CƏMİYYƏT
Ədliyyə infrastrukturu müasirləşdirilir
Bakı, 29 sentyabr, AZƏRTAC
Azərbaycan Prezidenti İlham Əliyevin rəhbərliyi ilə ədliyyə sisteminin təkmilləşdirilməsi üzrə genişmiqyaslı islahatlar aparılır, insan hüquqlarının etibarlı təmin olunması, vətəndaşların ədliyyə orqanlarına müraciət imkanlarının asanlaşdırılması, onlara göstərilən hüquqi xidmətlərin keyfiyyətinin yüksəldilməsi məqsədilə ədliyyə infrastrukturunun müasirləşdirilməsi üzrə ardıcıl tədbirlər görülür. Həyata keçirilən islahatlar çərçivəsində son illər Ədliyyə Nazirliyinin yerli qurumları, o cümlədən regional ədliyyə şöbələri, icra və qeydiyyat orqanları üçün müasir informasiya texnologiyaları ilə təchiz olunmuş yeni inzibati binalar inşa olunaraq istifadəyə verilib. Bu ayın əvvəlində dövlətimizin başçısının Xaçmaz rayonuna səfəri çərçivəsində Nikah Evinin binasının açılışını etməsi xüsusilə əlamətdar olmaqla ədliyyə işçiləri tərəfindən dərin minnətdarlıq və iftixar hissi ilə qarşılanıb.
Ədliyyə Nazirliyinin mətbuat xidmətindən AZƏRTAC-a bildiriblər ki, sentyabrın 29-da Mingəçevirdə qeydiyyat şöbəsi üçün yeni inşa edilən inzibati binanın açılışı olub.
Tədbirdə ədliyyə naziri Fikrət Məmmədov, Mingəçevir Şəhər İcra Hakimiyyətinin başçısı Niyazi Bayramov, habelə məsul ədliyyə işçiləri, hakimlər, şəhər hüquq mühafizə orqanlarının rəhbərləri, ictimaiyyət və KİV nümayəndələri iştirak ediblər.
Mərasimdən əvvəl ümummilli lider Heydər Əliyevin xatirəsi yad olunub, abidəsi önünə gül dəstələri qoyulub.
Tədbir iştirakçıları qeydiyyat şöbəsinin foyesində ulu öndər Heydər Əliyevin büstü önünə də gül dəstələri qoyublar.
Bina ilə tanışlıq zamanı məlumat verilib ki, ümumi sahəsi 500 kvadratmetr olan ikimərtəbəli binada qeydiyyat işinin aparılması, əhali və əməkdaşlar üçün hər cür şərait yaradılıb. Burada yaradılan yüksək şərait, həmçinin təntənəli nikah mərasimlərinin keçirilməsinə imkan verəcək. Eyni zamanda, nikaha daxil olmaq istəyən şəxslərin qanunvericiliklə müəyyən edilmiş qaydada tibbi müayinəsi və tibbi arayışın verilməsi digər tibb müəssisələrinə müraciət edilmədən bilavasitə burada həyata keçiriləcək.
Mərasimdə çıxış edən ədliyyə naziri Fikrət Məmmədov ümummilli lider Heydər Əliyevin müəyyən etdiyi inkişaf strategiyasına uyğun olaraq, dövlətimizin başçısı İlham Əliyevin rəhbərliyi ilə ölkəmizin bütün sahələrdə yüksək nailiyyətlər əldə etdiyini vurğulayıb. Bu günlərdə Konstitusiyaya dəyişikliklərlə bağlı azad, ədalətli və şəffaf şəraitdə, böyük vətəndaş həmrəyliyi ilə keçirilmiş ümumxalq səsverməsinin xalqımızın gələcək inkişaf kursu ətrafında birliyinin, ölkəmizin demokratik tərəqqisinin təzahürü olduğu qeyd edilib.
Nazir respublikamızın, o cümlədən regionların sosial-iqtisadi inkişafı üzrə həyata keçirilən məqsədyönlü tədbirlərdən danışıb, Azərbaycan Prezidentinin bu yaxınlarda Mingəçevir şəhərinə səfəri zamanı abadlıq-quruculuq işləri ilə tanışlığını və sənaye parkının təməlqoyma mərasimində iştirakını xüsusilə vurğulayıb. Eyni zamanda, genişmiqyaslı ədliyyə islahatlarına toxunaraq Mingəçevirdə qeydiyyat şöbəsinin yeni inzibati binasının istifadəyə verilməsinin şəhər sakinlərinə yeni bir töhfə olduğunu söyləyib. Bildirilib ki, son illər ərzində 50-ə yaxın qeydiyyat şöbələrinin binaları əsaslı təmir olunub və ya yeniləri inşa edilərək istifadəyə verilib, o cümlədən ötən ilin sonunda dövlətimizin başçısının Şəkiyə səfəri çərçivəsində şəhər qeydiyyat şöbəsinin yeni inzibatı binasının açılışı olub.
Nazir bölgələrdə ədliyyə qurumları üçün yeni binaların istifadəyə verilməsinin onların fəaliyyətinin təkmilləşdirilməsinə, vətəndaşlar üçün əlverişli şərait yaratmaqla ədliyyə orqanlarına müraciət imkanlarının asanlaşdırılmasına xidmət etdiyini bildirib.
Mingəçevir Şəhər İcra Hakimiyyətinin başçısı Niyazi Bayramov və digərləri çıxışlarında respublikamızın hərtərəfli dinamik tərəqqisinə, o cümlədən ədliyyə sisteminin inkişafına verdiyi müstəsna əhəmiyyətə və qayğıya görə dövlətimizin başçısı İlham Əliyevə dərin minnətdarlıqlarını ifadə ediblər. Bildirilib ki, yeni inşa olunmuş binanın istifadəyə verilməsi əhaliyə yüksək keyfiyyətli hüquqi yardımın göstərilməsinə xidmət edəcək.
Səfər zamanı ədliyyə naziri hakimlər və yerli ədliyyə qurumlarının əməkdaşları ilə görüşərək, etik davranış qaydalarına ciddi riayət olunması, vətəndaşlara layiqli xidmət göstərilməsi, insanların məmnunluğuna nail olunması, işin keyfiyyətinin artırılması ilə bağlı və digər tapşırıq və tövsiyələrini verib.