5 FEVRAL DÖVLƏT BAYRAĞI GÜNÜDÜR
Bakı, 5 fevral (AZƏRTAC). 5 Fevral dövlət bayrağı günüdür. Dövlət bayrağı ölkənin dövlət rəmzlərindən biridir.
Dövlət bayrağı hər birimiz üçün Vətən, millət və dil qədər müqəddəsdir.
Azərbaycan Xalq Cümhuriyyəti Nazirlər Şurasının 1918-ci il 9 noyabr tarixli qərarı ilə qəbul edilmiş dövlət bayrağımızdakı mavi rəng türklük, qırmızı rəng azadlıq, demokratiya və insan hüquqları, yaşıl rəng İslam sivilizasiyasına məxsusluq deməkdir.
1920-ci ilin 28 aprel işğalından sonra bayrağımız dövlət qurumlarının binaları üzərindən ürəklərə köçdü. Xalqımız üçrəngli bayrağı başı üzərində dalğalandırmaq arzusunu uzun illər qəlbində yaşatdı.
1988-ci ildə bədnam ermənilərin Dağlıq Qarabağı Azərbaycandan qoparmaq cəhdi xalqın ayağa qalxmasına səbəb oldu. Noyabrın 17-də Azərbaycan Xalq Cümhuriyyətinin bayrağı Bakının Azadlıq meydanında qaldırılsa da, rəsmi olaraq ilk dəfə Naxçıvan Muxtar Respublikası Ali Sovetinin 1990-cı il 19 yanvar tarixli qərarı ilə bu qurumun binası üzərində ucaldılmışdır. Bu qərar səkkiz gün sonra Azərbaycan SSR Ali Soveti tərəfindən ləğv edilsə də, 1990-cı il noyabrın 17-də Naxçıvan Ali Məclisinin ulu öndər Heydər Əliyevin sədrliyi ilə keçirilən sessiyasında Azərbaycan Xalq Cümhuriyyətinin bayrağı Muxtar Respublikanın rəsmi bayrağı kimi qəbul olundu. Bu qərar üçrəngli bayrağımızın Azərbaycanın dövlət bayrağı kimi qəbul edilməsində mühüm rol oynadı. Belə ki, ölkə ictimaiyyətinin tələbi ilə 1991-ci il fevralın 5-də Azərbaycan SSR-in Ali Soveti Dövlət bayrağı haqqında qanun qəbul etdi və üçrəngli bayrağa Azərbaycan Respublikasının dövlət bayrağı statusu verildi. Həmin il oktyabrın 18-də dövlət müstəqillyini bərpa edən Azərbaycan Respublikası özünü Azərbaycan Xalq Cümhuriyyətinin varisi edərkən, onun dövlət rəmzlərini, o cümlədən dövlət bayrağını da qəbul etdi.
Bu bayrağın önündə ulu öndər Heydər Əliyev, dahi siyasi xadimin ideyalarının sadiq davamçısı, Azərbaycanın dünya dövlətləri sırasında mövqeyini daha da möhkəmləndirən Prezident İlham Əliyev baş əydilər, and içdilər.
“Dövlət bayrağının istifadəsi qaydaları haqqında” qanunun 1.3-cü maddəsində deyilir ki, dövlət “əhali arasında Azərbaycan Respublikası Dövlət bayrağının mahiyyətinin və əhəmiyyətinin geniş təbliğ olunması, gənc nəslin Azərbaycan Respublikasının Dövlət bayrağına hörmət ruhunda tərbiyə edilməsi məqsədi ilə tədbirlər görür”. Bu qanunun tələbinə uyğun olaraq, Azərbaycanın müxtəlif güşələrində bayraq kompleksləri yaradılır. Respublikamızda dövlət bayrağının mahiyyətini və əhəmiyyətini geniş təbliğ etmək və gənc nəsli ona hörmət ruhunda tərbiyə etmək məqsədi ilə tədbirlər görülür.
Bu tədbirlərdən biri də Prezident İlham Əliyevin 2007-ci il 17 noyabr tarixli Sərəncamı ilə Bakı şəhərində Dövlət bayrağı meydanının yaradılmasıdır. Sərəncamda dövlət bayrağının Azərbaycan Respublikasının müstəqilliyini təcəssüm etdirən rəsmi dövlət rəmzi olması vurğulanır və hər bir vətəndaşın üçrəngli bayrağımıza ehtiram göstərməsi müqəddəs borc kimi vurğulanır. Sənəddə deyilir: “Azərbaycan əsgəri Vətənin suverenliyinin və ərazi bütövlüyünün qorunması ilə bağlı ali missiyanı öz üzərinə götürərkən dövlət bayrağına and içir. Dövlət bayrağının Azərbaycan Respublikasının dövlət qurumlarının və diplomatik nümayəndəliklərinin binaları üzərində dalğalanması, ən mötəbər məclislərdə və mərasimlərdə, rəsmi tədbirlərdə və yarışlarda qaldırılması hər bir azərbaycanlının qəlbini qürur hissi ilə doldurur”.
Sərəncamda Dövlət bayrağı meydanının yaradılmasının iki zərurətdən irəli gəldiyi də vurğulanmışdır. Bunlardan birincisi, dövlət bayrağının Azərbaycan vətəndaşlarının milli həmrəyliyinin, vahid məfkurə ətrafında sıx birləşmələrinin başlıca amillərindən biri olmasıdır. İkincisi isə, dövlət bayrağının təbliğinin daim diqqət mərkəzində saxlanılmasıdır.
Ölçüsü 35x70 metr olacaq və 162 metr hündürlükdə dalğalanacaq bayrağımız daim hər kəsin diqqətini çəkəcəkdir.
Böyük iftixarla öpüb altından keçdiyimiz dövlət bayrağımızın müqəddəsliyini və zərb-məsələ çevrilmiş bu sözləri heç vaxt unutmamalıyıq: “Bayraqları bayraq edən üstündəki qandır, Torpaq əgər uğrunda ölən varsa, Vətəndir”.
Albina Atlıxanova
AZƏRTAC-ın müxbiri
######
Bölmənin digər xəbərləri
