SİYASƏT
Naxçıvan şəhərində 5 nömrəli yaşayış binası istifadəyə verilib
Bu gün Naxçıvan Muxtar Respublikasının paytaxtı Naxçıvan şəhəri müasir şəhərsalma prinsipləri əsasında qurulur. Həyata keçirilən quruculuq tədbirləri zamanı tarixiliklə müasirlik vəhdətdə götürülür, yeni inzibati binalar, sosial obyektlər tikilərək istifadəyə verilir. İctimai yaşayış binalarının yenidən qurulması, əhalinin kommunal-məişət şəraitinin yaxşılaşdırılması da aparılan tikinti-quruculuq işlərinin tərkib hissəsidir. Bu sahədə həyata keçirilən tədbirlərin davamı olaraq şəhərin Atatürk küçəsindəki 5 nömrəli yaşayış binası əsaslı şəkildə yenidən qurulub.
Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirilib ki, noyabrın 14-də Ali Məclisin Sədri Vasif Talıbov yaşayış binasının açılışında iştirak edib.
Tədbirdə çıxış edən Naxçıvan Şəhər İcra Hakimiyyətinin başçısı Vüqar Səfərov deyib ki, Naxçıvan Muxtar Respublikası Ali Məclis Sədrinin 2014-cü il 31 yanvar tarixli sərəncamı ilə təsdiq edilmiş “2014-2015-ci illərdə Naxçıvan şəhərinin sosial-iqtisadi inkişafı üzrə Proqram”a əsasən muxtar respublikanın paytaxtında kompleks quruculuq işləri aparılır. Bu da Naxçıvan şəhərinə xüsusi gözəllik bəxş etməklə yanaşı, eyni zamanda, sakinlərin rahat yaşayışına şərait yaradır. “Muxtariyyət ili”ndə Naxçıvan şəhərində yeni yaşayış kompleksi və 2 yaşayış binası tikilərək, 7 ictimai yaşayış binası isə yenidən qurularaq istifadəyə verilib. Hazırda şəhərin Heydər Əliyev prospektində, İstiqlal, Atatürk, Kazım Talıblı, İdris Məmmədov küçələrində və Babək məhəlləsində ictimai yaşayış binalarının, Əziz Əliyev küçəsində yaşayış kompleksinin tikintisi, 4 binada isə yenidənqurma işləri davam etdirilir. İcra başçısı Naxçıvan şəhərinin inkişafına göstərilən qayğıya görə minnətdarlığını bildirib.
Yeni binada mənzillə təmin olunanlar adından danışan Sevinc Abbasova deyib ki, muxtar respublikada həyata keçirilən abadlıq-quruculuq işlərinin mərkəzində insan amili dayanır. Bu gün sakinlərin hər cür şəraiti olan mənzillərlə təmin edilməsi də bu sahədə görülən işlərin davamıdır. Şəhər sakini Sevinc Abbasova mənzillərlə təmin olunanlar adından minnətdarlıq edib.
Naxçıvan Muxtar Respublikası Ali Məclisinin Sədri Vasif Talıbov sakinləri salamlayıb, onları yeni mənzillərlə təmin olunmaları münasibətilə təbrik edərək deyib: Muxtar respublikada bütün sahələrdə quruculuq tədbirləri həyata keçirilir, müasir infrastruktur yaradılır. Bu işlər əhalinin mənzil şəraitinin yaxşılaşdırılması istiqamətində də davam etdirilir. Hər il muxtar respublikada onlarla yeni ictimai yaşayış binası tikilərək və ya yenidən qurularaq sakinlərin istifadəsinə verilir.
Ali Məclisin Sədri deyib: Mənzil insan həyatında vacib məsələdir. Hər bir ailənin rahat yaşayışı həm də onun mənzil şəraitindən asılıdır. Ona görə də muxtar respublikada insanların rahat mənzillərlə təmin olunmasına xüsusi diqqət yetirilir, yeni yaşayış binalarının tikilməsi istiqamətində ardıcıl tədbirlər həyata keçirilir. Noyabrın 11-də Şərur rayonunda sakinlərə 20 mənzilin təqdim olunması, bu gün isə Naxçıvan şəhərində 25 mənzilli binanın istifadəyə verilməsi, ailələrin mənzil şəraitin yaxşılaşdırılması dövlətimizin insan amilinə göstərdiyi qayğının daha bir ifadəsidir. Bütün bunlara dövlət müstəqilliyi, ölkəmizdəki mövcud inkişaf və sabitlik, ən əsası isə ümummilli lider Heydər Əliyevin quruculuq xəttinin uğurla davam etdirilməsi nəticəsində nail olunmuşdur.
Ali Məclisin Sədri Naxçıvan şəhərinin gözəl guşələrindən birinə çevrilən bu ərazidə abadlığın qorunub saxlanılacağına əminliyini bildirib, mənzillərin orderlərini sakinlərə təqdim edib, onlara firavan həyat arzulayıbdır.
Sonra Ali Məclisin Sədri binada yaradılan şəraitlə tanış olub.
Məlumat verilib ki, 1920-ci ildə inşa edilən bina yenidən qurularkən ona bir mərtəbə də əlavə olunub, mənzillərin hər birinin sahəsi 30 kvadratmetr artırılıb. Hazırda burada 25 mənzil vardır. Mənzillərdən 2-si ikiotaqlı, 21-i üçotaqlı, 2-si isə dördotaqlıdır. Binanın həyətində 16 tonluq su çəni qoyulub, mənzillərdə fərdi istilik sistemi quraşdırılıb.
Binanın birinci mərtəbəsində fəaliyyət göstərən 13 mağaza da yenidən qurulub, yeni gözəllik salonu istifadəyə verilib. Burada milli geyimlərimizin və müxtəlif mərasim libaslarının hazırlanması və satışı da həyata keçiriləcək.
Binanın həyətində 24 yerlik avtomobil dayanacağı yaradılıb və uşaq əyləncə qurğuları qoyulub.