Qax-Zaqatala-Balakən, 16 noyabr, Mustafa Dadaşov, AZƏRTAC

Azərbaycan Prezidenti İlham Əliyevin tövsiyəsinə əsasən “Ölkəmizi tanıyaq” devizi ilə keçirilən maarifləndirici tur-aksiyanın növbəti mərhələsi çərçivəsində Qax, Zaqatala və Balakən rayonlarının məktəblilərindən ibarət qruplar noyabrın 16-da səhər saatlarında Lənkəran-Masallı-Astara marşrutu üzrə respublikamızın cənub bölgəsinə yola salınıblar.

AZƏRTAC xəbər verir ki, tur-aksiyada iştirak edəcək Qax məktəbliləri ilə noyabrın 15-də rayon icra hakimiyyətində görüş keçirilib. Tədbirdə rayon icra hakimiyyətinin başçısı Musa Şəkiliyev dövlətimizin başçısının tövsiyəsi ilə reallaşan tur-aksiyaların əhəmiyyətindən danışıb, belə layihələrin yeniyetmə və gənclərin dünyagörüşlərinin zənginləşməsində mühüm rol oynadığını vurğulayıb.

Görüşdə məktəblilər, həmçinin Azərbaycanın təşəbbüsü ilə reallaşan bir sıra qlobal layihələr barədə də məlumatlandırılıblar. Diqqətə çatdırılıb ki, ulu öndər Heydər Əliyevin rəhbərliyi ilə 1994-cü il sentyabrın 20-də “Əsrin müqaviləsi”nin imzalanması Azərbaycanın yeni neft strategiyasının başlanğıcı hesab olunur. Bu strategiyanı uğurla davam etdirən Prezident İlham Əliyevin iştirakı ilə bu il sentyabrın 14-də Bakıda Heydər Əliyev Mərkəzində imzalanan “Azəri”, “Çıraq” və “Günəşli” yataqlarının birgə işlənməsinə dair saziş isə “Yeni əsrin müqaviləsi” adlandırılır. Yeni müqaviləyə görə, bu yataqlardan 2050-ci ilədək çıxarılacaq neftdən gələn gəlirlər ölkəmizin sosial-iqtisadi inkişafını daha da sürətləndirəcək.

Noyabrın 16-da isə məktəbliləri yola salmaq üçün səhər saatlarından Qax şəhərinin mərkəzindəki meydana toplaşan rayon rəhbərliyi, müəllim və valideynlər tur-aksiya iştirakçılarına tövsiyələrini verir, səfər zamanı necə davranmalı olduqlarını bir daha izah edirdilər.

Yolasalma mərasimində bildirilib ki, məktəbliləri respublikamızın cənub bölgəsində maraqlı ekskursiyalar gözləyir. Onlar dörd gün ərzində Lənkəran, Masallı və Astara rayonlarının tarixi məkanları, muzeyləri ilə yaxından tanış olacaq, bu rayonların görməli yerlərini gəzəcəklər. Bundan əlavə, onların asudə vaxtlarının mənalı və səmərəli keçməsi üçün müxtəlif intellektual oyunların, əyləncəli proqramların təşkili də nəzərdə tutulub.

Şəhər 3 nömrəli tam orta məktəbin 11-ci sinif şagirdi Fəxriyyə Əfəndiyeva, 2 nömrəli tam orta məktəbin 10-cu sinif şagirdi Hüseyn Aşurov və digər məktəblilər aksiyada iştirak etdiklərinə görə böyük sevinc hissi keçirdiklərini bildiriblər.

Tur-aksiya iştirakçılarına hədiyyələr təqdim olunub.

Sonra məktəblilər onlar üçün ayrılmış avtobusa əyləşərək ölkənin cənub bölgəsinə yola düşüblər.

X    X   X

“Ölkəmizi tanıyaq” tur-aksiyasına Zaqatala məktəbliləri də böyük həvəslə qoşulublar.

AZƏRTAC xəbər verir ki, cənub istiqamətində ekskursiyaya yollanan məktəblilərlə bir gün öncə Heydər Əliyev Mərkəzində keçirilən görüşdə rayon icra hakimiyyətinin başçısı Mübariz Əhmədzadə artıq dördüncü ildir uğurla davam edən tur-aksiyaların yeniyetmə və gənclərin vətənpərvərlik, tarixi-mədəni irsimizə hörmət ruhunda tərbiyə olunmasına, onların dünyagörüşünün daha da zənginləşməsinə böyük töhfə verdiyini bildirib. Vurğulanıb ki, ölkəmizin tarixini, mədəniyyətini, müstəqillik illərində qazanılan nailiyyətləri dərindən öyrənmək məqsədi daşıyan bu layihə Prezident İlham Əliyevin yetişməkdə olan gənc nəslin Vətənə məhəbbət ruhunda tərbiyə olunmasına verdiyi böyük önəmin bariz nümunəsidir. İcra hakimiyyətinin başçısı ekskursiyanın məktəblilər üçün çox faydalı olacağına, tur-aksiya iştirakçılarının ölkəmizin cənub bölgəsindən zəngin təəssüratlarla qayıdacaqlarına əminliyini bildirib.

