SİYASƏT
Azərbaycanın Müstəqilliyinin Bərpası Günü və Nizami Gəncəvinin anadan olmasının 880 illik yubileyi Almaniyada qeyd edilib VİDEO
Berlin, 15 oktyabr, AZƏRTAC
Azərbaycanın Almaniyadakı səfirliyi tərəfindən Berlində 18 Oktyabr - Müstəqilliyin Bərpası Günü və Nizami Gəncəvinin anadan olmasının 880 illik yubileyi münasibətilə konsert və ziyafət təşkil olunub.
AZƏRTAC хəbər verir ki, tədbiri açan ölkəmizin Almaniyadakı səfiri Ramin Həsənov Azərbaycanın 1991-ci ildən bəri 30 illik müstəqillik tarixinə nəzər salıb, müstəqil Azərbaycan Respublikasının 1918-1920-ci illərdə mövcud olmuş Azərbaycan Xalq Cümhuriyyətinin ənənələrinin davamçısı olduğunu bildirib. Qeyd edib ki, dünyəvi və demokratik dövlət bizə cümhuriyyət qurucularından qalmış müqəddəs mirasdır. Səfir ölkəmizin əsası ümummilli liderimiz Heydər Əliyev tərəfindən qoyulmuş düzgün və müstəqil siyasətlə qısa zamanda regionun aparıcı dövlətinə və iqtisadi gücünə çevrildiyini, regionda beynəlxalq əməkdaşlığın əsasını qoyduğunu, özünü etibarlı tərəfdaş kimi təsdiq etdiyini və nəhəng regional layihələr həyata keçirdiyini vurğulayıb. O, müstəqilliyimizin bərpa olunmasından bəri Azərbaycan-Almaniya münasibətlərinin çoxşaxəli və dinamik inkişaf etdiyini, ölkələrimiz arasında açıq və fəal siyasi dialoqun mövcud olduğunu bildirib.
Ramin Həsənov Azərbaycanın çoxqütblü xarici siyasət yürütdüyünü, Avropa və Asiya arasında körpü rolu oynadığını, eləcə də region ölkələri ilə mehriban qonşuluq münasibətlərinə can atdığını deyib. Səfir Ermənistan-Azərbaycan münaqişəsinin sülh yolu ilə həlli üçün uzun müddət davam edən beynəlxalq vasitəçiliyin nəticə vermədiyini, münaqişənin Azərbaycan tərəfindən hərbi-siyasi yolla həll olunduğunu diqqətə çatdırıb. Ramin Həsənov regionda yeni reallıqların, davamlı sülh və regional əməkdaşlıq üçün yaxşı imkanların yarandığını vurğulayıb. Bildirib ki, Azərbaycan ərazi bütövlüyünün qarşılıqlı tanınması şərti ilə sərhədlərin delimitasiyasına, həmçinin Ermənistanla sülh sazişinə dair danışıqlara başlamağa da hazırdır. Səfir Almaniya və Avropanın Cənubi Qafqazda davamlı sülhün bərqərar olması üçün fəallıq nümayiş etdirəcəyinə və Ermənistandakı revanşist qüvvələrin möhkəmlənməsi üçün əsas verilməyəcəyinə ümidini ifadə edib.
Səfir, həmçinin 2021-ci ilin Azərbaycanda “Nizami Gəncəvi İli” olduğunu bildirərək, dahi mütəfəkkir Nizami Gəncəvinin Azərbaycan və Şərq ədəbiyyatında yerini vurğulayıb. Qeyd edib ki, Nizami irsi Almaniyada da böyük maraqla araşdırılır.
Daha sonra Almaniya Xarici İşlər Nazirliyinin Şərqi Avropa, Qafqaz və Mərkəzi Asiya üzrə müvəkkili Mattias Lüttenberq Almaniyanın federal hökuməti adından təbrik nitqi səsləndirib. Alman diplomatı Azərbaycan-Almaniya münasibətlərinə nəzər salıb.
O, Azərbaycanda 2021-ci ilin “Nizami Gəncəvi İli” elan edilməsi ilə əlaqədar Almaniyanın ölkəmizdəki səfirliyinin təşkil etdiyi tədbirlərdən də danışıb. Dahi Azərbaycan şairi Nizaminin əsərlərinin alman mütəfəkkirləri tərəfindən də təhlil olunduğunu diqqətə çatdıran və bu xüsusda böyük alman filosofu Volfqanq Qoetenin “Şərq-Qərb Divanı”nı nümunə çəkən Lüttenberq Nizami irsinin Azərbaycanla yanaşı, Almaniya üçün də əhəmiyyətli olduğunu vurğulayıb.
Azərbaycanın Avropa İttifaqı və NATO ilə sıx əməkdaşlıq etdiyini deyən alman diplomatı ölkəmizin Əfqanıstandan təxliyə əməliyyatlarına göstərdiyi fəal dəstəyə görə minnətdarlığını bildirib.
Çıxışlardan sonra Almaniyada fəaliyyət göstərən “Xəzər” Kamera Filarmoniyasının ifasında Azərbaycan və Avropa korifeylərinin əsərlərindən ibarət konsert təqdim olunub. Filarmoniyanın rəhbəri və skripkaçı solisti Anar Bramo, pianoçu solisti Tamilla Quliyeva və tenoru Orxan Cəlilovun ifa etdiyi, eləcə də Kvintet musiqi qrupunun müşayiət etdiyi konsert proqramında, o cümlədən Üzeyir Hacıbəyli, Qara Qarayev, Fikrət Əmirovun Nizaminin əsərlərinə bəstələnmiş sonataları səsləndirilib.
Almaniyada yaşayan azərbaycanlı musiqiçi Anar Bramonun bəstələdiyi və ilk dəfə sözügedən konsertdə ifa edilən “Şuşa” mahnısı tamaşaçıların alqışları ilə qarşılanıb.
Sonda tədbir iştirakçılarına ziyafət verilib.
Tədbirdə Almaniya Bundestaqının, Xarici İşlər Nazirliyinin və digər hökumət qurumlarının əməkdaşları, siyasi, elmi və mədəni dairələrin, KİV-in, Almaniyada akkreditasiya olunmuş diplomatik nümayəndəliklərin və Azərbaycan diasporunun təmsilçiləri iştirak ediblər.
Vüqar Seyidov
AZƏRTAC-ın xüsusi müxbiri
Berlin