REGİONLAR


Abşeron rayonunda sakinlərlə silsilə görüşlər davam edir

Xırdalan, 7 may, Ətrabə Rzayeva, AZƏRTAC

Müzəffər Ali Baş Komandan, Prezident İlham Əliyevin rəhbərliyi ilə xalqımızın qələbə qazandığı 44 günlük Vətən müharibəsi zamanı qəhrəmanlıqla döyüşərək şəhidlik zirvəsinə ucalmış abşeronlu igidlər, onların ailə üzvləri və qazilər Ramazan bayramı ərəfəsində yad edilib.

AZƏRTAC xəbər verir ki, bununla əlaqədar olaraq Abşeron Rayon İcra Hakimiyyətinin başçısı Abdin Fərzəliyev, hüquq-mühafizə orqanlarının rəhbərləri, icra nümayəndəlikləri, YAP Abşeron Rayon Təşkilatının sədri, şəhid ailələri İkinci Fəxri xiyabana, Xırdalan şəhərində yerləşən Şəhidlər xiyabanına və o cümlədən rayonun kənd və qəsəbələrinə gedərək vətənimizin bütövlüyü uğrunda canından keçmiş bütün şəhidlərimizin məzarlarını ziyarət edərək abidələri üzərlərinə tər çiçəklər düzüb, ruhlarına dualar oxuyublar.

Bildirilib ki, xalqımızın Prezidentimizin ətrafında sıx birləşməsi, Azərbaycan Ordusunun döyüş əzmi, şəhidlərimizin və qazilərimizin şücaəti sayəsində 30 illik vətən həsrətinə son qoyulub, torpaqlarımız düşmən tapdağından azad edilib. Azərbaycanın qüdrətli orduya malik olduğu qeyd edilərək bundan sonra vətənimizə qarşı yönələ biləcək bütün təxribatların qarşısı yerindəcə məhv ediləcəyi vurğulanıb. Ölkəmizdə şəhid ailələrinə və qazilərə, ümumilikdə müharibə iştirakçılarına dövlət səviyyəsində böyük diqqətin göstərildiyi, onların həyatlarının hər bir anında ölkə Prezidenti İlham Əliyevin və Birinci vitse-prezident Mehriban xanım Əliyevanın qayğısını hiss etdikləri bildirilib.

Xalqımızın bütün bayram və şad günlərində şəhid ailələrinin və qazilərin diqqətdə saxlanılacağı önə çəkilərək Abşeron rayonunda onlara bundan sonra da daimi olaraq qayğının göstəriləcəyi qeyd edilib. Rayon başçısı şəhid ailələri ilə görüşərək onların qayğıları və problemləri ilə bir daha maraqlanıb.

Sonra Abdin Fərzəliyev Vətən müharibəsi şəhidi Ağakişiyev Nurlanın atası, Birinci Qarabağ müharibəsi qazisi Etibar Ağakişiyevin evinə gedərək onun bayramını təbrik edib, ailənin qayğıları ilə maraqlanıb.

Şəhid ailələri də onlara dövlət səviyyəsində hər zaman böyük diqqət və qayğının göstərildiyini qeyd edərək buna görə Prezident İlham Əliyevə və Birinci vitse-prezident Mehriban xanım Əliyevaya minnətdarlıqlarını ifadə ediblər.

Azərbaycan Prezidenti İlham Əliyevin müvafiq sərəncamları ilə “Vətən uğrunda”, “Cəbrayılın azad olunmasına görə” və “Füzulinin azad olunmasına görə” medallarına layiq görülən şəhid İbadov Rauf Məhərrəm oğlunun 26-cı doğum günü qeyd edilib. Abşeron Rayon İcra Hakimiyyətinin başçısı Abdin Fərzəliyev, rayonun hüquq-mühafizə orqanlarının rəhbərləri, YAP Abşeron Rayon Təşkilatının sədri, şəhid ailələri və qazilərlə birgə Saray qəsəbəsindəki Şəhidlər xiyabanına gələrək şəhidimizin əziz xatirəsini yad edib, ruhlarına dualar oxuyub, məzarları üzərinə tər çiçəklər düzüblər.