Qeyd olunub ki, Azərbaycanın iqtisadiyyatında qeyri-neft sektorunun, xüsusilə aqrar sahənin çox böyük payı var. İndi ölkədə qeyri-neft sənayesinin inkişafına xüsusi diqqət yetirilir. Bu inkişafın konturları Strateji Yol xəritələrində əksini tapıb. Bu baxımdan məktəblilərin səfər edəcəyi Lənkəran, Astara və Masallı rayonları da Zaqatala rayonu kimi, ölkə iqtisadiyyatında mühüm yerlərdən birini tutur. Cənub bölgəsi sitrus bağları, çay və çəltik plantasiyaları, səfalı məkanları ilə tanınır, tarixi yerləri, özünəməxsus adət-ənənələri ilə seçilir.

Noyabrın 16-da səhər saatlarında Zaqatala şəhərindəki Heydər Əliyev Mərkəzinin qarşısında böyük qələbəlik var idi. Lənkəran-Masallı-Astara marşrutu üzrə ekskursiyaya çıxan məktəbliləri yola salmaq üçün Mərkəzin qarşısına toplaşan rayonun rəhbər işçiləri, müəllim və valideynlər şagirdlərə tövsiyələrini verirdilər.

Məktəblilər əvvəlcə ümummilli lider Heydər Əliyevin abidəsi önünə gül-çiçək düzüb, dahi rəhbərin xatirəsini ehtiramla yad ediblər.

Qrupun rəhbəri, rayon icra hakimiyyətinin nümayəndəsi Sərxan Maqsudov AZƏRTAC-a müsahibəsində deyib: “Məktəblilərin həyatında tarixi bir gündür. Onların əksəriyyəti ilk dəfədir respublikamızın dilbər guşələrinə səyahət edirlər. Gənclər cənub bölgəsinin tarixi məkanlarını, məşhur turizm obyektlərini indiyədək televiziya ekranlarından izləyiblər. İndi isə onlar bu gözəllikləri öz gözləri ilə görəcəklər”.

Zaqatala şəhərindəki 3 nömrəli tam orta məktəbin 10-cu sinif şagirdi Fatimə Bayramova, Əliabad qəsəbə 4 nömrəli tam orta məktəbin 10-cu sinif şagirdi Ümid Madayev və digər məktəblilər gənclərə belə gözəl layihə bəxş etdiyinə görə məktəblilər adından Prezident İlham Əliyevə dərin minnətdarlıqlarını bildiriblər.

Rayon rəhbərliyinin, müəllim və valideynlərin xeyir-duasından sonra məktəblilər onlar üçün ayrılmış avtobusa əyləşərək Lənkəran-Masallı-Astara marşrutu üzrə yola düşüblər.

X   X   X

“Ölkəmizi tanıyaq” devizi ilə keçirilən maarifləndirici tur-aksiyaya 2017-ci il üçün Azərbaycanın Gənclər Paytaxtı seçilən Balakən rayonunun məktəbliləri də böyük sevinc hissi ilə qoşulublar.

AZƏRTAC xəbər verir ki, tur-aksiya çərçivəsində noyabrın 16-da səhər saatlarında rayonun fəal məktəblilərindən ibarət qrup cənub bölgəsinə yola düşüb.

Yolasalma mərasimindən əvvəl rayon icra hakimiyyətində tur-aksiya iştirakçıları ilə rayon rəhbərliyinin görüşü olub.

Tədbirdə çıxış edən rayon icra hakimiyyətinin başçısı İslam Rzayev ekskursiyanın məktəblilər üçün faydalı olacağına, tur-aksiya iştirakçılarının ölkəmizin cənub bölgəsindən zəngin təəssüratlarla qayıdacaqlarına əminliyini bildirib.

Lənkəran-Astara-Masallı marşrutu üzrə ekskursiyaya çıxan Balakən məktəblilərini yola salmaq üçün Mədəniyyət Mərkəzinin qarşısına toplaşan rayonun rəhbər işçiləri, müəllim və valideynlər gənclərə tövsiyələrini veriblər.

Zərifə Əliyeva adına Balakən şəhər 3 nömrəli tam orta məktəbin 10-cu sinif şagirdi Emilya Sodiyeva, şəhər 1 nömrəli tam orta məktəbin 9-cu sinif şagirdi Abdulməcid Mammədov, Gərəkli kənd tam orta məktəbin 11-ci sinif şagirdi Alvina Dibirova tur-aksiyanın digər iştirakçıları olduqca şən görünürdülər. Onlar bu ekskursiyadan çoxlu bilgi, məlumat əldə edəcəklərinə əmindirlər. Məktəblilərin əksəriyyəti ilk dəfədir respublikamızın cənub bölgəsinə səyahət edirlər. Dövlətimizin başçısının təşəbbüsü ilə gerçəkləşən bu layihə sayəsində balakənli məktəblilər tarixi məkanlarla, yeni tikililərlə yaxından tanış ola biləcəklər. Lənkəranda “Qoşa qala” qapıları, Həzi Aslanovun ev-muzeyi, Dairəvi qala, Mayak binası, Hirkan Milli Parkı, Xanbulan gölü, çay plantasiyaları, sitrus meyvə bağları, Astarada şəhər bulvarı, “Yanar bulaq” və “Astaraçay” çay fabriki, Masallıda Tarix-Diyarşünaslıq Muzeyi, Uşaq İncəsənət Məktəbi, Dövlət Rəmzləri Muzeyi, “ASAN həyat” kompleksi və Viləşçay su anbarına ekskursiya şagirdlərin yaddaşında silinməz iz qoyacaq.

Sonra tur-aksiya iştirakçıları onlar üçün ayrılmış avtobusla Lənkəran-Astara-Masallı marşrutu üzrə yola düşüblər.