CƏMİYYƏT


Ailə, Qadın və Uşaq Problemləri üzrə Dövlət Komitəsi yanında İctimai Şuranın üzvləri ilə növbəti görüş keçirilib

Bakı, 21 sentyabr, AZƏRTAC

Sentyabrın 21-də Azərbaycan Respublikasının Ailə, Qadın və Uşaq Problemləri üzrə Dövlət Komitəsi yanında İctimai Şura üzvlərinin növbəti görüşü keçirilib.

AZƏRTAC-ın məlumatına görə, komitə sədri Hicran Hüseynova çıxış edərək bildirib ki, hazırda ölkədə mərkəzi və yerli icra hakimiyyəti, eləcə də yerli özünüidarəetmə orqanlarına ictimai nəzarətin olması dövlətin diqqətdə saxladığı əsas məsələlərdən biridir. 2014-cü ildə “İctimai iştirakçılıq haqqında” Qanunun qəbul edilməsi bu fəaliyyəti daha da sürətləndirib. Bu qanunun qəbulu ilə müvafiq strukturlar yanında ictimai şuraların yaradılması məcburi xarakter daşıyır. Bütün bunlar həyata keçirilməklə Azərbaycan demokratikləşmə prosesində, eləcə də dövlət-vətəndaş münasibətlərində növbəti mərhələyə qədəm qoyur. Bu məsələnin dövlət üçün nə dərəcədə əhəmiyyətli olduğunu Prezident İlham Əliyev öz çıxışlarında dəfələrlə qeyd edib.

Dövlətimizin başçısının bu yöndə göstərişinə uyğun olaraq Komitə yanında da İctimai Şuraya seçkilər keçirildiyini bildirən Hicran Hüseynova qeyd edib ki, 9 nəfər qeyri-hökumət təşkilatı Şuraya üzv seçilib və burada ailə, qadın və uşaq hüquqlarının müdafiəsi üzrə səmərəli fəaliyyət göstərən, əhəmiyyətli layihələr icra edən QHT-lər toplaşıb. Müvafiq fəaliyyət sahələrində vətəndaş cəmiyyəti institutları ilə sıx əməkdaşlığın qurulmasının Komitənin əsas fəaliyyət prinsiplərindən biri olduğunu vurğulayan Hicran Hüseynova İctimai Şuranın müvafiq sahələr üzrə qanunvericilik layihələrinin hazırlanması və təkmilləşdirilməsində, ictimai nəzarətin təmin olunmasında, qadın və uşaq hüquqlarının qorunması istiqamətində qərarların qəbulunda, işlərin daha səmərəli təşkilində əhəmiyyətli rol oynayacağını deyib və Komitənin tədbirlər planı ilə tanış olmalarını, öz təkliflərini irəli sürmələrini bildirib.

Daha sonra İctimai Şuraya üzv olan qeyri-hökumət təşkilatı sədrlərinə üzvlük vəsiqələri təqdim olunub.

Çıxış edən şura üzvləri vətəndaşların dövlət idarəçiliyində iştirakı, məmur-vətəndaş münasibətlərində şəffaflığın təmin olunması, verilən qərarlarda vətəndaş cəmiyyəti institutlarının da rəyinin nəzərə alınması baxımından İctimai Şuraların əhəmiyyətini qeyd ediblər. Onlar Ailə, Qadın və Uşaq Problemləri üzrə Dövlət Komitəsinin vətəndaş cəmiyyətləri ilə uğurlu əməkdaşlıq təcrübəsindən bəhs ediblər. İctimai Şuranın üzvləri Dövlət Komitəsi tərəfindən qadın və uşaq hüquqlarının müdafiəsi istiqamətində aparılan işlərdə İctimai Şuranın daha yaxından iştirak edəcəyini və öz töhfəsini verəcəyini bildiriblər.

Görüş qeyri-hökumət təşkilatları ilə qarşılıqlı əlaqələrin qurulması və digər məsələlərlə bağlı təkliflərinin irəli sürülməsi ətrafında müzakirələrlə davam edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.