CƏMİYYƏT


Beynəlxalq Müsəlman Üləmaları İttifaqı Azərbaycanın haqlı mübarizəsinə dəstəyini ifadə edib

Bakı, 13 oktyabr, AZƏRTAC

Beynəlxalq Müsəlman Üləmaları İttifaqı işğal olunmuş torpaqlarımızın azad edilməsi uğrunda Azərbaycanın haqlı mübarizəsinə dəstəyini ifadə edib.

QMİ-nin mətbuat xidmətindən AZƏRTAC-a verilən məlumata görə, bu barədə İttifaqın Qafqaz Müsəlmanları İdarəsinin (QMİ) sədri şeyxülislam Allahşükür Paşazadəyə ünvanlandığı məktubda bildirilib.

Məktubda deyilir: “Ermənistan təcavüzkar dövlətdir, Dağlıq Qarabağ bölgəsini işğal edib. Beynəlxalq təşkilatların Ermənistan qoşunlarının Azərbaycan işğal etmiş torpaqlarından çıxarılması ilə bağlı cəhdləri nəticəsiz qalıb, böyük dövlətlər də rəsmi Yerevana heç bir təzyiq göstərmir.

Biz - Beynəlxalq Müsəlman Üləmaları İttifaqı 93 dövlətdən on minlərlə üləmanın üzv olduğu, onlarla üləma cəmiyyətlərinə malik təşkilat kimi, Allahın izni ilə həmişə haqqın tərəfində dayanırıq. Buna görə də təcavüzkar dövləti pisləyən, Azərbaycanın işğal olunmuş bütün torpaqlarından Ermənistanın geri çəkilməsini tələb edən, təcavüzün və işğalın gec-tez acı aqibət gözlədiyini özündə əks etdirən geniş bəyanat vermişik. Biz öz torpağının və suverenliyinin müdafiəsində dayanan doğma Azərbaycan xalqının yanındayıq”.

İttifaq, həmçinin Ermənistandan işğal etdiyi torpaqlardan dərhal geri çəkilməsi, Azərbaycanın haqlı olduğunu etiraf etməsi, bütün dinlərdə və beynəlxalq hüquqda təsbit edilmiş etik prinsiplərə hörmət əsasında sülh və təhlükəsizliyin bərqərar olunması üçün hər iki tərəfi müharibəni dayandırmağa çağırıb.

Təşkilatın verdiyi bəyanatda deyilir ki, Beynəlxalq Müsəlman Üləmaları İttifaqı Ermənistanı işğal etmiş ərazilərdən çəkilməyə çağırır. Təşkilat işğalı və təcavüzü şiddətlə pisləyir. Həmçinin münaqişə tərəfləri müharibə zamanı İslami əxlaqi prinsiplərə, mülki şəxslərin himayə edilməsi, mülklərinin dağıdılmaması, ekologiyanın qorunması və digər məsələlərə aid beynəlxalq hüquq normalarına riayət etməyə çağırılır.

İttifaq bildirir ki, Qarabağ regionu Ermənistana aid deyil, Azərbaycana məxsusdur. BMT Təhlükəsizlik Şurası Ermənistanın işğal etdiyi ərazilərdən çıxmasına dair 4 qətnamə qəbul edib. Habelə Avropa Şurası və İslam Əməkdaşlığı Təşkilatı analoji qərarlar verib. Bu yaxınlarda Rusiya Prezidenti Vladimir Putin bu torpaqların Ermənistana aid olmadığını açıq şəkildə bildirib.

“Bunu nəzərə alaraq bəyan edirik ki, Ermənistan işğalçı dövlətdir, işğal etdiyi ərazilərdən beynəlxalq qanunlara uyğun olaraq mütləq çıxmalıdır. Peyğəmbərimiz (s.ə.v.) buyurmuşdur: “Zalım millətin haqqı yoxdur”.

Buna görə də Beynəlxalq Müsəlman Üləmaları İttifaqı Ermənistanı bütün işğal edilmiş ərazilərdən çəkilməsinə, bunu həyata keçirtmək üçün danışıqlara başlamağa çağırır. Bu, problemin köklü və birdəfəlik həlli yoludur”, - deyə bəyanatda vurğulanır.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.