Bakı, 1 noyabr, AZƏRTAC

Mədəniyyət və Turizm Nazirliyinin təşkilatçılığı ilə noyabrın 15-dən 18-dək keçiriləcək Dördüncü Bakı Beynəlxalq Turizm Filmləri Festivalının ikinci günündə “ölkə, region, şəhər” kateqoriyasından filmlər nümayiş etdiriləcək.

AZƏRTAC xəbər verir ki, noyabrın 16-da festivalda Almaniya, Portuqaliya, Ukrayna, Azərbaycan, Rusiya, Birləşmiş Ərəb Əmirlikləri, Xorvatiya, Tailand, Koreya Respublikası, Pakistan, Polşa, Avstriya, Türkiyə, Böyük Britaniya, Yunanıstan, Banqladeş və Rumıniya filmləri göstəriləcək. Azərbaycan “ölkə, region, şəhər” kateqoriyasında Fuad Quliyevin “Azərbaycan. Ecazkar diyar” filmi ilə təmsil olunacaq. Ümumiyyətlə, Dördüncü Bakı Beynəlxalq Turizm Filmləri Festivalında nümayişlər “TV filmləri”, “ölkə, region, şəhər”, “mədəniyyət, ənənə”, “ekoturizm və digər turizm növləri”, “reklam filmləri” kateqoriyalarını əhatə edir.

Nizami Kino Mərkəzində keçiriləcək festivala giriş sərbəstdir.

Festivalın məqsədi turizmin müxtəlif sahələrinə həsr olunan, daxili və beynəlxalq turizmin inkişafına təkan verə biləcək filmləri təbliğ etmək, ən yaxşı filmlərin müəlliflərini həvəsləndirmək, habelə tarixi və mədəni irsin beynəlxalq mərkəzlərindən biri olan Azərbaycanın turizm potensialına diqqəti cəlb etməkdir.