20 Yanvar - qan yaddaşımızdır
Bakı, 18 yanvar (AZƏRTAC). Yanvarın 18-də M.S.Ordubadinin ev-muzeyində 20 Yanvar faciəsi qurbanlarının xatirəsinə həsr olunmuş “20 Yanvar - qan yaddaşımızdır” mövzusunda ədəbi-bədii tədbir keçirilmişdir.
AZƏRTAC xəbər verir ki, Respublika Gənc Turistlər və Diyarşünaslıq Mərkəzinin (RGTDM) təşəbbüsü ilə keçirilən tədbirdə paytaxtın 144 və 45 nömrəli məktəblərinin müəllim və şagirdləri iştirak etmişlər.
Tədbirin əvvəlində şagirdlər Azərbaycanın Dövlət himnini oxumuşlar.
Muzeyin direktoru Lalə Abaszadə, elmi işçisi İradə Vəliyeva, ekskursiyaçı Laçın Mehdiyeva 20 Yanvar faciəsinə ilk olaraq ulu öndər Heydər Əliyev tərəfindən siyasi və hüquqi qiymət verildiyini bildirmişlər.
RGTDM-in direktorunun müavini Arzu Allahverdiyeva, şair Zərəngiz Dəmirçi Qayalı, 144 nömrəli məktəbin müəllimi Zemfira Mehdiyeva və başqaları məktəblilərin Vətənə, torpağa, xalqa və milli dəyərlərimizə hörmət ruhunda tərbiyə edilməsində belə tədbirlərin böyük əhəmiyyəti olduğunu vurğulamışlar.
Sonda 45 nömrəli məktəbin şagirdləri Ülkər İsmayılova və Abutel İsmayıllı 20 Yanvara həsr olunmuş şeirlər söyləmiş, 144 məktəbin 3-cü sinif şagirdləri şəhidlərin xatirəsinə ithaf edilmiş ədəbi-bədii kompozisiya göstərmişlər.
Bölmənin digər xəbərləri
