Qazax, 24 mart, AZƏRTAC

26 ildir müxtəlif ölkələrin pul vahidlərini toplayan Qazax sakininin evi muzeyi xatırladır. Onun bu müddət ərzində yığdığı kağız və metal pullar, o cümlədən medal və yubiley nişanları görənlərin marağına səbəb olur.

AZƏRTAC xəbər verir ki, Qazax şəhər sakini Rəşad Əhmədovun əsas məqsədi yeniyetmə və gənclərə tarixə qovuşan və ya hazırda da istifadə edilən dünyanın pul vahidlərini tanıtmaqdır. Kolleksiyaçı qədim və nadir tapılan pullara üstünlük verir. Deyir ki, pul yığmağa lap kiçik yaşlarından başlayıb. Orta məktəb illərində yaşıdları əlinə düşən pulu tez xərclədiyi halda, o, valideynlərinin ona verdiyi xərclikləri yığıb saxlayıb. Elə bu gün də tarixə qovuşan qədim pulları əldə edərək, kolleksiyasını genişləndirir.

Rəşadın bu həvəsini görən dostlar, tanışlar bu işdə ona xeyli kömək ediblər. Müxtəlif dövlətlərin pul vahidlərinin toplandığı kolleksiyada 50-dək ölkənin 2000-dən çox metal, 500-dən artıq kağız pulu yer alır. “Ən çox yubiley qəpiklərini toplamağı xoşlayıram. Çünki bu qəpiklər mənə çox maraqlı gəlir. Ay ərzində ən azı 3-4 kağız və ya metal pul toplayıram”, - deyə R.Əhmədov bildirib.

Hobbisi barədə danışan kolleksiyaçı səfər etdiyi xarici ölkələrin yeni və qədim pul vahidlərini əldə etməyə çalışdığını deyir. Rəşadın kolleksiyasındakı qəpikləri yığmaq üçün istifadə etdiyi albomları ona xaricdə yaşayan dostları alıb göndərib.

38 yaşlı kolleksiyaçının eksponatları içində əsasən XVIII əsrdən bu yana buraxılan qəpiklər, həmçinin çox az rast gəlinən yubiley pul vahidləri, gümüş, mis və bürünc sikkələr yer alır. Kolleksiyaçı bəzən bir neçə qəpik əldə etmək üçün 100 manatdan çox pul xərclədiyini bildirir. Buna baxmayaraq, dəfələrlə istəyən olsa da, hələ heç bir eksponatını satmayıb.

O, topladığı eksponatların sayını daha da çoxaldaraq nə vaxtsa rayonda sərgi keçirməyi düşünür.