahlı qüvvələrinin genişmiqyaslı hərbi təxribatına cavab olaraq Azərbaycan Ordusu əks-hücum əməliyyatına başladı. 44 gün davam edən Vətən müharibəsi Azərbaycan tarixinin ən mühüm hərbi-siyasi hadisələrindən biri ilə - tarixi Zəfərlə nəticələndi”.
Deputat qeyd edib ki, bu Qələbənin qiyməti isə son dərəcə ağır oldu. Minlərlə hərbçimiz Vətən uğrunda həyatını itirdi, çoxsaylı hərbçilərimiz yaralandı.
“Anım Gününün dövlət səviyyəsində təsis edilməsi şəhidlərin xatirəsinə verilən yüksək qiymətin göstəricisidir. Hər il sentyabrın 27-də saat 12:00-da ölkə ərazisində bir dəqiqəlik sükutun elan olunması milyonlarla insanın eyni anda şəhidlərimizi yad etməsinə imkan verir.
Lakin şəhidlərin xatirəsini yaşatmaq yalnız bir günlə məhdudlaşmır. Şəhid ailələrinə və qazilərə göstərilən dövlət qayğısı, onların sosial təminatının gücləndirilməsi, müalicəsi, reabilitasiyası və mənzil-məişət problemlərinin həlli bu ehtiramın praktik ifadəsidir.
Vətən müharibəsi iştirakçılarının orden və medallarla təltif edilməsi, şəhidlərin adlarının əbədiləşdirilməsi, Zəfər parkı və muzeyinin yaradılması, Hərbi Qənimətlər Parkının fəaliyyəti də Zəfər tarixinin gələcək nəsillərə çatdırılmasına xidmət edir”, - deyə o əlavə edib.
Deputat qeyd edib ki, bu gün Azərbaycan artıq yalnız keçmişin ağrıları ilə deyil, Zəfərin yaratdığı yeni reallıqlarla da yaşayır. İşğaldan azad edilmiş ərazilərdə genişmiqyaslı bərpa və quruculuq işləri aparılır, keçmiş məcburi köçkünlərin doğma torpaqlarına qayıdışı təmin edilir. Bütün bunların başlanğıcında isə şəhidlərimizin müqəddəs fədakarlığı dayanır.
27 Sentyabr bizə bir daha xatırladır ki, dövlətin gücü yalnız iqtisadi göstəricilərlə və hərbi imkanlarla ölçülmür. Dövlətin əsl gücü xalqın milli iradəsində, birlik və həmrəyliyində, Vətən uğrunda fədakarlığa hazır olan vətəndaşlarında özünü göstərir.
Bu gün üçrəngli Azərbaycan Bayrağının Qarabağda dalğalanması, Şuşada, Xankəndidə, Ağdamda, Füzulidə, Zəngilanda, Qubadlıda, Laçında və digər şəhər və rayonlarımızda həyatın yenidən canlanması şəhidlərimizin arzularının gerçəkləşməsinin ən böyük ifadəsidir.
Şəhidlərimizin xatirəsi əbədidir. Onların qəhrəmanlığı Azərbaycan xalqının milli yaddaşında daim yaşayacaq.
Bölmənin digər xəbərləri
