Bakı, 10 may (AZƏRTAC). Bəşəriyyətin yaşı insan varlığının mübarizə tarixidir. Bu müqəddəs mübarizədə müdrik insanlar, mütəfəkkirlər cəmiyyətin tərəqqi və inkişaf yolunun böyük bələdçiləri olurlar. Onlar istər elmdə, istər azadlıq mücadiləsində, istərsə də dövlət idarəçiliyində öz zəka və istedadlarını, bilik və bacarıqlarını, bir sözlə, intellektual potensiallarını doğma xalqlarının inkişafına yönəltməklə bəşəriyyətin tərəqqisinə xidmət edirlər. Azərbaycan xalqının dahi oğlu, müdrik dövlət xadimi Heydər Əliyev də məhz tarixin yetişdirdiyi belə nadir şəxsiyyətlərdəndir.

AZƏRTAC xəbər verir ki, Azərbaycan xalqının ümummilli lideri Heydər Əliyevin anadan olmasının 91-ci ildönümü münasibətilə mayın 10-da Bakıda Ulu Öndərin adını daşıyan sarayın qarşısındakı parkda və şəhər Mərkəzi Parkında ənənəvi Gül bayramı təşkil edilmişdir.

Bakı sakinlərinin sevimli istirahət məkanı rəngarəng güllərə qərq olmuşdu. Bu günəşli may günündə parklar boyunca paytaxt sakinlərini bayrama dəvət edən klassik musiqilərimiz səslənirdi.

Səhər tezdən başlayaraq paytaxtımızın sakinləri, eləcə də şəhərimizin qonaqları gül-çiçəklə bəzədilmiş parklarda rəmzi pavilyonları gəzir, burada xatirə şəkilləri çəkdirirlər. Onların sırasında hər yaşdan və müxtəlif millətlərdən olan insanları görmək mümkündür.

Bakı Şəhər İcra Hakimiyyətinin təşkil etdiyi bu bayramda parkın girişinə çiçəklərlə bəzədilmiş İçərişəhərin Qala qapıları formasında tağlar nağıllar və gözəllik aləmini xatırladırdı.

Müstəqil dövlətimizin xilaskarı və qurucusu, xalqımızın dahi oğlu Heydər Əliyevin əzəmətli abidəsinin ətrafı gül-çiçəyə qərq olmuş, postament ağ güllərlə hörülmüşdür.

Çiçək və bitkilərdən, yarpaqlardan hazırlanmış çox sadə, eyni zamanda, orijinal kompozisiyalar görünüşü ilə ziyarətçilərdə xoş ovqat yaradırdı. Müxtəlif ikebanalar, rəngarəng pannolar və peyzajlar, şagirdlərin əlləri ilə yığılmış buketlər, gül səbətləri, dekorativ bitkilərdən hazırlanmış dövlət rəmzləri, eksponatlar bayrama gələnlərin diqqətini cəlb edirdi.

Gül bayramında paytaxtın təhsil müəssisələrinin hazırladıqları çoxsaylı əl işləri açıq havada təşkil edilmiş əsrarəngiz gül sərgisini xatırladırdı. Uşaq yaradıcılıq mərkəzinin şagirdlərinin müxtəlif çiçək və güllərdən, bitkilərdən hazırladıqları rəngarəng tablolar, applikasiyalar Bakı sakinlərinin və şəhərimizin çoxsaylı qonaqlarının diqqətini daha çox cəlb edirdi.

Parkdakı fəvvarələr güllərlə bəzədilmiş, gözəl və rəngarəng gül kompozisiyaları arasında nağıl qəhrəmanımız Cırtdanın obrazı, ördək və qaz fiqurları xüsusi maraq doğururdu. Burada müxtəlif dibçək və kəsilmə güllərdən, qurudulmuş gül və bitki kollarından, göz oxşayan eksponatlardan ibarət sadə və eyni zamanda, orijinal üslublu kompozisiyalar qurulmuşdu.

Hər bir işdə dahi şəxsiyyətə böyük sevgi öz əksini tapmışdı. Buraya toplaşanları Azərbaycanı çiçəklənən diyara çevirmiş ümummilli lider Heydər Əliyevin nurlu xatirəsinə dərin ehtiram birləşdirirdi.

