MƏDƏNİYYƏT


Bakıda gürcüstanlı rəssam Nino Kipşidzenin əsərlərindən ibarət sərgi açılıb

Bakı, 30 noyabr, AZƏRTAC

Noyabrın 30-da Azərbaycan Milli Xalça Muzeyində məşhur gürcü rəssamı, sənətşünas Nino Kipşidzenin əsərlərindən ibarət “Varlığın fraqmentləri” adlı sərgi açıb.

AZƏRTAC xəbər verir ki, sərgi Mədəniyyət Nazirliyi, Azərbaycan Milli Xalça Muzeyi və Gürcüstanın Azərbaycandakı səfirliyinin təşkilatçılığı ilə keçirilib. Ekspozisiyada Nino Kipşidzenin oturtma tikmə texnikasında yaratdığı 45 panno nümayiş olunub.

Tədbiri Azərbaycan Milli Xalça Muzeyinin direktoru Şirin Məlikova açaraq sərgi barədə öz fikirlərini bölüşüb. Bildirib ki, Nino Kipşidzenin əsərlərinə heyran qalmamaq mümkün deyil. O, çoxlu sayda müxtəlif forma və rəngli əsərləri mürəkkəb tekstil mozaikasını təşkil edir. Təqdim olunan əsərlərdə müxtəlif rəngli və fakturalı parça fraqmentlərinin yaratdığı təkrarolunmaz səth vizual olaraq ikiölçülü müstəvini “yarıb keçərək” tamaşaçıya tamamilə yeni, ecazkar, çoxölçülü bir dünyanı açır: “Onun əsərləri rəngkarlıq və tekstilin incə, valehedici keçidində yer alır. Sevinirəm ki, biz həmvətənlərimizin bu cür gözəllikləri görməsinə imkan yaratdıq”.

Şirin Məlikova rəssamın əsasən mənzərə və natürmort janrında işlədiyini, onun əsrarəngiz mənzərələrinin lakonikliyi ilə Şərq qravüralarını, bəzən isə hətta memarlıq elementlərini xatırlatdığını vurğulayıb: “Nino Kipşidzenin yaradıcılığında sözün əsl mənasında ləçək-ləçək yığılmış əlvan gül dəstəli natürmortlar olduqca çoxdur. Bununla yanaşı, rəssam fiqurativ kompozisiyalar da yaradır. Sənətkar öz yaradıcılığı ilə gürcü tekstil sənətinin qədim ənənələrini yaşadır. Mən 2017-ci ildə Tbilisidə rəssamın emalatxanasında olmuşdum. Nino Kipşidzenin əsərləri məni valeh etmişdi və qərara gəldim ki, onun sərgisini ölkəmizdə təşkil edək”, - deyə Ş.Məlikova qeyd edib.

Sərginin açılışında iştirakdan məmnunluğunu ifadə edən Gürcüstanın ölkəmizdəki səfiri Zurab Pataradze vurğulayıb ki, bu cür tədbirlərin keçirilməsi Azərbaycan ilə Gürcüstan arasında mədəni əlaqələri gücləndirir. Bundan sonra da biz birlikdə daha çox tədbirlər keçirəcəyik. Bu tədbirlər strateji tərəfdaşlığımızın, dostluğumuzun bir nümunəsidir.

Tbilisi Dövlət Universitetinin professoru İrina Koşoridze sərginin əhəmiyyətindən söz açaraq rəssamın yaradıcılığının özünəməxsusluğundan danışıb.

Sonda Nino Kipşidze çıxış edərək tədbirin təşkilatçı və iştirakçılarına təşəkkürünü bildirib.

Qeyd edək ki, sərgi gələn il yanvarın 22-dək davam edəcək.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.