Daşkəsən, 17 mart, AZƏRTAC

Martın 17-də Daşkəsən şəhərində Heydər Əliyev mərkəzinin qarşısındakı meydanda Novruz bayramı münasibətilə ümumxalq şənliyi təşkil olunub.

AZƏRTAC xəbər verir ki, ümummilli lider Heydər Əliyevin abidəsi önündə uşaqlar Ulu Öndərə, Vətənə həsr olunmuş şeirlər söyləyib, milli geyimli qız Novruzun rəmzi olan səmənini tədbirə qatılan Daşkəsən rayon İcra hakimiyyətinin başçısı Əhəd Abıyevə təqdim edib.

Daşkəsən rayon İcra hakimiyyətinin başçısı Əhəd Abıyev çıxış edərək mərasim iştirakçılarına bayram münasibəti ilə təbriklərini çatdırıb.

Ümummilli lider Heydər Əliyevin “Novruz bayramı insanlarda həmişə xoş əhval-ruhiyyə yaradır, milli ruhu yüksəldir, vətənpərvərlik hissiyyatlarını daha da möhkəmləndirir və hər bir insanı Vətəninə, millətinə, ölkəsinə, doğma dövlətinə daha da sadiq olmağa dəvət edir. Bu bayram Azərbaycanın dövlət müstəqilliyinin və milli azadlığının rəmzidir. Bu bayram əmin-amanlığın, ictimai-siyasi sabitliyin rəmzidir. Bu bayram ölkəmizdə gedən hüquqi, demokratik, dünyəvi, sivil dövlət quruculuğunun rəmzidir”, - fikirlərini xatırladan Əhəd Abıyev qeyd edib ki, Novruz Azərbaycan xalqının ən qədim el bayramı, milli birliyimizin təcəssümüdür. Xalqımız Novruz bayramını qeyd etməklə, həm də öz tarixi keçmişinə, milli dəyərlərinə bağlılığını nümayiş etdirir.

Daşkəsən rayon İcra hakimiyyətinin başçısı bildirib ki, ulu öndər Heydər Əliyevin Azərbaycana rəhbərliyinin bütün dövrlərində milli dəyərlərimiz həmişə uca tutulub, onlar qorunub saxlanılmaqla yanaşı, həm də inkişaf etdirilib. Bu gün Ulu Öndərin milli dəyərlərimizin yaşadılması ilə bağlı siyasəti Prezident İlham Əliyev tərəfindən uğurla davam etdirilir. Azərbaycan Prezidenti İlham Əliyevin məqsədyönlü fəaliyyəti sayəsində müstəqil Azərbaycan və milli dəyərlərimiz beynəlxalq aləmdə tanınır və qəbul edilir. UNESCO-nun Novruz bayramını dünya xalqlarının qorunan qeyri-maddi mədəni irsi siyahısına daxil etməsi, Birləşmiş Millətlər Təşkilatı Baş Məclisinin isə Novruz bayramını - martın 21-ni Beynəlxalq Novruz Günü elan etməsi milli dəyərlərimizin dünya miqyasında təsdiqinin ən gözəl nümunəsidir. Bu işlərdə isə mədəni irsimizin ən böyük qayğıkeşi Azərbaycanın birinci xanımı, Heydər Əliyev Fondunun prezidenti Mehriban xanım Əliyevanın xidmətləri əvəzedilməzdir.

Azərbaycanın son illər dinamik iqtisadi inkişafından, ordumuzun günü-gündən artan hərbi qüdrətindən, əhalinin ildən-ilə yüksələn sosial rifah halından, xarici siyasətdə qazanılan uğurlardan bəhs edən Əhəd Abıyev bildirib ki, Prezident İlham Əliyevin birbaşa qayğısı sayəsində Daşkəsənin sosial, iqtisadi, mədəni siması tamamilə dəyişib. Belə ki, ötən il rayonda geniş quruculuq-abadlıq işləri davam etdirilib, yeni inzibati binalar tikilib. Ə.Abıyev qeyd edib ki, rayonda artıq su və kanalizasiya ilə bağlı irimiqyaslı layihəyə də start verilib: “Layihənin reallaşması nəticəsində hər birimizin evində təmiz şəffaf su olacaq, eyni zamanda, 300 nəfər yeni işlə təmin ediləcək. Dövlət tərəfindən bu layihənin həyata keçirilməsinə 30 milyon dollar vəsait ayrılıb. Bu xoş gündə onu da nəzərinizə çatdırmaq istəyirəm ki, yaxın günlərdə Çovdar qızıl zavodu istifadəyə veriləcək. Bu zavodun işə düşməsi ölkəmizin iqtisadi həyatında mühüm hadisə olmaqla, biz daşkəsənlilərin həyatına da öz töhfəsini verəcək. Belə ki, işə başladıqdan sonra bu zavodda yüzlərlə yeni iş yerləri açılacaq”.

Sonra bayram tonqalı yandırılıb.

Şənlik çərçivəsində meydanın ətrafındakı geniş ərazidə ictimai-iaşə xidməti, yerli məhsulların və müxtəlif sənətkarların əl işlərinin satışı da təşkil edilib. İştirakçılara rayonda hazırlanan müxtəlif növ milli yeməklər və şirniyyatlar təklif olunurdu.

Bayram şənliyi yerli mədəniyyət və incəsənət ustalarının ifasında bir-birindən maraqlı çıxışlarla davam etdirilib.

Rayon mərkəzində bayram şənliyi başa çatdıqdan sonra Daşkəsən Rayon İcra Hakimiyyətinin kollektivi və rayon ictimaiyyətinin nümayəndələri cəbhə xəttində yerləşən “N” saylı hərbi hissənin əsgər və zabit heyəti ilə görüşüb. Əsgərlərə Daşkəsən Rayon İcra Hakimiyyətinin, rayon ictimaiyyətinin və Respublika Hərbi Prokurorluğunun Novruz sovqatları təqdim olunub.

Görüş Daşkəsən rayon mədəniyyət və incəsənət ustalarının konsert proqramı ilə davam edib.

Cəbhə xəttindəki bayram görüşündə Daşkəsən rayon İcra hakimiyyətinin başçısı Əhəd Abıyev, Respublika Hərbi Prokurorluğunun məsul vəzifəli nümayəndəsi, polkovnik Mahir Əhmədov və başqaları iştirak ediblər.