MƏDƏNİYYƏT
Bayram günlərində Qız qalasına və Şirvanşahlar Sarayı Kompleksinə giriş sərbəst olacaq VİDEO
Bakı, 27 dekabr, AZƏRTAC
Dekabrın 27-dən yanvarın 5-dək “İçərişəhər” Dövlət Tarix-Memarlıq Qoruğu İdarəsinin tabeliyində fəaliyyət göstərən Qız qalası və Şirvanşahlar Sarayı Kompleksi muzey ekspozisiyalarına sərbəst giriş kampaniyası keçirilir.
İdarədən AZƏRTAC-a bildirilib ki, hər saatın əvvəlində bu muzey ekspozisiyalarına həmçinin bələdçi ilə turlar da təşkil olunacaq. Belə ki, 10 gün müddətində paytaxt sakinləri və şəhərimizin qonaqları İçərişəhərdə yerləşən sözügedən muzey ekspozisiyalarla ödənişsiz tanış olmaq imkanı əldə edəcəklər.
Muzeylərə sərbəst giriş kampaniyası “bp” Azərbaycan şirkətinin maliyyə dəstəyi ilə həyata keçiriləcək.
Məlumat üçün qeyd edək ki, dekabrın 31-də muzeylər saat 16:00-dək fəaliyyət göstərəcək, yanvarın 1-də isə bağlı olacaq.