SİYASƏT
Azərbaycanın Müstəqillik Günü münasibətilə ölkəmizin Rusiyadakı səfirliyi rəsmi qəbul təşkil edib
Moskva, 29 may, AZƏRTAC
Azərbaycanın Müstəqillik Günü münasibətilə ölkəmizin Rusiyadakı səfirliyi rəsmi qəbul təşkil edib.
AZƏRTAC xəbər verir ki, tədbirdə Rusiya Federasiyası xarici işlər nazirinin müavini Andrey Rudenko, Dövlət Dumasının beynəlxalq məsələlər üzrə komitəsinin sədri, Rusiyanın Liberal-Demokrat Partiyasının sədri Leonid Slutski, Dövlət Dumasının deputatları, Federasiya Şurasının senatorları, Rusiya Xarici İşlər Nazirliyinin vəzifəli şəxsləri, Rusiya ictimaiyyətinin, elmi dairələrinin, Azərbaycan diasporunun nümayəndələri, politoloqlar, Heydər Əliyev Fondunun Rusiya nümayəndəliyinin əməkdaşları, Türkiyənin, Moldovanın, Tacikistanın, Vyetnamın, İslandiyanın, Laos Xalq-Demokratik Respublikasının, Koreya Xalq Demokratik Respublikasının, Monteneqronun, Türkmənistanın, Beninin, Qananın, Malinin səfirləri, digər dövlətlərin yüksək vəzifəli diplomatları iştirak ediblər.
Tədbir Azərbaycan və Rusiya dövlət himnlərinin səsləndirilməsi ilə başlanıb. Giriş sözü ilə çıxış edən səfir Polad Bülbüloğlu 104 il əvvəl, 1918-ci ildə Azərbaycan Respublikasının Milli Şurasının xalqımızın çoxəsrlik dövlətçilik ənənələrini davam etdirərək İstiqlal Bəyannaməsini imzaladığını vurğulayıb. Qısa müddətdə parlament və hökumətin yaradıldığını, bayraq, himn kimi dövlət atributlarının təsis edildiyini, dövlət quruculuğu sahəsində mühüm tədbirlərin həyata keçirildiyini və respublikanın beynəlxalq hüquq sisteminin subyekti kimi tanınması istiqamətində addımlar atıldığını diqqətə çatdırıb.
Cəmi 23 ay fəaliyyət göstərmiş Azərbaycan Xalq Cümhuriyyəti müsəlman Şərqində demokratik ənənələrin formalaşmasına böyük təsir göstərib. Səfir müasir Azərbaycanın reallığının, ölkəmizin müstəqilliyinin qorunub saxlanmasının Azərbaycan xalqının ümummilli lideri Heydər Əliyevin adı ilə bağlı olduğunu vurğulayıb.
P.Bülbüloğlu xüsusi qeyd edib ki, sonrakı dövrdə dövlətlərarası münasibətlərin daha da möhkəmlənməsində Azərbaycan Respublikasının Prezidenti İlham Əliyevin böyük rolu olub. Yüksək səviyyəli daimi siyasi dialoq sayəsində ötən onilliklər ərzində Azərbaycan-Rusiya əməkdaşlığı nəzərəçarpacaq dərəcədə möhkəmlənib və genişlənib, iqtisadi və humanitar sahələrdə bir çox konkret qarşılıqlı faydalı layihələrlə zənginləşib.
Səfir xatırladıb ki, 30 il əvvəl, 1992-ci il aprelin 4-də Rusiya Federasiyası ilə Azərbaycan Respublikası arasında diplomatik münasibətlərin qurulması haqqında Protokol imzalanıb, məhz bu tarixdən ölkələrimiz arasındakı münasibətlərin tarixində yeni səhifə açılıb.
Azərbaycan Respublikasının Prezidenti İlham Əliyevin 2022-ci ilin fevral ayında Rusiya Federasiyasına rəsmi səfəri çərçivəsində Azərbaycan Respublikası ilə Rusiya Federasiyası arasında Müttəfiqlik qarşılıqlı fəaliyyəti haqqında Bəyannamənin imzalanması ölkələrimiz arasında diplomatik münasibətlərin yaradılmasının 30-cu ildönümü ilə eyni vaxta düşüb. Bu sənəd Azərbaycan-Rusiya münasibətlərini keyfiyyətcə yeni, müttəfiqlik səviyyəsinə qaldırıb və böyük ikitərəfli hüquq bazasının kvintessensiyasıdır.
