ELM VƏ TƏHSİL
AMEA-nın Gənc Alim və Mütəxəssislər Şurası yubiley tədbirinə hazırlaşır
Bakı, 15 oktyabr, AZƏRTAC
Azərbaycan Milli Elmlər Akademiyası (AMEA) Gənc Alim və Mütəxəssislər Şurasının İdarə Heyətinin növbəti iclası keçirilib.
AMEA-dan AZƏRTAC-a bildirilib ki, tədbiri şuranın sədri, fizika üzrə fəlsəfə doktoru, dosent Famin Salmanov açaraq gündəlikdə duran məsələlər barədə iştirakçılara məlumat verib. Bildirib ki, cari ilin dekabr ayında Gənc Alim və Mütəxəssislər Şurasının fəaliyyətə başlamasının 5 ili tamam olacaq və bununla əlaqədar şura tərəfindən ictimaiyyətə hesabat veriləcək, həmçinin görülən işlər buklet şəklində nəşr ediləcək.
F.Salmanov şuranın ötən dövr ərzində AMEA-nın elmi-ictimai fəaliyyətində, akademiya rəhbərliyinin elmi gəncliklə bağlı müəyyənləşdirdiyi strategiyanın həyata keçirilməsində mühüm rol oynadığını söyləyib.
Sədr noyabr ayında ənənəvi olaraq hesabatların dinləniləcəyini vurğulayıb, institutlar üzrə yerli şuraların hesabatları vaxtında hazırlayaraq müvafiq bölmə katiblərinə təqdim etmələrini tapşırıb.
F.Salmanov Gənc Alim və Mütəxəssislər Şurasının əsasnaməsinə uyğun olaraq institut və təşkilatlarda səlahiyyət müddəti başa çatmış yerli şuralara seçkilərin keçirilməsinin, yaş senzinin nəzərə alınmaqla idarə heyətlərinin tərkibinin yenilənməsinin, xüsusilə magistrant və doktorantlara üstünlük verilməsinin zəruriliyini bildirib.
Daha sonra AMEA-nın Molekulyar Biologiya və Biotexnologiyalar İnstitutunun Gənc Alim və Mütəxəssislər Şurasının sədri, biologiya üzrə fəlsəfə doktoru Ulduzə Mehvalıyeva, Folklor İnstitutunun Gənc Alim və Mütəxəssislər Şurasının sədri, filologiya üzrə fəlsəfə doktoru Nail Qurbanov və digərləri çıxış edərək gündəliyə çıxarılan məsələlər barədə fikir və təkliflərini söyləyiblər.