ELM VƏ TƏHSİL


Azərbaycanın təhsil işçiləri Buxarestdə qiymətləndirmə sahəsində qabaqcıl təcrübəni öyrəniblər

Bakı, 3 dekabr, AZƏRTAC 

Azərbaycanın təhsil işçilərinin Rumıniyanın paytaxtı Buxarestə təhsil səfəri təşkil edilib.

Bakı Şəhəri üzrə Təhsil İdarəsindən (BŞTİ) AZƏRTAC-a bildiriblər ki, səfərdə bu qurumun sektor müdirləri Anar Qədiməliyev, Samirə Bektaşi və 291 nömrəli Ekologiya Liseyinin direktoru Kəmalə Mirzoyeva iştirak ediblər.

BŞTİ-nin keyfiyyətə nəzarət sektorunun təşəbbüsü ilə Avropa Komissiyasının TAIEX proqramı çərçivəsində təşkil olunan səfər “Məktəb özünüqiymətləndirmə” mövzusuna həsr edilib.

Səfərin əsas məqsədi təhsil sahəsində beynəlxalq əlaqələri genişləndirmək, qarşılıqlı əməkdaşlıq çərçivəsində ümumi təhsilin inkişafını daha da sürətləndirmək və qiymətləndirmə sahəsində qabaqcıl təcrübəni öyrənmək olub.

Səfər çərçivəsində 4 gün davam edən öyrədici seminarlarda Rumıniyanın təhsil sistemi, tədrisin keyfiyyətinin yüksəldilməsi məqsədilə müəllim və şagirdlərin qiymətləndirilməsi, eləcə də məktəb inspeksiyaları haqqında ətraflı məlumat verilib.

Seminarlar zamanı Azərbaycan nümayəndə heyəti ümumtəhsil məktəblərində təhsil alan şagirdlərin bilik və bacarıqlarının müvafiq standartlara uyğun qiymətləndirilməsi barədə beynəlxalq təcrübə ilə yaxından tanış olmaq imkanı qazanıblar.

Həmçinin səfər çərçivəsində Rumıniya təhsil nazirinin müavini İonel Florian Lixandrunun rəhbərliyi ilə bu ölkənin Təhsil Nazirliyinin rəsmiləri və məktəb direktorları ilə görüş keçirilib.

Görüşdə qarşılıqlı təcrübə mübadiləsi, məktəb özünüqiymətləndirmə, şagird-valideyn-məktəb müstəvisində münasibətlərin qurulması və digər məsələlər müzakirə olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.