İyulun 30-da Azərbaycan Həmkarlar İttifaqları Konfederasiyasında Bakı və Bakıətrafı qəsəbələrin ziyalılarının nümayəndələrinin yığıncağı keçirilmişdir. Akademik Ziyad Səmədzadə yığıncağı açaraq bildirmişdir ki, son 11 ildə müstəqil Azərbaycanın dövlət quruculuğunun əsasları qoyulmuş, onun fəaliyyət mexanizmi formalaşmış, müstəqilliyimizin əbədi və dönməz olması üçün möhkəm zəmin yaranmışdır. Respublikanın dinamik inkişafı və dünyaya inteqrasiyası ümummilli lider Heydər Əliyevin adı ilə bağlıdır.

Yığıncaqda akademiklər Hacıbəy Sultanov, Fuad Qasımzadə, yazıçı Aqşin Babayev, siyasi elmlər doktoru Rövşən Mustafayev, əməkdar artist Ramiz Əzizbəyli və digərləri çıxış edərək, dövlətimizin başçısının elm, təhsil, mədəniyyət və sənət adamlarına göstərdiyi qayğıdan danışmışlar. Natiqlər son vaxtlar bəzi mətbuat orqanlarında Azərbaycan Prezidenti haqqında dərc edilən qərəzli və heç bir əsası olmayan yazılara da münasibətlərini bildirərək vurğulamışlar ki, heç bir qüvvə ölkəmizdə bərqərar olmuş ictimai-siyasi sabitliyi poza bilməz və xalq buna yol verməyəcəkdir.

Yığıncağın sonunda müraciət qəbul edilmişdir.

BAKI VƏ BAKIƏTRAFI QƏSƏBƏLƏRİN

ZİYALILARININ BİR QRUPUNUN

MÜRACİƏTİ

- Əziz həmvətənlər!

Biz, Bakıda və Bakı ətrafında yaşayan ziyalılar yaxşı başa düşürük ki, bu gün respublikamız mühüm ictimai-siyasi hadisə - prezident seçkiləri ərəfəsindədir. Hər yerdə seçkilərə hazırlıq işləri görülür. Artıq xalqımızın böyük əksəriyyəti bu dəfə də Heydər Əliyevi prezident görmək istədiyini bəyan etmişdir. Ölkəmizdə mövcud olan hüquqi, demokratik, dünyəvi dövlət quruluşu qarşıdan gələn seçkilərin şəffaf, açıq və ədalətli olacağını deməyə əsas verir. Möhtərəm Heydər Əliyevin respublikamıza rəhbərlik etdiyi 34 ildə gördüyü nəhəng işləri qədirbilən xalqımız yüksək qiymətləndirir və təqdir edir.

Tariximizin yaxın dövrünü – 1990-cı illərin əvvəllərini xatırlasaq, baş verən siyasi, ictimai proseslərin xronologiyasına nəzər salsaq görərik ki, həmin illərdə Azərbaycan dəhşətli bir uçurum qarşısında idi. Xalq, o cümlədən ziyalılar - elm, maarif, mədəniyyət və sənət adamları mənəvi sarsıntı və məhrumiyyətlərlə üzləşmişdi. Məhz möhtərəm Heydər Əliyevin ölkə rəhbərliyinə qayıtması respublikamızı bu ağır vəziyyətdən xilas etdi. Heydər Əliyevin ölkəyə başçılıq etdiyi dövr Azərbaycanın, xüsusən elmimizin, maarif və mədəniyyətimizin bütün sahələrinin inkişafı ilə səciyyəvidir.

Hələ sovet dövründə Azərbaycan Heydər Əliyevin rəhbərliyi ilə ittifaq respublikaları arasında həmişə ön cərgədə olmuşdur. Respublikamız ikinci dəfə müstəqillik qazandıqdan sonra dövlətçiliyimizin qorunub saxlanması və inkişaf etdirilməsi bilavasitə Heydər Əliyevin adı ilə bağlıdır. Heydər Əliyev bugünkü sivil Azərbaycan dövlətinin banisi və qurucusudur. O, bütün fəaliyyətini Azərbaycanın dövlət müstəqilliyinin əbədi olmasına, xalqımızın rifahının durmadan yaxşılaşmasına, respublikamızın qabaqcıl dünya dövlətləri səviyyəsinə yüksəlməsinə həsr etmişdir. Bu gün respublikamızda bərqərar olmuş ictimai-siyasi sabitlik, demokratik və dünyəvi dəyərlərə əsaslanan dövlət quruculuğu, ölkəmizin beynəlxalq aləmdə nüfuzunun günbəgün artması, iqtisadiyyatımızın yüksələn xətlə inkişaf etməsi xalqımızın firavan gələcəyindən xəbər verir. Ölkəmizdə elmin, maarifin, mədəniyyətin və digər sahələrin inkişafı Prezident Heydər Əliyevin daim diqqət mərkəzindədir. Heydər Əliyevin rəhbərliyi ilə dünyanın bir sıra aparıcı dövlətləri ilə sıx diplomatik əlaqələr qurulmuş, Azərbaycanın haqq səsi nüfuzlu beynəlxalq qurumların, xüsusən Avropa Şurasının kürsüsündən bütün dünyaya çatdırılmışdır. Bu gün Heydər Əliyev siyasi məktəbinin yetirməsi, Azərbaycan Milli Məclisinin Avropa Şurası Parlament Assambleyasındakı daimi nümayəndə heyətinin başçısı, AŞPA sədrinin müavini və Büro üzvü İlham Əliyev respublikamızı ləyaqətlə təmsil edir. ARDNŞ-in birinci vitse-prezidenti kimi onun ölkəmizin neft strategiyasının uğurla həyata keçirilməsində böyük rolu vardır.

Lakin son vaxtlar bəzi mətbuat orqanlarında Azərbaycanın dövlət başçısı haqqında qərəzli, heç bir əsası olmayan yazılar dərc edilir. Bildiririk ki, heç bir qüvvə ölkəmizdə bərqərar olmuş ictimai-siyasi sabitliyi poza, Azərbaycanı inkişaf yolundan döndərə bilməz. Belə mübarizə üsulu dövlətimizə və millətimizə əsla xeyir gətirmir.

Əziz xalqımız!

Biz – Bakıda və Bakı ətrafında yaşayan ziyalılar artıq öz seçimimizi etmişik. Biz inanırıq ki, möhtərəm Heydər Əliyev oktyabrın 15-də keçiriləcək seçkilərdə yenidən prezident seçiləcək, gələcəkdə isə onun müəyyən etdiyi siyasi xətt, inkişaf strategiyası İlham Əliyev tərəfindən uğurla davam etdiriləcəkdir.

Biz cənab Heydər Əliyevə uzun ömür, cansağlığı, Azərbaycanımızın xoşbəxt gələcəyi naminə gördüyü işlərdə yeni-yeni uğurlar arzulayırıq.