Bakı, 8 fevral, AZƏRTAC 

Aşqabad Dünya Səhiyyə Təşkilatının (DST) nazirlər səviyyəsində konfransını qəbul etməyə hazırlaşır.

AZƏRTAC “ORIENT” saytına istinadla xəbər verir ki, Türkmənistan Səhiyyə və Tibb Sənayesi Nazirliyində DST-nin aprelin 9-10-da Aşqabadda keçiriləcək “Qeyri-yoluxucu xəstəliklərin profilaktikası və onlara qarşı mübarizə” mövzusunda nazirlər səviyyəsində II Beynəlxalq Konfransına hazırlıq tədbirləri müzakirə edilib.

Konfransın təqribən iki yüz iştirakçısı qeyri-yoluxucu xəstəliklərlə bərabər, psixi sağlamlıq, siqaretçəkməyə, içki içməyə, piylənməyə, qeyri-sağlam qidalanmaya, azhərəkətli həyat tərzinə, hipertoniyaya və diabetə qarşı mübarizə məsələlərini müzakirə edəcəklər. Havanın çirkləndirilməsinə qarşı mübarizə məsələsi əsas müzakirə mövzularından biri olacaq. Bu məqsədlə DST-nin Avropa Regional Bürosunun əməkdaşları ilə bərabər, qonşu ölkələrin ekologiya sahəsində ekspertləri Aşqabada dəvət ediləcək.

DST-nin 2013-cü il dekabrın 3-4-də Aşqabadda keçirilən nazirlər səviyyəsində əvvəlki konfransından sonra əldə edilən nəticələrin müzakirəsi də gündəliyin mühüm mövzusu olacaq. Türkmənistan nümayəndələri qeyri-yoluxucu xəstəliklər üzrə risk faktorlarının işlənib hazırlanmış indikatorlarını təqdim edəcəklər.

DST-nin Türkmənistan nümayəndəliyinin təmsilçisi, doktor Paulina Karvovska təşkilatçıların görüşündə səhiyyə sahəsində və tütün əleyhinə siyasətdə ölkənin yüksək nailiyyətlər qazandığını vurğulayıb. Ekspertlərin hesablamalarına görə, Türkmənistanda siqaret çəkənlər cəmi 10-14 faiz təşkil edir və bu sahədə azalmağa doğru meyil müşahidə olunur. Bu da DST-nin Avropa regionunun tütündən azad ölkələr reytinqində Türkmənistanı birinci yerə çıxarır. P.Karvovska qeyd edib ki, ekoloji aspektlərin müzakirəsinin gündəliyə daxil edilməsi böyük əhəmiyyət daşıyır, çünki insan sağlamlığı ətraf mühitlə sıx bağlıdır.

Müasir təbabət və farmakologiyanın nailiyyətləri sayəsində dünyada əhalinin ömür müddəti və keyfiyyəti xeyli yaxşılaşıb. DST və onun tərəfdaşı olan təşkilatlar arasında kooperasiya çərçivəsində bir çox ölkələrdə epidemiologiya və sanitariya nəzarəti sisteminin hərtərəfli inkişafına dair milli proqramlar həyata keçirilir.

Hazırda dünya birliyi diqqəti müəyyən səbəblərdən insan orqanizmində inkişaf edən qeyri-yoluxucu xəstəliklər üzərində cəmləşdirib. Xəstəliklərin 4 əsas qrupuna ürək-damar xəstəlikləri, xroniki respirator xəstəliklər, xərçəng və diabet aiddir.