Valideynləri ilə parklara gəlmiş uşaqların sevincinin həddi-hüdudu yox idi.

Parklardakı kompozisiyalar insanları dönə-dönə ayaq saxlamağa, dahi şəxsiyyətə xalq məhəbbətinə güllərin, çiçəklərin gözləri ilə baxmağa vadar edirdi. Maraqlı odur ki, minlərlə çiçəyin bir arada toplandığı bu məkanlarda heç nə bir-birini təkrarlamırdı.

Müxtəlif əl işlərinin fonunda Ümummilli Liderin həyat və fəaliyyətinin ayrı-ayrı dövrlərini əks etdirən fotolar da sakinlər tərəfindən maraqla qarşılanmışdır.

Bu ürəkaçan mənzərəni seyr edərkən bir daha əmin olursan ki, ulu öndər Heydər Əliyevin təbiətə, gözəlliyə sevgisi, Azərbaycan təbiətini qorumaqla bağlı tövsiyələri bu gün də böyük hörmət və məhəbbətlə xatırlanır.

Bakı Şəhər İcra Hakimiyyətinin başçısı Hacıbala Abutalıbov jurnalistlərə müsahibəsində bildirmişdir ki, Azərbaycan xalqının ümummilli lideri Heydər Əliyevin abidəsinin ucaldığı parkda gül bayramının təşkil edilməsi dahi şəxsiyyətin ruhuna ehtiram əlaməti olmaqla yanaşı, həm də paytaxt sakinlərinin xoş istirahəti baxımından da gözəl addımdır. Parklardakı al-əlvan gül-çiçək çələnglərinə tamaşa edərkən bir daha bu bayramın Heydər Əliyev şəxsiyyətinə və dühasına xalq məhəbbətinin və minnətdarlığının böyük təntənəsi olduğunu hiss edirsən. Bu gün Bakıda keçirilən Gül bayramı ilə əlaqədar Azərbaycana dünyanın müxtəlif ölkələrindən 6 milyon gül gətirilmişdir.

Şəhər sakini Famil Əbilov deyir: “Bayrama ailə üzvlərimlə gəlmişəm. Park boyu sərgilənmiş gül kompozisiyaları, onlardan hörülmüş fiqurlar, dünyanın fərqli yerlərindən paytaxta gətirilmiş nadir çiçəklər və bitkilər, tətbiqi sənət nümunələri, rəsm, plakat, panno və müxtəlif əl işləri hamı kimi, məni də heyran edir. Bu xoşbəxtliyi bizə Ulu Öndər bəxş etmişdir. Əgər bu gün biz küçələrdə sərbəst gəziriksə, ev-eşiyimizdən arxayınıqsa, cəbhələrdən maşın-maşın tabut gəlmirsə buna görə millətimizin bəxtinə düşən dahi siyasi xadim Heydər Əliyevə borcluyuq”.

Digər paytaxt sakini Rüfət Rəcəbov isə bu bayramın dahi şəxsiyyət Heydər Əliyevin əziz xatirəsinə ümumxalq ehtiramının təntənəsi olduğunu bildirərək deyir: “Hər il məhz bu günü səbirsizliklə gözləyirik. Çünki hər il Gül bayramının ümumxalq təntənəsi ilə qeyd edilməsi ölkəmizin inkişafını, paytaxtımızın getdikcə gözəlləşməsini göstərməklə yanaşı, insanların qəlbində əsl bahar ovqatı yaradır”.

Bir sözlə, bugünkü Gül bayramı şəhər sakinlərinin ürəyində xoş duyğular oyadırdı. Bura gələnlər sanki güllərin sehrinə düşürdülər. Bu möhtəşəm bayramda ən çox diqqəti cəlb edən isə Azərbaycan xəritəsinin fonunda dünya şöhrətli siyasi xadim Heydər Əliyevin güllərlə işlənmiş portreti idi. Portretdən Ulu Öndərimizin xalqımızı daha xoşbəxt gələcəyə aparan inkişaf yolumuzu işıqlandıran nurlu çöhrəsi boylanır.