REGİONLAR
Zəhməti, hünəri və geniş ürəyi ilə çoxlarına nümunə olan fermer xanım – Lənkərandan VİDEOREPORTAJ
Lənkəran, 8 mart, İsmayıl Cəfərli, AZƏRTAC
Ölkəmizdə ülvilik, zəriflik və gözəllik rəmzi olan qadın adı, ana adı həmişə uca tutulub. Azərbaycan qadını bütün dövrlərdə öz istedadı, zəkası, iradəsi və əzmi ilə milli mənəvi dəyərlərimizin qorunub saxlanması və yaşadılmasında müstəsna xidmətlər göstərib. Ağır fiziki qüvvə tələb edən əkin-biçindən söhbət açılarkən ilk olaraq kişilər yada düşsə də, Azərbaycan qadını da hər zaman öz zəhmətkeşliyi ilə seçilib. Respublikamızda fermer təsərrüfatlarında işləyən kişilərlə yanaşı, bu sahədə çalışan fermer xanımlarımız da var. Onlardan biri də Lənkəran sakini Rəftarə Şükürovadır. Bu zəhmətkeş qadın uzun illərdir ki, torpağa mehr salıb, halal zəhmətinə güvənib.
AZƏRTAC xəbər verir ki, 30 ildən çoxdur müəllimlik peşəsi ilə məşğul olan Rəftarə Şükürova 12 ildir ömrünü torpağa, kənd təsərrüfatına bağlayıb. Şəhərdə böyüyüb boya-başa çatan Rəftarə xanım min bir əziyyətlə saldığı bağda daha çox vaxt keçirir, orada böyük həvəslə çalışır: “Lənkəran şəhərində yaşayıram. Hər gün səhər 8-də evdən çıxıb, İstisu qəsəbəsində bağıma gəlirəm, axşam 6-da isə evə qayıdıram. Demək olar ki, günümün çox hissəsini bu bağda keçirirəm. Bağ bir növ mənim həyatımdır. Əlbəttə ki, hər bir işin öz çətinliyi var. Amma onu bilirəm ki, sevərək gördüyün iş çətin deyil. Ümumiyyətlə, təbiəti sevdiyimə görə bu iş mənim üçün çox əzizdir”.
Lənkəran rayonunun İstisu qəsəbəsində yaratdığı “Sitrus vadisi” fermer təsərrüfatında müxtəlif növ sitrus meyvələri yetişdirən Rəftarə Şükürova 15 hektara yaxın torpaq sahəsinin 6 hektarında feyxoa, 3,5 hektarında kivi, 2 hektarında digər sitrus meyvələri, 1 hektarında isə qarışıq meyvə bağları salıb. Dövlət tərəfindən kiçik fermerlərə göstərilən qayğı ona daha da stimul verir: “Bağımızın ərazisi ildən-ilə genişlənir. Sağ olsun, cənab Prezidentimiz. Onun qayğısı ilə ölkəmizin kənd təsərrüfatı hazırda özünün inkişaf dövrünü yaşayır. Dövlətimizin kiçik fermerlərə göstərdiyi dəstək nəticəsində ildən-ilə inkişaf edirik, gəlirlərimiz daha da artır”.
Rəftarə Şükürovanın rəhbərlik etdiyi fermer təsərrüfatı Lənkəran rayonunun qabaqcıl təsərrüfatlarından biridir. Burada yetişdirilən məhsullar əsasən yerli bazarlarda, o cümlədən Bakı şəhərindəki mağazalarda və yarmarkalarda satışa çıxarılır. Həmçinin bağında yetişdirdiyi meyvələrin kompotunu, cemini, mürəbbəsini və turşularını hazırlayaraq “Aqrar Tədarük və Təchizat” ASC-nin layihəsi olan “Kəndən şəhərə” və “Şəhərdən kəndə” layihələri çərçivəsində satışını həyata keçirir. “Mən ötən ildən “Aqrar Tədarük və Təchizat” ASC-nin bir çox layihəsində iştirak edirəm. Onlarla əməkdaşlıq sayəsində məhsullarımızın satışını həyata keçirirəm. Həmçinin paytaxt Bakıda keçirilən yarmarkalarda məhsullarımızı satmaqla bölgəmizi daha da tanıdırıq. Aqroturizm layihəsi çərçivəsində tez-tez qonaqlarımız da olur. Bunların sırasında diplomatik korpusun nümayəndələrini, Bakı məktəblilərini və yerli turistləri qeyd edə bilərəm. Eyni zamanda, Gəncədən və respublikamızın başqa rayonlarından da qonaqlar qəbul edirik. Hər kəs istədiyi vaxt gəlib bağımızın qonağı ola bilər”, - deyə o qeyd edib.
Gözəl ana, həm də nənə olan Rəftarə xanımın 4 nəvəsi var. Zəhməti, hünəri, geniş ürəyi və cəsarəti ilə çoxlarına nümunədir. Necə ki, Rəftarə xanım bol məhsul əldə etmək, məqsədinə çatmaq üçün bağında işləməkdən yorulmur. Dəmir iradəli zərif cinsin nümayəndəsi, həm də bir daha sübut edir ki, kənd adamı üçün yaxşı dolanışıq yeri, firavan yaşamaqdan ötrü ən sərfəli və ən etibarlı iş yeri elə torpaqdır. Torpaq heç zaman borclu qalmır, ona çəkilən zəhmət hədər getmir.