İQTİSADİYYAT
“Akkord”un nümayəndə heyəti Sankt-Peterburq şəhərində VIII Beynəlxalq sement konfransında iştirak etmişdir
Bakı, 2 may (AZƏRTAC). Aprelin 27-dən 29-dək Sankt-Peterburq şəhərində Rusiyanın “Sement və onun tətbiqi” jurnalının təşkilatçılığı ilə VIII Beynəlxalq sement konfransı (“PetroCem-2014”) keçirilmişdir.
“Akkord” korporasiyasının mətbuat xidmətindən AZƏRTAC-a bildirmişlər ki, 34 ölkədən 335 şirkətin qatıldığı konfransda “Akkord Sənaye Tikinti İnvestisiya Korporasiyası” ASC-nin Müşahidə Şurasının sədri Suat Çalbıyık, baş direktoru Göksel Aybek, Qazax sement zavodunun direktoru Hikmət Qəribovdan ibarət nümayəndə heyəti iştirak etmişdir.
Konfransda, həmçinin sement istehlakçısı və sement sənayesi üçün avadanlıq təchizatçısı olan yerli və xarici şirkətlərin nümayəndələri iştirak etmişlər.
Çoxsaylı şirkətlərdən 500-dən artıq nümayəndənin qatıldığı konfransda sement sənayesinin müxtəlif aspektlərinə həsr olunmuş çıxışlar dinlənilmiş, elmi-praktik araşdırmalar, yeni texnologiyalar, perspektiv istiqamətlər, qarşılıqlı əməkdaşlıq məsələləri müzakirə edilmişdir.
Konfransda iştirak edən “Akkord” nümayəndələri hazırda illik istehsal gücü 1 milyon ton sementə bərabər olan Qazax sement zavodunda istehsal xəttinin tikintisi prosesinə ən müasir avadanlıq və texnologiyaların cəlb edilməsi məqsədilə sement sənayesi sahəsində tanınmış bir sıra şirkətlərlə danışıqlar aparmışlar. Bu məqsədlə Danimarkanın “FLSmidth” şirkəti ilə aparılan danışıqlar xüsusilə əhəmiyyətli olmuşdur. Sement sənayesində sifarişçilərə ən səmərəli enerji sərfiyyatı və ətraf mühitin daha yaxşı qorunması şərtləri daxilində yüksək istehsal səviyyəsini qoruyub saxlamaq üçün müasir həllər təklif edən “FLSmidth”in nümayəndələri “Akkord” ilə əməkdaşlığa böyük maraq göstərmişlər.
Hazırda Qazax sement zavodunda istehsal edilən sement məhsulları üçün avtomatik paketləmə və nəqletmə əməliyyatlarının modernləşdirilməsi, daha güclü qablaşdırma avadanlıqlarının satın alınması və quraşdırılması üzrə məsələləri yerində müzakirə etmək üçün “FLSmidth” nümayəndələrinin cari ilin may ayında Qazax sement zavoduna səfəri ilə bağlı razılıq əldə edilmişdir.
Konfransda, həmçinin “Akkord” nümayəndə heyətinin keçirdiyi digər görüşlər zamanı Qazax sement zavodunun təqdimatı olmuş, müəssisədə nəqliyyat və logistika sistemlərinin təkmilləşdirilməsi, istehsal sahəsində istifadə olunan texniki yağlar və yağ sistemlərinin satın alınması, Avropanın tanınmış istehsalçı şirkətləri ilə əməkdaşlıq və təcrübə mübadiləsi məsələləri ilə bağlı müzakirələr aparılmışdır.
Nəzərə çatdırılmışdır ki, “PetroCem” Rusiyada sement istehsalı sahəsi üzrə keçirilən ən böyük beynəlxalq elmi-praktik konfransdır. Bu konfransda ənənəvi olaraq müvafiq sahədə tanınmış şirkətlər və dünya səviyyəli ekspertlər iştirak edirlər. Konfrans Sankt-Peterburq şəhərində iki ildən bir keçirilir. “PetroCem-2014” konfransında da Rusiya ilə yanaşı, Almaniya, Fransa, Danimarka, Avstriya, ABŞ və digər ölkələrdən olan nüfuzlu şirkət və ekspertlər iştirak etmişlər.
Konfransın təşkilatçısı olan “Sement və onun tətbiqi” jurnalında Qazax sement zavodu ilə bağlı geniş məqalə də dərc olunmuşdur.
Qazax sement zavodu “Akkord Sənaye Tikinti İnvestisiya Korporasiyası” ASC-nin ən böyük investisiya layihələrindən biridir. Korporasiyanın Qazax rayonunda inşa etdiyi zavod 2013-cü il iyulun 5-də Prezident İlham Əliyevin iştirak etdiyi təntənəli mərasimlə istifadəyə verilmişdir. Hazırda zavodda quru üsulla ən müasir standartlara uyğun yüksək keyfiyyətli sement məhsulları istehsal olunur.
Zavodda ikinci istehsal xəttinin tikintisindən sonra sement istehsalının həcminin ildə 3 milyon tona çatdırılması nəzərdə tutulur.