CƏMİYYƏT
Azərbaycan-Fransa Ticarət və Sənaye Palatası Əmək və Əhalinin Sosial Müdafiəsi naziri ilə onlayn görüş keçirib
Bakı, 30 iyul, AZƏRTAC
Azərbaycan-Fransa Ticarət və Sənaye Palatası (CCIAF) Əmək və Əhalinin Sosial Müdafiəsi naziri Sahil Babayev ilə onlayn görüş keçirib.
CCIAF-dan AZƏRTAC-a bildirilib ki, Palatanın idarəedici direktoru Zibər Hüseynova pandemiya dövründə təmsil etdiyi qurumun həyata keçirdiyi tədbirlər, hökumət tərəfindən tətbiq edilən yeniliklərlə bağlı işçi komitələrin təşkil etdiyi informasiya sessiyaları barədə danışıb. O, S.Babayevlə bu görüşün nazirlik və özəl sektor arasında əmək, məşğulluq sahələrində islahatlara dair fikir və məlumat mübadiləsi aparmağa imkan verdiyini qeyd edib.
Nazir S.Babayev sosial-iqtisadi islahatlar, ölkəmizdə dövlət tərəfindən sahibkarlığın inkişafı məqsədilə həyata keçirilən dəstək proqramları, özəl sektorun milli iqtisadiyyatda rolu barədə danışıb. O, pandemiya dövründə ölkəmizdə məşğulluğa və sosial rifaha dəstək tədbirləri barədə məlumat verib. Bu tədbirlər çərçivəsində iş yerlərinin və əməkhaqlarının qorunması, məşğulluq imkanlarının artırılması, sosial müdafiə və aktiv məşğulluq proqramlarının genişləndirilməsi üçün aparılan işləri qeyd edib.
Qeyri-formal məşğulluğun qarşısının alınması, əmək müqavilələrinin sayında artım, sahibkarlarla sosial dialoqa əsaslanan əməkdaşlıq barədə məlumat verən nazir ölkəmizdə formal məşğulluğa keçidi stimullaşdıran təsirli mexanizmləri, minimum əməkhaqqının artırılması, vergi güzəştləri, vergi prosedurlarının sadələşdirilməsi, məcburi dövlət sosial sığorta haqqı dərəcələrinin endirilməsi və s. istiqamətlərdə atılan addımları qeyd edib.
Nazir iştirakçılara “DOST” layihəsi, “Əmək müqaviləsi bildirişi” altsisteminin geniş funksional imkanları, “Məşğulluq” altsistemi barədə geniş məlumat verib. O, palatanın ölkə iqtisadiyyatında rolundan bəhs edib, əmək bazarı ilə bağlı aparılan islahatlar prosesində sahibkarlarla, o cümlədən CCIAF üzvləri ilə əməkdaşlığa xüsusi önəm verildiyini deyib.
CCIAF-in İdarə Heyətinin sədri Teybə Quliyeva palatanın sosial sahədə həyata keçirilən islahatları yaxından izlədiyini və dəstəklədiyini qeyd edərək, qurumun dövlət-özəl sektor arasında dialoqun qurulmasında aktiv iştirak etdiyini vurğulayıb.
Görüşdə fəxri qonaq qismində iştirak edən Fransanın Azərbaycandakı səfiri Zakari Qross məşğulluğun aradan qaldırılması, reabilitasiya, sosial təminat sistemində idarəçiliyin təkmilləşdirilməsi istiqamətində Əmək və Əhalinin Sosial Müdafiəsi Nazirliyi ilə Fransanın müvafiq qurumları arasında əməkdaşlıqdan danışıb. O son bir il ərzində sosial sahədə həyata keçirilən islahatları müsbət qiymətləndirdiyini qeyd edib.
Tədbirin digər fəxri qonağı - Avropa İttifaqının Azərbaycandakı nümayəndəliyinin rəhbəri Kestutis Yankauskas ölkəmizdə həyata keçirilən sosial islahatlar, həmin islahatların tərkib hissəsi kimi Aİ ölkələrinin təcrübələrinin Azərbaycanda əmək və sosial müdafiə sisteminin inkişafına dəstək məqsədilə tətbiq edilməsi barədə danışıb. Qeyd edib ki, bu cür əməkdaşlığın müsbət nəticələri digər sahələrdə də əlaqələr üçün vacib əsas yaradır.
Görüş sual cavab sessiyası ilə davam edib. Nazir S.Babayev CCIAF üzvlərini maraqlandıran sualları cavablandırıb.
Xatırladaq ki, Azərbaycan-Fransa Ticarət və Sənaye Palatası 2016-cı ildən fəaliyyət göstərir və əsas məqsədi iki ölkə arasında qarşılıqlı iqtisadi və dostluq münasibətlərini inkişaf etdirməkdir. Palatanın missiyası üzvlərini unikal şəbəkələşmə imkanları ilə təmin etməkdir. Eyni zamanda, palata məlumatlandırıcı və maarifləndirici rol oynamaqla, həm üzv şirkətlərə, həm də daha böyük biznes icmasına təsir edən aktual məsələləri hədəfləyərək hər ay rəsmi tədbirlər təşkil edir və üzv şirkətlərə palatanın platforması vasitəsilə öz bizneslərini inkişaf etdirmək üçün yardım təklif edir. Palatanın 60-dan çox yerli, fransız və beynəlxalq üzv şirkəti var.