Kanberra, 29 sentyabr, AZƏRTAC

Avstraliyanın “Vibe-Media” xəbər portalında 44 günlük Vətən müharibəsi haqqında məlumatlar, Azərbaycan Respublikası Xarici İşlər Nazirliyinin müvafiq bəyanatına istinadlar və Azərbaycanda keçirilən tədbirlər barədə məlumatlar yerləşdirilib.

AZƏRTAC xəbər verir ki, məlumatlarda həmin sənədə istinadla Azərbaycanın beynəlxalq hüququn prinsiplərinə, xüsusilə də suverenliyi, ərazi bütövlüyü və beynəlxalq sərhədlərin toxunulmazlığına ciddi riayət etməklə Ermənistanla münasibətləri normallaşdırmağa hazır olduğu qeyd edilir. Ermənistan hökuməti bölgədə sülhü, təhlükəsizliyi, firavanlığı qorumağa və beynəlxalq öhdəliklərə riayət etməklə bu əsas prinsiplərə hörmət etməyə çağırılır.

Azərbaycan Silahlı Qüvvələrinin Müzəffər Ali Baş Komandanı, Prezident İlham Əliyevin rəhbərliyi ilə şanlı Ordumuzun Qələbəsi ilə başa çatan Vətən müharibəsinin Azərbaycan tarixində yeni bir dövr açdığı, Ermənistanın 30 ilə yaxın davam edən işğalçılıq siyasətinə son qoyduğu, BMT Təhlükəsizlik Şurasının 1993-cü il tarixli müvafiq qətnamələrinin icrasının təmin edildiyi qeyd olunur.

Azərbaycan ərazilərinin işğalının sona çatmasının Ermənistanın onilliklər ərzində həyata keçirdiyi qanunsuz fəaliyyətlərin tam miqyasını, xüsusilə Azərbaycanın tarixi, mədəni və dini irsinin qəsdən məhv edilməsi və mənimsənilməsi, təbii sərvətlərinin talan edilməsi, infrastrukturun dağıdılması və digər beynəlxalq hüquq pozuntuları kimi çoxsaylı hərbi cinayətlərinə dair dəlilləri ortaya çıxardığı məlumatda bildirilir.

Beynəlxalq humanitar və insan hüquqları haqda qanunları pozduğuna görə Ermənistanı məsuliyyətə cəlb etmək üçün Azərbaycanın Avropa İnsan Hüquqları Məhkəməsinə və Beynəlxalq Ədalət Məhkəməsinə müraciət etdiyi də məlumatda əksini tapıb.

Azərbaycan hökumətinin bir milyona yaxın didərgin düşmüş azərbaycanlının təhlükəsiz və ləyaqətli şəkildə öz vətənlərinə geri qaytarılması məqsədilə işğaldan azad edilmiş ərazilərdə bərpa və yenidənqurma işləri apardığı, bölgədə davamlı sülhün və təhlükəsizliyin təmin edilməsi üçün bütün zəruri tədbirləri gördüyü qeyd edilir.

Saytda 27 Sentyabr – Anım Günündə Azərbaycanın müstəqilliyi, suverenliyi və ərazi bütövlüyü uğrunda şəhid olan bütün şəhidlərin xatirəsinə ehtiram məqsədilə Azərbaycanda keçirilən tədbirlər barəsində də məlumat yer alıb.

Bundan əlavə, XİN-in Anım Günü ilə bağlı bəyanatı səfirliyin akkreditə olunduğu Avstraliya və Yeni Zelandiya XİN-lərinə, Fici Respublikasının səfirliyinə, eyni zamanda, Avstraliyada akkreditə olunmuş digər diplomatik missiyalara və beynəlxalq təşkilatlara, Avstraliya Federal Parlamentinin bütün millət vəkilləri və senatorlarına göndərilib.

Həmçinin Avstraliya və Yeni Zelandiyada məskunlaşan icma üzvlərinin iştirakı ilə onlayn formatda anım mərasimi keçirilib. Tədbirdə Avstraliya Azərbaycan Assosiasiyası və Avstraliya-Azərbaycan-Türk Dostluq Birliyinin rəhbərləri və digər icma üzvləri iştirak ediblər.

Vüqar Ağayev

AZƏRTAC-ın xüsusi müxbiri

Kanberra