CƏMİYYƏT
Azərbaycanda yeni beynəlxalq təşkilat - “Beynəlxalq Kommunikasiya və Media Mərkəzi” yaradılıb
Bakı, 14 iyun, AZƏRTAC
Azərbaycanda “Beynəlxalq Kommunikasiya və Media Mərkəzi” adlı təşkilat yaradılıb.
AZƏRTAC xəbər verir ki, mərkəzin təsisçisi və sədri İtaliyanın Beynəlxalq İqtisadi Siyasi Araşdırmalar İnstitutunun üzvü, Avropanın “Atr İtalia Cultura” Beynəlxalq Mədəniyyət və Turizm Assosiasiyasının Azərbaycan üzrə təmsilçisi, BDU-nun əməkdaşı, media konvergensiya və internet media üzrə tədqiqatçı Leyla Rəşiddir.
“Beynəlxalq Kommunikasiya və Media Mərkəzi”nin məqsədi beynəlxalq media ilə əlaqələrin gücləndirilməsi və beynəlxalq auditoriyaya qarşı daha açıq informasiya siyasətinin həyata keçirilməsidır. Müxtəlif sahələrdə - sosial, siyasi, iqtisadi, elmi, mədəni, təhsildə beynəlxalq kommunikasiyanı inkişaf etdirmək, xalq diplomatiyasını formalaşdırmaqdır.
Mərkəzin digər məqsədləri beynəlxalq kommunikasiya və media araşdırmalarının öyrənilməsinə yardım etmək, mediakommunikasiya təhsilinin inkişafında və təkmilləşdirilməsində vasitəçilik etməkdir.
Azərbaycanın təbliği, Dağlıq Qarabağ həqiqətlərinin dünya ictimaiyyətinə çatdırılması ilə bağlı beynəlxalq təşkilatlarla əlaqələr yaratmaq, mediakommunikasiyanın vətəndaş cəmiyyətinin inkişafında rolunu artırmaq təşkilatın hədəfləri sırasındadır.
Mərkəz qarşısına qoyduğu məqsədlərə çatmaq üçün beynəlxalq mediakommunikasiya sahəsində kadrların hazırlanması və təkmilləşdirilməsində alternativ vasitələrdən istifadə edəcək. Mediakommunikasiyanın elmi-nəzəri əsaslarının yeni metodoloji prinsiplərlə işlənib hazırlanması vəzifələrini həyata keçirəcək.
Mərkəz, həmçinin Beynəlxalq mediakommunikasiya sahəsində rəqəmsal fikir konsepsiyasını təqdim edəcək. Beynəlxalq ictimaiyyətə Azərbaycanla bağlı həqiqətlərin çatdıracaq, beynəlxalq mediakommunikasiyada Azərbaycanın tarixi, elm, mədəniyyət, incəsənət, təhsil, etnoqrafiyası, etnoturizminə dair kontentin yaradılıb geniş ictimaiyyətə çatdırılması istiqamətində fəaliyyət göstərəcək.
Eyni zamanda, kommunikasiya və media sahəsində beynəlxalq təcrübənin öyrənilməsi və təbliği, xarici ölkələrin media qurumları ilə informasiya mübadiləsinin gücləndirilməsi, Azərbaycanda beynəlxalq mediakommunikasiyanın inkişafına mane olan amillərin aradan qaldırılması da yerinə yetiriləcək vəzifələr sırasındadır.
“Beynəlxalq Kommunikasiya və Media Mərkəzi”nin sədri Leyla Rəşidin sözlərinə görə, mərkəzin nizamnaməsində nəzərdə tutulmuş vəzifələrin reallaşması üçün beynəlxalq kommunikasiya və medianın müxtəlif problemləri üzrə dəyirmi masalar, seminarlar təşkil ediləcək, monitorinqlər aparılacaq. Beynəlxalq əlaqələr, turizm, insan haqları, ifadə azadlığı kimi məsələlərdə kommunikasiya və media layihələri həyata keçiriləcək. Azərbaycanın təbliği ilə bağlı hazırlanan sənədli filmlər, sosial çarxlar, analitik yazılar qlobal şəbəkədə yayımlanacaq.
Beynəlxalq kommunikasiya və medianın inkişafına mane olan amillərin öyrənilməsi üçün araşdırmaların və monitorinqlərin aparılması, tələbələr, tədqiqatçılar üçün müvafiq metodik və dərs vəsaitlərinın hazırlanması, təlimlərin keçirilməsi kimi məsələlər də təşkilatın fəaliyyət istiqamətinə daxildir. “Beynəlxalq Kommunikasiya və Media Mərkəzi” gələcəkdə beynəlxalq kommunikasiya və media problemlərinin həlli, təşəbbüslərin dəstəklənməsi üçün koalisiyalar və birliklərin yaradılmasını də nəzərdə tutur.