AZƏRTAC xəbər verir ki, fevralın 3-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış-yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədilə keçirilən yarmarkalara, mövsümə uyğun olaraq, əsasən meyvə-tərəvəz və bostan məhsulları çıxarılmışdı.

“Təzə bazar” MMC-nin həyətindəki yarmarkaya Sabirabad, Zərdab, Gədəbəy, Göyçay, Hacıqabul və digər rayonlardan müxtəlif çeşidli kənd təsərrüfatı məhsulları gətirilmişdi.

Kənd Təsərrüfatı Nazirliyi mətbuat xidmətinin rəhbəri Murtuzəli Hacıyevin verdiyi məlumata görə, bazar günü burada əhaliyə 15,4 ton məhsul, o cümlədən 3 ton ət, 0,4 ton ağartı, 4 ton tərəvəz, 5 ton kartof, 1 ton bostan bitkisi, 2 ton meyvə, 10 min ədəd yumurta təklif edilmişdir. Yarmarkada qiymətlər bazardakından 20-25 faiz aşağı olmuşdur. İki gün ərzində əhaliyə 37,5 ton məhsul satılmışdır.

Suraxanıda “Günəş” ticarət mərkəzindəki yarmarkada Qobustan, Balakən, Samux, Daşkəsən, Salyan və Biləsuvar rayonlarının fermərləri bazar günü 23 tona yaxın məhsul satmışlar.

“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə 3 tondan çox məhsul satılmışdır. Hər iki yarmarkada qiymətlər bazardakından 25-30 faiz ucuz olmuşdur.

Metronun “Əhmədli” stansiyasının yaxınlığında, Sarayevo küçəsində, “Bakı” kinoteatrının yanında “Bülbülə” kiçik müəssisəsinin “Azər” ticarət mərkəzində şəhər əhalisi Salyan, Kürdəmir, Quba, Ağcabədi, Qax, Biləsuvar, Şəki, Qəbələ rayonlarından gətirilmiş və qiymətləri bazardakından 30 faiz ucuz olan məhsulları həvəslə almışlar.

İşçi qrupunun qərargahından verilən məlumata görə, şənbə və bazar günləri bu yarmarkada 11 ton kartof, 43,9 ton meyvə, 9,7 ton ət, 1,1 ton ağartı və digər kənd təsərrüfatı məhsulları satılmışdır.

Nərimanov rayonu, Keşlə ticarət mərkəzində təşkil olunmuş yarmarkada alıcılara Xaçmaz, Tərtər, İmişli, Tovuz, Astara, Beyləqan, Daşkəsən, Neftçala, Oğuz və Qobustan rayonlarından gətirilmiş 95,1 ton meyvə-tərəvəz, ət-süd məhsulları, Buzovna, Mərdəkan, Giləzi, Goradil broyler fabriklərindən 1,2 tondan çox toyuq əti, 13 min ədəd yumurta təklif olunurdu. Burada mal ətinin kiloqramı 3 manat 60 qəpiyə, qoyun əti 4 manata, quş əti 2 manat 70 qəpiyə, soğan 20, kök 50, çuğundur və alma 40, armud 80, kartof 40-50, mandarin 80 qəpiyə, yumurtanın bir ədədi 8 qəpiyə satılırdı.