REGİONLAR
Xaçmazda keçirilən işgüzar forumun iştirakçıları torpaq idarəçiliyi ilə bağlı maarifləndiriliblər VİDEO
Xaçmaz, 12 oktyabr, Elxan Yusifli, AZƏRTAC
Oktyabrın 12-də Əmlak Məsələləri Dövlət Komitəsi tərəfindən Xaçmaz şəhərində keçirilən işgüzar forumda yerli icra hakimiyyətinin, bələdiyyələrin, torpaq istifadəçisi olan aidiyyəti dövlət qurumlarının nümayəndələri, iri torpaq mülkiyyətçiləri və KİV əməkdaşları torpaq idarəçiliyi ilə bağlı maarifləndiriliblər.
AZƏRTAC xəbər verir ki, forumda Prezident İlham Əliyevin “Azərbaycan Respublikasında torpaq münasibətlərinin tənzimlənməsi sahəsində əlavə tədbirlər haqqında” Fərmanından irəli gələn vəzifələrdən danışılıb, torpaqlardan istifadəyə və onun mühafizəsinə dövlət nəzarəti tədbirlərinin gücləndirilməsi ilə bağlı görülən tədbirlər barədə məlumat verilib.
Bildirilib ki, Əmlak Məsələləri Dövlət Komitəsi fərmana uyğun olaraq bir sıra işlər həyata keçirir. Komitə torpaq fondunun elmi əsaslarla istifadəsinin təşkili, müasir yanaşmalarla torpaq inzibatçılığının reallaşdırılması, beynəlxalq təcrübədən yararlanaraq torpaqların münbitliyinin, keyfiyyət göstəricilərinin artırılması istiqamətində ardıcıl tədbirlər görür. Regionlarda keçirilən işgüzar forumların məqsədi də məhz torpaqlardan istifadəyə və onların mühafizəsinə dövlət nəzarəti tədbirlərinin səmərəliliyini artırmaq, görülən işləri təkmilləşdirmək, torpaqların təyinatı üzrə istifadəsinin təşkilində ƏMDK-nın fəaliyyətini dövlət orqanları, bələdiyyələr, hüquqi və fiziki şəxslərlə əlaqələndirmək, onların hüquq və vəzifələrini izah etmək, bu barədə ictimaiyyəti məlumatlandırmaqdır.
Diqqətə çatdırılıb ki, Xaçmaz rayonunun həm kənd təsərrüfatının, həm də turizmin inkişafı baxımından torpaqda səmərəli istifadənin təşkili, torpaqların kateqoriyalarına uyğun dəyərləndirilməsi vacib məsələlərdəndir. Ümumilikdə isə ölkə üzrə bu prosesin həyata keçirilməsi, torpaqların məhsuldarlığının artırılması iqtisadi aktivliyin təmin edilməsi baxımından mühüm əhəmiyyət daşıyır. Ölkə başçısının sədrliyi ilə keçən Nazirlər Kabinetinin 2017-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında da bu məsələlərə toxunulub.
Qeyd edilib ki, kənd təsərrüfatının sürətli inkişafı ancaq intensiv metodlardan asılı olacaq. Aqrotexniki tədbirlər, laboratoriyaların qurulması, torpağın düzgün təhlili əsas şərtlərdəndir. Bununla yanaşı, həmin torpaqların təyinatına uyğun istifadəsi də vacibdir. Xaçmaz rayonunun münbit torpaq potensialının genişliyi nəzərə alınsa, bu zaman kənd təsərrüfatı torpaqlarının səmərəli və təyinatına uyğun istifadəsi ön plana keçir. Belə olan halda rayonda aqrar sahənin inkişafı daha da artırılacaq.
Tədbirdə Komitə nümayəndəsi “Torpaq idarəçiliyi və inzibatçılığının prinsipləri, bu sahədə tətbiq olunan yeni yanaşmalar” mövzusunda təqdimatla çıxış edib. Bildirilib ki, yeni yanaşmalar, modern üsullar, innovativ layihələr tətbiq edilməklə torpaq idarəçiliyinin, torpaq bazarının təşkili daha da müasirləşib. Vətəndaşlara torpaqlar ayrılan zaman qanunvericiliyin tələblərinə əməl olunmasının vacibliyi bildirilib, torpaqların təyinatının dəyişdirilməsi qaydaları izah edilib. Qeyd olunub ki, Əmlak Məsələləri Dövlət Komitəsinin rəyi olmadan torpaqlar icarəyə verilə bilməz. Həmçinin torpaq idarəçiliyində yaranan qanun pozuntularının qarşısının alınması, bununla bağlı inzibati xətalar və sanksiyalar izah olunub.
Forumda vurğulanıb ki, Xaçmaz rayonun Xəzər dənizi sahilində yerləşən hissəsinin istifadəsində qanunvericilik tələblərinin qorunması ilə bağlı nəzarət tədbirləri görülür. Sahilboyu 20-50 metrlik hissədə olan torpaq sahələrindən istifadə vəziyyəti ilə bağlı İnzibati Xətalar Məcəlləsinə müvafiq olaraq inzibati tənbeh tədbirləri tətbiq olunur, cinayət əməlləri aşkar edilmiş müvafiq hal üzrə sənədlər aidiyyəti üzrə hüquq mühafizə orqanlarına göndərilir.
Diqqətə çatdırılıb ki, forumun keçirilməsi Komitənin torpaqla bağlı fəaliyyətinin icrasında səmərəliliyin daha da artırılması məqsədi ilə yerli icra hakimiyyətləri, fiziki və hüquqi şəxslər, bələdiyyələr və aidiyyəti dövlət qurumları ilə qarşılıqlı əlaqələrin təşkilində mühüm əhəmiyyət kəsb edir. Belə forumların keçirilməsi müxtəlif istiqamətlərdə əməkdaşlığın reallaşdırılmasına, bu işlərinin daha sıx həyata keçirilməsinə imkan yaradır.
Bildirilib ki, torpaq ehtiyatlarının idarə edilməsinin təkmilləşdirilməsi, vahid torpaq idarəçiliyinin həyata keçirilməsi üçün bütün kateqoriyalı torpaqların elektron uçotu, xəritələşməsi və məlumat bazasının yaradılması istiqamətində də iş aparılır. Ölkə ərazisindəki bütün torpaqlar elektron kadastr uçotuna alınaraq Torpaqların Elektron Uçotu İnformasiya Sistemi yaradılır.
Komitə digər tərəfdən torpaqların düzgün istifadəsini təmin edən, aqrar sahənin inkişafına təkan verən aqroparkların yaradılması istiqamətində də işlər həyata keçirir. Belə ki, yerli icra hakimiyyəti orqanları ilə birlikdə səmərəsiz istifadə olunan torpaqların istifadə vəziyyəti təhlil edilərək geri alınır, təyinatı dəyişdirilir.
Sonda vətəndaşları maraqlandıran, torpaqla bağlı gündəlik qarşılaşdıqları məsələlərə dair suallar dinlənilib, zəruri izahatlar verilib.
Komitə tərəfindən belə maarifləndirici işgüzar forumlar Qazax, Ağdaş, Oğuz, Şamaxı, Cəlilabad, Salyan, Quba, Zaqatala, Qəbələ, Tovuz, Bərdə, Lənkəran və Biləsuvar rayonlarında da keçirilib. Növbəti tədbir Siyəzən rayonunda təşkil ediləcək.