ELM VƏ TƏHSİL
Akademik Arif Həşimov AMEA-nın Yer və Kimya Elmləri bölmələrinin həqiqi və müxbir üzvləri ilə görüşüb
Bakı, 12 may, AZƏRTAC
AMEA-nın prezidenti vəzifəsini icra edən akademik Arif Həşimov Yer və Kimya Elmləri bölmələrinin həqiqi və müxbir üzvləri ilə görüşüb.
Bu barədə AZƏRTAC-a akademiyadan məlumat verilib. Bildirilib ki, görüş AMEA-nın aprelin 27-də keçirilmiş Ümumi yığıncağının davamı olaraq keçirilib.
Tədbirdə çıxış edən akademik Arif Həşimov bildirib ki, görüşün keçirilməsində məqsəd mövcud problemləri dinləmək və onların həll yollarını müəyyənləşdirmək, eləcə də akademiyanın hazırkı potensialından istifadə etməklə Azərbaycan elminin inkişaf dinamikasını təmin etmək, həmçinin gələcək fəaliyyət planını və istiqamətləri müzakirə etməkdir. Akademiyanın ümumi yığıncağında yekun qərar layihəsinin qəbul olunduğunu və sözügedən sənəddə elmi bölmələrə müəyyən tapşırıqların verildiyini xatırladan Arif Həşimov Yer və Kimya Elmləri bölmələrinin AMEA-nın əsas aparıcı sütunlarından olduğunu deyib. O, tədbirdə səsləndiriləcək təkliflərin önəmli olduğunu, digər bölmələrin üzvləri ilə də keçiriləcək görüşlərdən sonra AMEA-nın Rəyasət Heyətinin növbəti iclasında verilmiş təkliflər əsasında müvafiq qərarın qəbul ediləcəyini diqqətə çatdırıb.
Kimya Elmləri Bölməsinin üzvü akademik Abel Məhərrəmov ötən əsrin ortalarından etibarən AMEA-nın Yer və Kimya Elmləri bölmələrində aparılan tədqiqatların respublikamızın iqtisadiyyatının formalaşmasına mühüm töhfələr verdiyini söyləyib. Qeyd edib ki, neftin çıxarılması və emalı ilə bağlı işlərin həyata keçirilməsində Yer Elmləri Bölməsinin, onlardan kimyəvi məhsulların alınmasında isə Kimya Elmləri Bölməsinin alimlərinin xüsusi rolu olub.
Azərbaycan elminin inkişaf dinamikasının təmin edilməsi ilə bağlı fikirlərini bölüşən akademik Abel Məhərrəmov gənclərə məqalələrin çapına görə stimullaşdırıcı mükafatın verilməsi, Elmin İnkişafı Fondu tərəfindən verilən qrant layihələrinin elmi məktəbləri olan sahələrə ayrılması, elmin inkişafı istiqamətində xüsusi proqramların maliyyələşdirilməsi, eləcə də ölkələrarası elmi məktəblərin sintezində aparıcı sahələr üzrə birgə tədqiqatların aparılmasına dair təkliflərini səsləndirib.
Kimya Elmləri Bölməsinin üzvü akademik Vaqif Fərzəliyev isə elmi tədqiqatların istehsalata tətbiqi məqsədilə AMEA-nın Yüksək Texnologiyalar Parkının daha da inkişaf etdirilməsi, gənc kadrların hazırlanması, onların prioritet istiqamətlər üzrə xaricdə təcrübə keçməyə göndərilməsi və sosial problemlərlə bağlı təkliflərini iclas iştirakçılarına təqdim edib.
Görüşdə, həmçinin Kimya Elmləri Bölməsinin üzvü akademik Vaqif Abbasov çıxış edərək AMEA-ya ayrılan maliyyənin artırılması, qrant layihələrinin koordinasiyasının təşkili, zəruri ixtisaslar üzrə həqiqi və müxbir üzvlüyə yeni seçkilərin keçirilməsi və Qarabağda aparılan tədqiqat işlərində akademiyanın yaxından iştirakı ilə bağlı təkliflərini verib.
Yer Elmləri Bölməsinin üzvü akademik Akif Əlizadə isə belə görüşlərin akademiyanın gələcək fəaliyyət proqramını müəyyənləşdirmək baxımından böyük əhəmiyyət kəsb etdiyini söyləyib. Elmlə təhsilin inteqrasiyasının vacib məsələlərdən olduğunu deyən Akif Əlizadə alimlərin ali təhsil müəssisələrində fəaliyyətinin gələcək elmi kadrların seçilməsinə, onların AMEA-ya dəvət edilməsinə töhfə verəcəyini bildirib. Həmçinin vurğulayıb ki, akademiyanın özünün universitetinin yaradılması xüsusi əhəmiyyət kəsb edir və bu baş vermədən yeni elmi məktəblərin formalaşması çox çətin olacaq. AMEA-da tam təhsilin təşkili müasir istiqamətlər üzrə kadrların hazırlanması işinə mühüm töhfə verəcək.
Bu gün bir çox gənc kadrların xarici dil bilmədiklərini diqqətə çatdıran akademik Akif Əlizadə bunun ciddi problem olduğunu və gənc kadrların yüksəkixtisaslı mütəxəssis kimi yetişmələrinə əngəl törətdiyini deyib.
Akademik, həmçinin biznes mühiti ilə əlaqə olmadan inkişaf etməyin mümkünsüz olduğunu vurğulayıb, AMEA-nın Yüksək Texnologiyalar Parkının akademiyanın gələcəyi üçün xüsusi əhəmiyyət kəsb etdiyini bildirib.
Kimya Elmləri Bölməsinin üzvü AMEA-nın müxbir üzvü Bəxtiyar Məmmədov isə çıxışında diqqəti elmi müəssisə və təşkilatlarda aparılan tədqiqatların səviyyəsinin artırılmasına çəkib. Bildirib ki, bu gün əhəmiyyətli tədqiqatların aparılması üçün müasir standartlara cavab verən avadanlıqlara, eləcə də eksperimental araşdırmalar üçün bir sıra çətin tapılan kimyəvi maddələrə ehtiyac var. O, həmçinin mövcud avadanlıqların təmiri ilə bağlı problemləri dilə gətirib.
Sonda çıxış edən akademik Arif Həşimov səsləndirilən təkliflərə münasibətini bildirib. O, son illərdə akademiyada müasir elmi istiqamətlər üzrə önəmli tədqiqatlar aparıldığını deyib, bu gün AMEA-nın kadr potensialının qorunması işinə diqqətin artırıldığını, gənclərin dünyanın aparıcı elmi mərkəzlərində təcrübəyə göndərildiklərini söyləyib. Akademik, həmçinin bu istiqamətdə Türkiyə Elmi və Texnoloji Tədqiqat Şurası (TÜBİTAK), Polşanın aidiyyəti qurumu ilə əlaqələrdən danışıb, səsləndirilən təkliflərin yazılı şəkildə Rəyasət Heyətinə təqdim olunmasını tövsiyə edib.