RƏSMİ XRONİKA
AZƏRBAYCAN PREZİDENTİ HEYDƏR ƏLİYEV ABŞ-IN ENERGETİKA NAZİRİ XANIM O’LİRİ İLƏ GÖRÜŞMÜŞDÜR
ABŞ nazirini salamlayan Prezident Heydər Əliyev Azərbaycanın neft yataqlarından müştərək istifadə olunması ilə əlaqədar görülən tədbirlərdən, “Əsrin müqaviləsi”nin imzalanmasından ötən bir il ərzində işlərin normal getməsindən razılıqla söhbət açdı. Xanım o’Lirinin Azərbaycana səfərindən məmnun olduğunu bildirən Heydər Əliyev dedi ki, sizinlə apardığımız danışıqlardan sonra neft müqaviləsinin yerinə yetirilməsi sahəsində iş daha da canlanıb və oktyabrın 9-da konsorsiumun beynəlxalq rəhbər komitəsi ilkin neftin ixracı üçün iki neft kəmərinin çəkilməsi barədə çox mühüm bir qərar qəbul edib. Azərbaycan rəhbəri dedi ki, biz həmin qərarı qəbul edərkən ABŞ dövlətinin və Prezident Bill Klintonun arzularını da nəzərə aldıq. Prezident Heydər Əliyevin fikrincə, ABŞ-la Azərbaycan arasında əlaqələrin inkişaf etdirilməsi üçün imkanlar çoxdur və bunlardan hərtərəfli istifadə olunmalıdır.
Dövlətimizin başçısını diqqətlə dinləyən xanım o’Liri iki neft kəməri barədə qərara görə respublikamızın rəhbərini təbrik edərək dedi ki, bütün Amerikada bunun ən məqsədəmüvafiq bir qərar olduğunu yaxşı bilirlər. İlkin neft kəmərləri haqqında qərarın məhz Heydər Əliyevin şəxsi qətiyyəti və səyləri nəticəsində qəbul olunmasından razılıqla söhbət açan nazir öz ölkəsi adından dövlətimizin başçısına bir daha minnətdarlığını bildirdi. Xanım o’Lirinin rəyincə, bu addım dövlətlərimiz arasındakı münasibətlərin daha da yaxşılaşdırılmasında mühüm rol oynayacaqdır.
“Qarabağ” neft yatağının birgə işlənməsi barədə “Pennzoyl” şirkəti ilə bağlanacaq müqavilənin imzalanması mərasimində onun müavininin iştirak edəcəyindən söhbət açan xanım o’Liri əmin olduğunu bildirdi ki, Prezident Heydər Əliyevin köməyi ilə bu iş də müvəffəqiyyətlə başa çatacaqdır.
Nazir dedi ki, Amerika hökuməti Prezident Heydər Əliyevin həyata keçirdiyi bütün tədbirləri bəyənir və dəstəkləyir. O bildirdi ki, Prezident Heydər Əliyevin rəhbərliyi ilə Azərbaycanda parlament seçkilərinin də demokratik qaydada keçiriləcəyinə ABŞ-da möhkəm inanırlar. Nazir Xəzərin statusunun müəyyənləşdirilməsi işində də Amerikanın Azərbaycana həmişə dəstək verəcəyini vurğuladı.
Bütün bunlara görə xanım o’Liriyə təşəkkürünü bildirən Heydər Əliyev ABŞ Prezidenti Bill Klintonla qarşıdakı görüşündən söhbət salaraq dedi: Mən inanıram ki, bu görüş ölkələrimizin münasibətlərinin inkişafında əvəzsiz rol oynayacaqdır.
Dövlətimizin başçısı xanım o’Lirini Azərbaycana rəsmi səfərə dəvət etdi. Dəvət məmnuniyyətlə qəbul olundu.