Çıxışının davamında səfir ölkələrimizin beynəlxalq təşkilatlarda səmərəli əməkdaşlığını da qeyd edib, burada bir çox məsələlərdə, o cümlədən regional təhlükəsizliyin və sabitliyin təmin edilməsində yanaşmalarımızın yaxın olduğunu söyləyib, hər iki ölkənin Cənubi Qafqazda uzunmüddətli regional təhlükəsizliyin və əməkdaşlığın təmin edilməsində maraqlı olduğunu bildirib.
Rusiya Federasiyasının 70-dən çox subyektini ehtiva edən birbaşa regionlararası əlaqələrin də dinamik inkişafına diqqət çəkən diplomat, xalqlarımızın ümumi tarixi talelərini, iki əsrdən artıq müddəti əhatə edən dialoqda davamlılığı qorumaq istəyini və özünə xas mədəniyyətlərimizin qarşılıqlı əlaqələndirilməsini əks etdirən humanitar sahədə əməkdaşlığı, həm dövlətlərimizdə, həm də onun hüdudlarından kənarda geniş şəkildə tanınan, Azərbaycan və Rusiya prezidentlərinin himayəsi altında keçirilən Bakı Beynəlxalq Humanitar Forumunun əhəmiyyətini məmnunluqla qeyd edib.
Polad Bülbüloğlu bildirib ki, Azərbaycanın 20 faiz ərazisinin uzun müddət Ermənistan tərəfindən işğalı regional inkişafa və əməkdaşlığa əngəl törədib, normal həyata mane olan böyük gərginlik yaradıb. Məlum olduğu kimi, 2020-ci il sentyabrın 27-də növbəti hərbi təcavüzə cavab və BMT Nizamnaməsinə uyğun olaraq Azərbaycan özünün müdafiə hüququ çərçivəsində mülki əhalinin təhlükəsizliyini təmin etmək və təcavüzkarı sülhə məcbur etmək məqsədilə əks-hücum hərbi əməliyyatı başladıb. Bütün Azərbaycan xalqı, rəşadətli ordumuz Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə bir dəmir yumruqda birləşərək yüksək döyüş məharəti nümayiş etdirib və uzunmüddətli münaqişəyə son qoyub. Azərbaycan, Rusiya və Ermənistan liderlərinin 2020-ci il 10 noyabr tarixli üçtərəfli Bəyanatı və bu razılaşmanın davamı olaraq qəbul edilən 2021-ci il 11 yanvar və 26 noyabr tarixli bəyanatları regionda davamlı sülh və sabitliyin formalaşmasına yol açıb, eləcə də regional əməkdaşlıq üçün imkanları xeyli genişləndirib.
Ərazilərimizin işğaldan azad edilməsinin Ermənistanın işğal etdiyi torpaqlarda onilliklər ərzində həyata keçirdiyi geniş qanunsuz fəaliyyəti üzə çıxarmasına diqqət çəkən P.Bülbüloğlu bura irimiqyaslı mədən hasilatı, tarixi mədəni və dini irsin məqsədyönlü şəkildə məhv edilməsi və mənimsənilməsi, təbii sərvətlərin talan edilməsi və infrastrukturun dağıdılmasının aid olduğunu, Ağdam, Füzuli kimi iri şəhərlərin tamamilə dağıdıldığını, xeyli sayda kəndin yer üzərindən silindiyini bildirib. O xatırladıb ki, bölgədəki 67 məsciddən 62-si tamamilə dağıdılıb. İşğaldan azad edilmiş ərazilərdə dövlətimizin başçısının tapşırığı ilə bu gün görünməmiş sürətlə irimiqyaslı bərpa və quruculuq işləri aparılır. Ambisiyalı layihələr həyata keçirilir. Səkkiz ay ərzində Füzuli şəhərində Beynəlxalq Hava Limanı inşa edilib. Bir sözlə, Qarabağa normal həyat qayıdır.
Sonda Polad Bülbüloğlu bildirib ki, Azərbaycan üçün Rusiya ilə tərəfdaşlıq əlaqələri aydın, proqnozlaşdırıla bilən və məqsədyönlü strateji perspektiv daşıyır. Bunun üçün də liderlərimizin böyük potensialı və iradəsi vardır.
