CƏMİYYƏT
Bakıda ikinci Milli Nefroloji, Dializ və Transplantoloji beynəlxalq konqres keçirilir
Bakı, 7 fevral, AZƏRTAC
Fevralın 7-də Səhiyyə Nazirliyinin dəstəyi və Azərbaycan Nefroloqlar Cəmiyyətinin təşkilatçılığı ilə Bakıda 2-ci Milli Nefroloji, Dializ və Transplantoloji beynəlxalq konqres işə başlayıb.
AZƏRTAC xəbər verir ki, Azərbaycan Nefroloqlar Cəmiyyətinin sədri Barat Yusifov, cəmiyyətin Fəxri prezidenti Mehman Ağayev, Azərbaycan Tibb Universitetinin urologiya kafedrasının müdiri Sudeyf İmamverdiyev, Səhiyyə Nazirliyinin baş nefroloqu Fariz Babayev ölkəmizdə səhiyyənin, o cümlədən də nefrologiya sahəsinin inkişafından danışıb, belə konqreslərin əhəmiyyətindən bəhs ediblər. Bildirilib ki, Azərbaycanda hemodializ ilk dəfə 1970-ci ildə, orqan transplantasiyası isə 1971-ci ildə tətbiq olunub.
Səhiyyə Nazirliyinin baş onkoloqu, Milli Onkologiya Mərkəzinin baş həkimi Azad Kərimli ölkəmizdə təbabətin tərəqqisindən bəhs edib, dünyanın aparıcı klinikalarında icra olunan cərrahi əməliyyatların ölkəmizdə uğurla həyata keçirildiyini diqqətə çatdırıb.
“Azərbaycanda dializin və orqan köçürülməsinin əsası keçən əsrdə yerli mütəxəssislər tərəfindən qoyulub. Lakin o zamanlar şəraitin, lazımi tibbi avadanlıqların olmaması inkişafa mane olub. Həmin dövrlə müqayisədə səhiyyəmiz nəzərəçarpan dərəcədə tərəqqi edib. Hazırda Azərbaycanda elə cərrahi əməliyyatlar aparılır ki, bu da dünyanın aparıcı klinikalarında icra olunan əməliyyatlarla demək olar bərabər səviyyədədir”, - deyə baş onkoloq bildirib.
O, Milli Onkologiya Mərkəzinin baş direktoru, akademik Cəmil Əliyevin adından konqresin işinə uğurlar arzulayıb, belə tədbirlərin davamlı olmasını diləyib.
Səhiyyə Nazirliyinin nümayəndəsi Anar İsrafilov Azərbaycanda 2006-cı ildən bəri xroniki böyrək çatışmazlığına dair 3-cü Dövlət Proqramının icra olunduğunu, proqram çərçivəsində respublikamızda 44 hemodializ mərkəzinin fəaliyyət göstərdiyini, həmin mərkəzlərdə 600-dən çox süni böyrək aparatının quraşdırıldığını bildirib. O, xroniki böyrək çatışmazlığından əziyyət çəkən 4 minə yaxın xəstənin həmin mərkəzlərdə hemodializ seansları və müvafiq dərman preparatları ilə təmin olunduğunu qeyd edib. Proqram çərçivəsində, həmçinin böyrəkköçürmə əməliyyatları da icra olunur. Bu günədək 400-dən çox belə əməliyyat həyata keçirilib. Böyrək köçürülən xəstələrin də ümumi supressiv dərman preparatları ilə təminatı dövlət hesabınadır. Demək olar ki, 1000-ə yaxın belə xəstə müvafiq dərman preparatları ilə təmin olunur.
Türkiyənin İstanbul Tibb Universitetinin professoru Mehmet Şükrü Sever isə belə tədbirlərin təcrübə mübadiləsi baxımından əhəmiyyətini qeyd edərək burada iştirakdan məmnunluğunu ifadə edib.
Konqres panel müzakirələrlə davam edib.
Qeyd edək ki, tədbir çərçivəsində gənc həkimlərin biliklərinin artırılması məqsədilə kurslar da təşkil olunub. Konqresin işinə fevralın 8-də yekun vurulacaq.