İQTİSADİYYAT
“Abşeronneft” NQÇİ-nin özüllərində yeni paylayıcı qurğular istismara verilib
Bakı, 6 aprel, AZƏRTAC
“Abşeronneft” neft və qazçıxarma idarəsinin (NQÇİ) özüllərində yeni paylayıcı qurğular istismara verilib
SOCAR-ın mətbuat xidmətindən AZƏRTAC-a bildirilib ki, “Azneft” İB-nin obyektlərində uzun müddət istismarda olan elektrik sisteminin yenilənməsi işləri intensiv şəkildə davam etdirilir. Birliyin “Abşeronneft” neft və qazçıxarma idarəsində də bu istiqamətdə mühüm işlər görülür, istismar müddəti başa çatan elektrik xətləri, paylayıcı qurğular yenilənir, şəbəkə müasir tipli avadanlıqlarla təchiz olunur. SOCAR-ın “Neftqazelmitədqiqatlayihə” İnstitutunun layihələri əsasında “Neftqaztikinti” Tresti tərəfindən yeni yeraltı və sualtı kabel, eləcə də hava elektrik ötürücü xətləri çəkilib, güc transformatorları, paylayıcı qurğular və paylayıcı şitlər quraşdırılıb, yeni yarımstansiyalar istismara verilib.
Estakadaüstü paylayıcı qurğular və onlar arasında kabel xətləri yenilənib, paralel olaraq sualtı kabel xətləri yeni paylayıcı qurğulara köçürülərək təmir olunub. 401 nömrəli köhnə qəzalı estakadayanı meydançadan 190 və 250 saylı stasionar dəniz özüllərinə çıxan 3 ədəd 6 kilovoltluq sualtı kabel əsaslı təmir olunaraq 290 saylı özülə köçürülüb. 562 - 401 nömrəli estakadayanı meydançalararası qəzalı hissədən estakadaüstü 2 ədəd 6 kilovoltluq kabelin istismarının təhlükəsizliyini təmin etmək məqsədilə 1 kilometr uzunluğunda eyni güclü yeni əvəzedici sualtı kabel xətti çəkilib.
“Darvin bankası” yatağında 670-720 nömrəli dəniz özülləri arasındakı dairəvi elektrik enerji təchizatının təminatı üçün 1,3 kilometr uzunluğunda yeni sualtı kabel xətti çəkilib, estakada üzərindəki paylayıcı qurğular və onların hidrotexniki hissələri yenilənib, paylayıcı qurğularda layihəyə uyğun elektrik avadanlıqları quraşdırılaraq istismara verilib.
“Azneft” İB-də enerji infrastrukturunun daha da təkmilləşdirilməsi üçün həyata keçirilən tədbirlər bundan sonra da davam etdiriləcək.