İDMAN
Azərbaycanın taekvondo üzrə milli komandasının 2019-cu ildə iştirak edəcəyi ilk beynəlxalq yarış müəyyənləşib
Cari ildə komandamızın əsas məqsədi İngiltərədə keçiriləcək dünya çempionatında uğurla çıxış etməkdir
Bakı, 5 yanvar, AZƏRTAC
Artıq 2018-ci il başa çatıb. Dekabrın 28-də böyüklər arasında taekvondo üzrə respublika çempionatına yekun vurulub. “Rio-2016” Yay Olimpiya Oyunlarında Azərbaycan Olimpiya yığmasının hesabına yeganə qızıl medalı məhz taekvondoçumuz yazdırıb. İlk Avropa Oyunlarının və IV İslam Həmrəyliyinin Oyunlarının qalibi, Avropa və dünya çempionumuz, dünya kubokunun ikiqat sahibi olan Radik İsayev həmin il Olimpiya çempionu olub.
Azərbaycan Taekvondo Federasiyasının (ATF) vitse-prezidenti, Avropa Taekvondo Birliyinin İcraiyyə Komitəsinin üzvü Nağı Səfərov AZƏRTAC-a müsahibəsində taekvondo üzrə böyüklərdən ibarət milli komandamızın 2019-cu ildə iştirak edəcəyi beynəlxalq yarışlar, millimizin 2020-ci ildə Tokioda təşkil olunacaq Olimpiya Oyunlarına lisenziya qazanmaq şansları və yarışlara hazırlıqla bağlı danışıb. Müsahibəni təqdim edirik.
Taekvondo üzrə böyüklərdən ibarət yığmamızın 2019-cu ildə hansı beynəlxalq yarışlarda iştirakı planlaşdırılır? Bu il keçiriləcək dünya çempionatına Azərbaycan yığma komandası necə hazırlaşacaq?
- Cari ildə Azərbaycanın taekvondo üzrə yığma komandası bir neçə böyük yarışlarda iştirak edəcək. Məqsəd bu idman növü üzrə keçirilən beynəlxalq yarışlara qatılaraq medallar qazanmaqla yanaşı, lisenziya xalları toplamaqdır. 2019-cu ildə əsas hədəfimiz mayda İngiltərədə keçiriləcək ən yaxşı idmançıların mübarizə aparacağı dünya çempionatında uğurla çıxış etməkdir. Bunun üçün çempionata çox ciddi hazırlaşacağıq.
Hazırda Azərbaycan komandasının iki üzvü - “Rio-2016” Olimpiya Oyunlarının qalibi Radik İsayev (80 kq-dan yuxarı), həmçinin dünya və Avropa çempionumuz, Olimpiya mükafatçısı Milad Hərçəqani (80 kq) Dünya Taekvondo Federasiyasının Olimpiya və dünya reytinq cədvəllərində ilk beşlikdə yer alıb. İdmanın bu növü üzrə qaydalara görə, “Tokio-2020”dək hesablarına yığdıqları reytinq xalları sayəsində cədvəldə ilk altılıqda yer alacaq idmançılar Olimpiadaya birbaşa vəsiqə qazanacaqlar. Hər iki idmançımız Olimpiya reytinq siyahısında üçüncü yerdədirlər. Altı idmançımız isə Olimpiya reytinq sıralamasında ən güclü 25 idmançı sırasında yer alır. Bu baxımdan idmançılarımızın reytinqdə öz yerlərini qoruyub saxlaması, xallarının sayını artıraraq daha yüksək mövqelərə irəliləməsi Olimpiadaya birbaşa vəsiqə əldə etmələri üçün vacib şərtlərdir.
R.İsayev və M.Hərçəqani Mançester şəhərində təşkil ediləcək yarışda yüksək nəticələr əldə edərlərsə, onlar demək olar ki, Olimpiadaya birbaşa lisenziyanı təmin etmiş olacaqlar. İlk sınaq olaraq, yığmanın baş məşqçisi Reza Mehmandoust milli komandanı fevralın ortalarında Türkiyədə keçiriləcək “Prezident kuboku” turnirində və açıq Türkiyə birinciliyi yarışlarında sınamağa qərar verib. Həmin turnirlərdən sonra yığmanın heyəti tam müəyyənləşəcək. Fevralda Antalyada, həmçinin parataekvondo üzrə dünya çempionatı keçiriləcək. Yığmamızın iştirak edəcəyi bu dünya çempionatı parataekvondonun “Tokio-2020” Paralimpiya Oyunlarının proqramına ilk dəfə daxil edildikdən sonra birinci mühüm yarış olacaq.
Bu il keçiriləcək Qran-Pri yarışlarının tarixi və yerləri müəyyənləşibmi?
Qran-Prilərə iyunda İtaliyanın Roma, sentyabrda Yaponiyanın Çiba və oktyabrda Bolqarıstanın Sofiya şəhərləri ev sahibliyi edəcək. Final Qran-Prisi 2019-cu ilin dekabrında Moskvada keçiriləcək. Xüsusilə, Çiba şəhərində yarış Yaponiyada keçiriləcək 2020-ci il Tokio Olimpiya Oyunlarından əvvəl taekvondo yarışları üçün test xarakterli turnir olacaq. Azərbaycan komandasının bu il keçiriləcək həmin Qran-Pri yarışlarında iştirak etməsi nəzərdə tutulur.
Ümumiyyətlə, reytınq xallarının artırılması üçün Qran-Pri yarışlarının çox böyük önəmi var. Çünki adi Qran-Prilərdə idmançıların aktivlərinə 40, final Qran-Prisində isə 80 Olimpiya xalı yazdırmaq imkanları var. Məqsədimiz bu yarışlarda uğurla çıxış edərək azarkeşləri sevindirmək, müxtəlif ölkələrin beynəlxalq arenalarında bayrağımızı yüksəltmək, dövlət himnimizi səsləndirməkdir.
Bu yarışlara hazırlaşmaq üçün yığmanın ATF-in inzibati binasında təlim-məşq toplanışı da yanvarın 3-dən başlayıb.