RƏSMİ XRONİKA
AZƏRBAYCANIN BAŞ NAZİRİ İLHAM ƏLİYEV LƏNKƏRANDA OLMUŞDUR
ASTARA RAYON AĞSAQQALLAR ŞURASININ SƏDRİ HAMLET ƏLİYEVİN ÇIXIŞI
Hörmətli mərasim iştirakçıları!
Bu gün bütün Azərbaycan xalqı kimi, cənub bölgəsinin zəhmətkeşləri də böyük toy-bayram içərisindədir. Xalqımız qarşıdan gələn böyük el bayramı - prezident seçkiləri ərəfəsindədir. Bu münasibətlə bölgəmizin əməksevər insanları xalqımızın böyük, müdrik oğlu Heydər Əliyevin siyasətinin layiqli davamçısı ilə görüşə toplaşmışlar. Hamının üzündə böyük sevinc və fərəh vardır. Başqa cür ola da bilməz. Tarixi həqiqətdir ki, hər bir xalqı, dövləti ona rəhbərlik edən müdrik şəxsiyyətə görə tanıyır və hörmət edirlər. Ulu Tanrının XX əsrdə Azərbaycan xalqına bəxş etdiyi dünya şöhrətli siyasətçi Heydər Əliyev də məhz belə tarixi şəxsiyyətlərdəndir. 1969-cu ildə onun respublikaya rəhbərliyə başladığı vaxtdan ölkəmiz qısa müddət ərzində əsrlərə bərabər yol keçmişdir. Ölkədə güclü sənaye və kənd təsərrüfatı potensialı yaradıldı, Azərbaycan gerilikdən inkişaf zirvəsinə qalxdı. Yüzlərlə sənaye obyekti, kənd təsərrüfatı məhsullarını emal müəssisələri, çoxlu yaşayış binaları, sosial obyektlər tikilib istifadəyə verildi. Elmin, təhsilin, mədəniyyətin, səhiyyənin inkişafı sahəsində nəhəng işlər görüldü. Budur ölkə rəhbərinin xalqa bəxş etdiyi böyük səadət və göstərdiyi xidmət!
1993-cü ilin iyun ayından Heydər Əliyevin yenidən Azərbaycan xalqına, dövlətinə rəhbərlik etməyə başlaması Ulu Tanrının böyük hökmü, zamanın tələbi, xalqın istək və arzusu idi. Gəlin, bir anlığa bu dövrə qədər olan vəziyyətə nəzər salaq. Hər yerdə xaos, anarxiya, özbaşınalıq hökm sürürdü. Ölkə parçalanırdı, xalq isə ümidsizlik içərisində idi. Məhz belə bir şəraitdə xalqımızın müdrik oğlu öz qayıdışı ilə milləti böhran və iflic vəziyyətindən çıxardı və tərəqqiyə doğru apardı. Onun rəhbərliyi sayəsində qısa müddət ərzində ölkədə əmin-amanlıq, sabitlik yaradıldı. Bu gün onun başçılığı ilə Azərbaycanda möhkəm dövlət qurulmuş, güclü ordu yaradılmışdır. Ən başlıcası isə, ölkədə qayda-qanun, nizam-intizam hökm sürür.
Heydər Əliyevin atalıq qayğısı sayəsində bütün ölkədə olduğu kimi, cənub bölgəsi də böyük inkişaf və tərəqqi yolu keçdi. Burada onlarca sənaye müəssisəsi, o cümlədən çay fabrikləri, süd zavodları, digər emal müəssisələri tikilib zəhmət adamlarının istifadəsinə verildi. Cənub bölgəsinin əhalisi bu atalıq qayğısına görə möhtərəm Prezidentimiz Heydər Əliyevə öz dərin hörmət və ehtiramını bildirir.
İndi Astara da gündən-günə inkişaf edir. Qısa müddət ərzində daxili imkanlar hesabına onlarca yeni obyekt tikilib istifadəyə verilmişdir. Baxımsızlıq üzündən öz görkəmini itirmiş neçə-neçə bina yüksək zövqlə təmir edilmişdir.
Heydər Əliyevin xidməti həm də ondadır ki, o, xalqımıza, Vətənimizə Sizin kimi şəxsiyyət bəxş etmişdir. Siz bu gün artıq öz xeyirxah əməllərinizlə, həyata keçirdiyiniz tədbirlərlə xalqın sevimlisinə çevrilmisiniz. Öz xalqına arxalanan, Vətənini sevən hər bir rəhbəri xalq ürəkdən sevir, bir şəxsiyyət kimi ona hörmət bəsləyir. Siz artıq bu xalqın sevimlisisiniz. Ölkənin hörmətli Baş nazirisiniz. Azərbaycan xalqı öz gələcəyini Sizinlə bağlayır. Məhz Sizin təşəbbüsünüzlə, xeyirxah əməllərinizlə ölkəmizin 32 rayonu sırasında Astara rayonu da mavi yanacaqla təmin olundu. Rəhbərliyiniz sayəsində müasir tələblərə cavab verən möhtəşəm idman kompleksləri tikilib istifadəyə verilmişdir. Xarici siyasət sahəsindəki fəaliyyətiniz ölkəmizin nüfuzunu qat-qat artırmışdır. Bu gün dünyanın ayrı-ayrı ölkələrinin dövlət başçıları tərəfindən Sizin hörmətlə qəbul edilməyiniz, şərəfinizə deyilən hər bir xoş söz Azərbaycan xalqını sevindirir. Sizə göstərilən bu hörmət və ehtiram xalqımıza, dövlətimizə hörmətin təntənəsidir. Astaralılar bu gün artıq öz seçimini etmişlər. Respublikamızın ayrı-ayrı bölgələrində Sizin şərəfinizə ucalan alqış səsləri xalqın sonsuz məhəbbətinin təzahürüdür. 15 oktyabr prezident seçkiləri günü hamı bir nəfər kimi ən layiqli namizədimizə səs verəcəkdir.
Hörmətli cənab Baş nazir, icazə verin, Astara rayonunun bütün ağsaqqalları, ahılları, zəhmət adamları adından Sizə möhkəm cansağlığı, ölkəmizin, xalqımızın gələcəyi naminə fəaliyyətinizdə böyük uğurlar diləyim.
Xalqımızın müdrik oğlu, el ağsaqqalı cənab Heydər Əliyevə və onun siyasətinin layiqli davamçısı İlham Əliyevə eşq olsun!