Anım tədbirində şəhidin keçdiyi döyüş yolundan danışılıb, onun göstərdiyi xidmət və şücaətdən bəhs edilib.

Elə həmin gün Abdin Fərzəliyev şəhid R.İbadovun əvvəllər yaşadığı Saray qəsəbəsindəki evlərinə gedərək onun ailə üzvləri ilə görüşüb, onların problemləri və qayğıları ilə maraqlanıb.

Şəhid ailəsi də onlara dövlət səviyyəsində hər zaman böyük diqqət və qayğının göstərildiyini qeyd edərək buna görə Prezident İlham Əliyevə və Birinci vitse-prezident Mehriban xanım Əliyevaya minnətdarlıqlarını bildiriblər.

X  X  X

Prezident İlham Əliyevin vətəndaşların müraciətlərinin operativ həlli ilə bağlı göstərişlərinə uyğun olaraq Abşeron rayonunda silsilə vətəndaş qəbulları keçirilir. Hökməli qəsəbəsində baş tutan növbəti səyyar-qəbulda Abşeron Rayon İcra Hakimiyyətinin başçısı Abdin Fərzəliyev, hüquq-mühafizə orqanlarının, xidmət təşkilatlarının rəhbərləri, YAP Abşeron Rayon Təşkilatının sədri, şəhid ailələri, qazilər və qəsəbə sakinləri iştirak ediblər.

İştirakçılar əvvəlcə Hökməli qəsəbə tam orta məktəbin həyətində ucalan Şəhidlər Abidəsini ziyarət edib, ölkəmizin bütövlüyü uğrunda canından keçmiş qəhrəmanlarımızın əziz xatirəsini anıblar.

Səyyar qəbulda çıxış edən Abdin Fərzəliyev ölkəmizin sürətli sosial-iqtisadi inkişafından, Vətən müharibəsində qazanılan zəfərdən, respublikamızdakı ictimai-siyasi sabitlikdən, həmçinin ölkə rəhbərliyinin tapşırıqlarına uyğun olaraq Abşeronda həyata keçirilən sosial infrastruktur layihələrdən danışaraq qeyd edib ki, Hökməli qəsəbəsində gedən kütləvi məskunlaşma bir sıra sosial və infrastruktur məsələlərinin ortaya çıxmasına səbəb olub.

Yerlərdə müşahidə edilən problemlərin dərindən araşdırıldığını və həlli istiqamətində layihələrin hazırlandığını vurğulayan rayon rəhbəri sakinlərin istək və arzularının, eləcə də onları narahat edən məsələlərin öyrənilməsi baxımından səyyar qəbulların əhəmiyyətini qeyd edib.

Daha sonra çıxış edən sakinlər şəhid adlarının küçələrə verilməsində, qəsəbənin inzibati ərazisinə daxil olan və “Sevil”, “Sonalı”, “Nübar” və “Atyalı” adlandırılan yaşayış massivlərində illərdən bəri yığılıb qalan mülkiyyət problemlərinin həll olunmasında, su-kanalizasiya, o cümlədən digər kommunikasiya xətlərinin çəkilməsində, daxili küçələrin abadlaşdırılmasında köməklik göstərilməsini xahiş ediblər.

X  X  X

Növbəti görüş isə Abşeron Rayon İcra Hakimiyyətinin inzibati binasında reallaşıb. Qəbulda başçı Abdin Fərzəliyev, şəhid ailələri, qazilər və rayon sakinləri iştirak ediblər.

Tədbirdə sakinlər rayon ərazisində salınan yeni yaşayış massivlərinə qaz xəttinin çəkilməsində, “AAAF Park” Yaşayış kompleksində vətəndaşların üzləşdikləri problemlərin həllində, işlə təmin olunmaqda və digər məsələlərin həllində köməklik göstərilməsini xahiş ediblər.

Sakinlər tərəfindən qaldırılan məsələlər yerindəcə həll olunub, müəyyən vaxt tələb edən digər məsələlərin həlli istiqamətində isə müvafiq tapşırıqlar verilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.