Bakı, 19 noyabr, AZƏRTAC

Azərbaycan Tibb Universitetinin (ATU) Tədris Cərrahiyyə Klinikasının (TCK) hesabat iclası keçirilib.

Klinikadan AZƏRTAC-a bildiriblər ki, tədbirdə klinika direktoru, professor Surxay Hadıyev TCK-nın fəaliyyətinin qiymətləndirilməsi, əldə olunan nailiyyətlərin paylaşılması, çatışmazlıqların aradan qaldırılması baxımından bu cür tədbirlərin əhəmiyyətini vurğulayıb.

Professor S.Hadıyev qeyd edib ki, artıq hər bir şöbə ayrı-ayrılıqda aylıq hesabatlar təqdim edəcək. İlin sonunda isə bütün şöbələrdən daha geniş həcmli təqdimatlar hazırlayacaq. Bu zaman aparılan klinik işlərlə yanaşı, tədrisyönümlü fəaliyyətlə bağlı hesabat da sənəddə əks olunacaq.

Klinikanın baş həkimi, professor Ramiz Poluxov çıxışında bildirib ki, səhiyyəmizin inkişafının əsas istiqamətlərindən biri də tibbi təhsil və kadr hazırlığıdır: “Bu sahədə də səhiyyəmizin dünya standartları üzrə inkişaf etməsi, onun qabaqcıl ölkələrinin səhiyyə sisteminə inteqrasiya etməsi üçün ardıcıllıqla əhəmiyyətli tədbirlər görülür. Həkimlərimizin müasir tibb elminin inkişafı ilə ayaqlaşmaları və onların son nailiyyətlərdən xəbərdar olmalarını təmin etmək üçün bu təhsil növünün ölkəmizdə də inkişaf etməsi bu günün tələbidir”.

Baş həkim, həmçinin Azərbaycanda Davamlı Tibbi Təhsilin (DTT) tətbiqi ilə bağlı təfərrüatları, bal kredit sisteminin yaradılması haqqında məlumat verib. Qeyd edilib ki, DTT praktik tibb fəaliyyəti ilə məşğul olan həkimlərin bilik, bacarıq və peşəkar vərdişlərinin inkişaf etdirilməsinə yönəldilmiş təhsil prosesidir. Üsuldan asılı olmayaraq, DTT-nin zəruri miqdarının hesablanması kreditlər vasitəsilə həyata keçirilir. DTT krediti DTT-nin məzmununa və həcminə uyğun olaraq onun mənimsənilməsinə ayrılan vaxtın ölçü vahididir.

Sonra klinikanın şöbələrinin hesabatları dinlənilib.

Hesabata əsasən klinikanın qulaq, burun, boğaz cərrahiyyəsi şöbəsində bu ilin 10 ayı ərzində 4900 xəstə müayinə edilib. Stasionar xəstə sayi isə 479 olub. Bu müddət ərzində şöbədə 471 əməliyyat həyata keçirilib.

Klinikanın üz-çənə cərrahiyyəsi şöbəsinin hesabatına görə burada 10 ay ərzində 2406 xəstəyə konsultasiya, ambulator və stasionar xidmət göstərilib, 415 nəfər əməliyyat olunub. 24 çarpayı sayı olan şöbədə ümumi 10 xəstə konservativ müalicə alıb. 579 xəstəyə ambulator cərrahi xidmət göstərilib.

Plastik və estetik cərrahiyyə şöbəsinin hesabatında qeyd edilib ki, şöbə yeni fəaliyyətə başlasa da, bu müddət ərzində ümumilikdə 233 əməliyyat icra olunub. Şöbədə artıq kosmetoloq da fəaliyyət göstərir.

Sonun klinikanın direktoru və baş həkimi şöbələrin fəaliyyətinə dair təklif və iradlarını bildirdilər.