Daha sonra Rusiya Federasiyası xarici işlər nazirinin müavini Andrey Rudenko çıxış edərək bildirib ki, müasir Azərbaycan dinamik inkişaf edən, siyasi və iqtisadi sahədə, regional və beynəlxalq məsələlərdə respublikanın nüfuzunun möhkəmləndirilməsində heyrətamiz uğurlar qazanmış dövlətdir.
Andrey Rudenko, həmçinin vurğulayıb ki, müdrik dövlət xadimi və siyasətçi Heydər Əliyevin xatirəsi Rusiyada dərin ehtiramla yad edilir, onun iki ölkə arasında əlaqələrin möhkəmləndirilməsində xidmətləri yüksək qiymətləndirilir. Azərbaycan xalqının ümummilli liderinin müəyyənləşdirdiyi siyasi kurs Prezident İlham Əliyev tərəfindən layiqincə davam etdirilir.
Nazir müavini diqqətə çatdırıb ki, bu il Rusiya ilə Azərbaycan arasında diplomatik münasibətlərin qurulmasının 30 illiyi geniş qeyd edilir. Andrey Rudenko Rusiya Federasiyası ilə Azərbaycan Respublikası arasında Müttəfiqlik qarşılıqlı fəaliyyəti haqqında Bəyannamənin gələcək illər üçün ikitərəfli münasibətlərin inkişafı vektorunu müəyyən etdiyini vurğulayaraq, həmin sənədin müddəalarının həyata keçirilməsinin Rusiya-Azərbaycan tərəfdaşlığının daha da möhkəmlənməsinə hər cəhətdən töhfə verəcəyinə əminliyini ifadə edib.
O vurğulayıb ki, Rusiya və Azərbaycan xalqlarını əsrlər boyu birləşdirən, əvvəlki nəsillərdən irsən qalan dostluq və qarşılıqlı hörmətin artırılması istiqamətində iş davam etdiriləcək. Regional təhlükəsizliyin möhkəmləndirilməsi məsələlərində sıx əməkdaşlığın həyata keçirildiyi vurğulayan Rusiya rəsmisi, bunun əsasında da 2020-ci il 10 noyabr, 2021-ci il 11 yanvar və 26 noyabr tarixli üçtərəfli yüksək səviyyəli bəyanatlar dayandığnı qeyd edib.
Sözügedən razılaşmaların bütün müddəalarının həyata keçirilməsi Cənubi Qafqazın sabitlik və firavanlıq zonasına çevrilməsinin təminatıdır. Nazir müavini Rusiya və Azərbaycanın birgə səyləri ilə iki ölkə arasında müttəfiqlik və mehriban qonşuluq ruhunda çoxşaxəli əlaqələrin daha da möhkəmləndiriləcəyinə, bunun iki dövlətin vətəndaşlarının mənafelərinə tam cavab verdiyinə, Cənubi Qafqazda və onun hüdudlarından kənarda sülhün və təhlükəsizliyin möhkəmləndirilməsi məcrasında cərəyan etdiyinə əminliyini bildirib.
Tədbirdə Rusiya Dövlət Dumasının Beynəlxalq əlaqələr Komitəsinin sədri, Rusiya Liberal Demokrat Partiyasının sədri Leonid Slutski çıxış edərək qonaqları bayram münasibətilə təbrik edib. O vurğulayıb ki, Prezident İlham Əliyev müasir müstəqil Azərbaycan dövlətinin qurucusu və yaradıcısı, dahi Heydər Əliyevin fəaliyyətini müvəffəqiyyətlə davam etdirir. Prezident İlham Əliyev Azərbaycan üçün gözəl nəticələr əldə edib, ölkəsini müstəqil dövlətə çevirib. Azərbaycan iqtisadiyyatı çiçəklənir, həm daxildə, həm də xaricdə möhtəşəm mədəni-humanitar layihələr həyata keçirilir. Bu kontekstdə partiya sədri Azərbaycanın birinci xanımı, Heydər Əliyev Fondunun rəhbəri Mehriban Əliyevanın fəaliyyətini xüsusilə qeyd edib.
Leonid Slutski bu gün Rusiyanın Azərbaycan kimi etibarlı tərəfdaşlarının az olduğunu vurğulayıb, bu tərəfdaşlığın bütün sahələrdə daha da inkişaf edəcəyinə əminliyini ifadə edib.
Tədbirin rəsmi hissəsindən sonra qonaqlar üçün Azərbaycan mətbəxinin ləziz təamlarından ibarət ziyafət təşkil olunub.
Fəridə Abdullayeva
AZƏRTAC-ın xüsusi müxbiri
Moskva