MƏDƏNİYYƏT


Azərbaycan və Özbəkistan alimlərinin iştirakı ilə tanınmış özbək şairi Xasiyyət Rüstəmin Qarabağa dair kitabının təqdimatı olub

Daşkənd, 16 noyabr, АZƏRTAC

Azərbaycan Milli Məclisinin Mədəniyyət Komitəsi, Özbəkistandakı Heydər Əliyev adına Azərbaycan Mədəniyyət Mərkəzi (AMM), Avrasiya Beynəlxalq Araşdırmalar İnstitutu İctimai Birliyi, Dünya Gənc Türk Yazarlar Birliyi, "Zirvə" Tədris Mərkəzinin birgə təşəbbüsü ilə Özbəkistanın “Kitab dünyası” qəzetinin baş redaktoru Xasiyyət Rüstəmin bu günlərdə Azərbaycanda çap olunmuş “Adı Lalə idi o qızın” adlı poemasının onlayn təqdimatı keçirilib.

AZƏRTAC xəbər verir ki, AMM-in direktoru Samir Abbasov iştirakçıları Azərbaycan torpaqlarının işğaldan azad olunması münasibətilə təbrik edib, Ermənistanın işğalçı siyasətinin ifşa edilməsi və dünyaya çatdırılması istiqamətində işlərin davam etdirildiyini bildirib. O, Azərbaycan dövlətinin uğurlu xarici siyasəti, Azərbaycan Respublikasının Mədəniyyət Nazirliyinin dəstəyi ilə Özbəkistanda aparılan təbliğat işləri, habelə erməni vandallarının işğalçılıq siyasəti, milli mədəniyyətimizə dəyən ziyandan danışıb, ümumilikdə aqressiv siyasətin ifşasında mədəniyyətin, ədəbiyyatın üzərinə mühüm vəzifələr düşdüyünü qeyd edib.

S.Abbasov öz yaradıcılığı ilə yalnız Özbəkistanda deyil, bütün türk dünyasında tanınan və sevilən şair Xasiyyət Rüstəmin poeması haqqında danışıb. Birinci Qarabağ müharibəsi zamanı öz ata-baba yurdundan didərgin düşən azərbaycanlı uşaq Lalənin acı həyat hekayəsindən bəhs edən poemanın, onun ailəsinin yaşamış olduğu ağrı-acıları, məhv olmuş uşaqlıq arzularını, yaddaşında buraxdığı dərin izləri özündə əks etdirdiyini bildirib. O, əsərin təbliğati əhəmiyyəti və xalqımızın iztirablarının dünyaya çatdırılması istiqamətində mühüm bir iş olduğunu vurğulayıb.

Azərbaycan Milli Məclisinin deputatı, Mədəniyyət Komitəsinin sədri Qənirə Paşayeva çıxışında Xasiyyət Rüstəmin iki qardaş xalq arasında ədəbiyyat, mədəniyyət istiqamətində çox böyük işlər gördüyünü, hər zaman Azərbaycanın yanında olduğunu ifadə edib.

O bildirib ki, Xasiyyət Rüstəmin qələmə aldığı poema müəllifin Azərbaycan insanının yaşamış olduğu ağrı-acılara həssas münasibətinin təzahürüdür. Milli Məclisin deputatı çıxışında poemanın qəhrəmanı olan Lalənin işğaldan azad olunmuş yurduna qovuşması və ondan sonrakı yaşamı haqqında Xasiyyət Rüstəmin bu əsərin ikinci hissəsini də qələmə alacağına inamını ifadə edib.

Əlişir Nəvai adına Daşkənd Dövlət Özbək Dili və Ədəbiyyat Universitetinin dosenti Uluqbek Hamdam, tarixçi-alim Şuxrat Salamov, Mirzə Uluğbəy adına Özbəkistan Milli Universitetinin dosenti Şahlo Hacıyeva Azərbaycanla Özbəkistan arasında tarixi dostluq əlaqələri, erməni işğalının acı nəticələri, habelə əsərin baş qəhrəmanı Lalənin təsirli həyatı haqqında danışaraq balaca qızcığazın obrazı ilə Xasiyyət Rüstəmin bütövlükdə Azərbaycan xalqının acılarını canlandırdığını qeyd ediblər.

Kitabın tərcüməçilərindən biri şair və publisist Əkbər Qoşalı çıxışında Xasiyyət Rüstəmin qələmə aldığı poemanın bədii məziyyətlərindən, onun ictimai xadim kimi genişmiqyaslı fəaliyyətindən bəhs edib. O bildirib ki, xanım yazarın əsəri bədii məziyyətləri ilə bu mövzuda qələmə alınmış əsərlər arasında ön sıralardadır.

Kitabın digər tərcüməçisi şair Elşən Əzim çıxışında əsərin tərcüməsi ilə məşğul olduğu zaman Xasiyyət Rüstəmin bir şair kimi Azərbaycanın səsinə poetik dillə çox yüksək səviyyədə səs verdiyini, öz istedadı və bədii duyumunu çox ustalıqla əks etdirdiyini qeyd edib.

Kitabın redaktorlarından şair, publisist, Dünya Gənc Türk Yazarlar Birliyi İdarə Heyətinin sədri İntiqam Yaşar çıxışında Xasiyyət Rüstəmin qələmə aldığı poemanın Qarabağ mövzusunda yazılmış ən yaxşı əsərlərdən biri olduğunu vurğulayaraq gələcəkdə ədəbiyyat tədqiqatçılarının bu əsərə istinad edəcəklərinə inamını ifadə edib.

“Zirvə” Tədris Mərkəzinin direktoru Rahib İbrahimov, Özbəkistanın Karşı Dövlət Universitetinin dosenti Shohida Karomova, dosent Gülnaz Sattarova öz çıxışlarında iki qardaş xalq arasında olan sıx ədəbi-mədəni əlaqələrdən, şairə Xasiyyət Rüstəmin bu istiqamətdə sistemli və ardıcıl fəaliyyətindən, poemanın bədii məziyyətlərindən geniş bəhs ediblər.

Təqdimat mərasimində tələbələrin poema əsasında hazırladıqları ədəbi kompozisiya da təqdim olunub.

Tədbirin sonunda çıxış edən Xasiyyət Rüstəm təqdimatda iştirak edən ziyalılara təşəkkür edib, kitabın nəşr olunmasında əməyi keçən hər kəsə minnətdarlığını bildirib.

Qeyd edək ki, yeni çap olunmuş “Adı Lalə idi o qızın” adlı kitabın Azərbaycanın və Özbəkistanın müxtəlif qurumlarına və oxuculara paylanması nəzərdə tutulur.

Qulu Kəngərli

AZƏRTAC-ın xüsusi müxbiri

Daşkənd

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.