İQTİSADİYYAT
“Azəriqaz”da müştəri xidməti şöbəsində çalışanlar ixtisasartırma kurslarına cəlb edilir
Bakı, 16 iyul, AZƏRTAC
“Azəriqaz” İstehsalat Birliyi tərəfindən həyata keçirilən “Müştəri məmnuniyyətinin yüksəldilməsi layihəsi” çərçivəsində birliyin strukturuna daxil olan qurumların Müştəri xidməti şöbəsində çalışan əməkdaşların ixtisasartırma kurslarına cəlb edilməsi həyata keçirilir.
Birlikdən AZƏRTAC-a bildirilib ki, “Azəriqaz” tərəfindən SOCAR-ın Təlim, Tədris və Sertifikatlaşdırma İdarəsi ilə birlikdə təlim-ehtiyac təhlilləri aparılıb və müvafiq ixtisasartırma proqramları hazırlanıb. Əsas məqsəd regionlarda fəaliyyət göstərən “ASAN xidmət” mərkəzlərində vətəndaşlara xidmət göstərən birlik əməkdaşlarının göstərdikləri xidmətlər üzrə bilik, bacarıq və vərdişlərinin artırılmasıdır.
“Azəriqaz”ın təlim keçmiş əməkdaşları təlimdən sonra SOCAR-ın Təlim, Tədris və Sertifikatlaşdırma İdarəsinin təşkil etdiyi onlayn imtahanlarda iştirak edəcəklər. İmtahandan uğurla keçmiş şəxslərə SOCAR-ın Təlim, Tədris və Sertifikatlaşdırma İdarəsi tərəfindən sertifikatlar təqdim ediləcək. Təlim ilkin olaraq “Azəriqaz” İB-nin Ağsu Regional qaz istismarı İdarəsinin xidmət göstərdiyi Şamaxı və Kürdəmir “ASAN xidmət” mərkəzlərində keçirilib. Hazırda Masallı “ASAN xidmət” Mərkəzində davam etdirilir.