Bakı, 1 fevral, AZƏRTAC

Azərbaycan layihələri Beynəlxalq Telekommunikasiya İttifaqının (ITU) “WSIS-2018” müsabiqəsinin mükafatına namizəddir.

Birləşmiş Millətlər Təşkilatının (BMT) təşəbbüsü ilə hər il keçirilən informasiya cəmiyyəti məsələləri üzrə (WSIS) yüksək səviyyədə reallaşdırılan beynəlxalq görüşdə “WSIS-2018” mükafatına namizədlərin siyahısı açıqlanıb. İnformasiya cəmiyyəti məsələləri üzrə (WSIS) yüksək səviyyədə keçirilən beynəlxalq görüş BMT-nin 2003-cü ildən informasiya, kommunikasiya və informasiya cəmiyyəti məsələləri üzrə fəaliyyət göstərən sammitidir.

“B.EST Solutions Azərbaycan” şirkətindən AZƏRTAC-a bildirilib ki, WSIS mükafatı İKT-nin inkişafı sahəsində ən mühüm nailiyyətlərin qiymətləndirilməsi və tanınması üçün effektli mexanizmin müəyyənləşdirilməsi məqsədilə maraqlı tərəflərin təşəbbüsü ilə yaradılan beynəlxalq müsabiqədir. İlk dəfə müsabiqə 2012-ci ildə keçirilib və peşəkarlar cəmiyyətində çox sürətlə böyük populyarlıq qazanıb. O, BMT-nin Cenevrə Fəaliyyət Planı və İnkişaf Proqramının və davamlı inkişaf məqsədləri ilə müəyyənləşdirilən WSIS-in fəaliyyəti çərçivəsində uğurlu təcrübənin üzə çıxarılması və nümayişi üçün analoqu olmayan qlobal platforma kimi çıxış edir. Əsası qoyulduğu vaxtdan müsabiqə WSIS mükafatlarına namizəd kimi 300-dən çox maraqlı tərəfləri cəlb etməyə nail olub.

Bu il 83 ölkə 449 layihə təqdim edib ki, onlar da öz kateqoriyalarında qalib adı almaq üçün mübarizə aparacaqlar. “Asan İmza” mobil elektron imzanın operatoru hesab edilən “B.EST Solutions Azərbaycan” şirkəti tərəfindən reallaşdırılan iki layihə eyni anda 18 kateqoriyadan iki kateqoriyada təqdim edilib. Belə ki, Azərbaycan Respublikasının Vergilər Nazirliyi ilə əməkdaşlıq çərçivəsində reallaşdırılan, hüquqi baxımdan əl imzasına bərabər olan və Azərbaycanın milli identiteti sayılan “Asan İmza” layihəsi “Elektron hökumət üçün İKT proqramı” kateqoriyasında, Azərbaycan Respublikasının Prezidenti yanında İqtisadi İslahatların Təhlili və Kommunikasiya Mərkəzi ilə əməkdaşlıq çərçivəsində reallaşdırılan “Azərbaycanın Rəqəmsal Ticarət Qovşağı” layihəsi isə “Elektron biznes üçün İKT proqramı” kateqoriyasında təqdim edilib. Nominasiya olunan bütün layihələr ətraflı təsvirlə müşayiət olunur və arzu edən hər kəs əvvəlcədən sistemdə qeydiyyatdan keçərək Azərbaycanın milli innovativ layihələrinə səs verə bilər. Müsabiqənin rəsmi saytı: 

https://www.itu.int/net4/wsis/prizes/2018/

Səsvermənin nəticələrinə əsasən, liderlərin ilk beşliyi müəyyən edildikdən sonra hər 18 kateqoriyada qaliblər elan ediləcək. Qeyd edək ki, ötən ilin qalibləri, coğrafiyası Afrika, Asiya, Şimali Amerika və Avropa ölkələrini əhatə edən layihələr olub. “B.EST Solutions” şirkətinin layihələrinin belə nüfuzlu müsabiqəyə ilk dəfə təqdim edilməsinə baxmayaraq, nominantların yekun siyahısına daxil edilib, bu isə “Made in Azerbaijan” innovativ həllərinin dünya standartlarına cavab verməsinin sübutudur.

Səs vermək istəyən hər kəs səsvermə ilə bağlı ətraflı təlimatla "Asan İmza"nın “Facebook” səhifəsində tanış ola bilər. Nəzərə çatdırılır ki, 18 kateqoriyanın hər birinə səs verildiyi halda səsvermə prosesi bitmiş hesab edilir.